ਏਸ਼ੀਆਈ ਖੇਡਾਂ (ਸੇਲਿੰਗ): ਮਨੂ ਫ੍ਰਾਂਸਿਸ ਅਤੇ ਕੁਰਿਸਿੰਕਲ ਨੋਬਲ ਨੇ ਪੁਰਸ਼ ਸਕਿਫ਼ ''ਚ ਜਿੱਤਿਆ ਚਾਂਦੀ ਦਾ ਤਗਮਾ

ਗਾਮਾਗੋਰੀ ਸਿਟੀ (ਜਾਪਾਨ) : ਜਾਪਾਨ ਦੇ ਗਾਮਾਗੋਰੀ ਸਿਟੀ ਵਿਖੇ ਚੱਲ ਰਹੀਆਂ ਏਸ਼ੀਆਈ ਖੇਡਾਂ ਦੀ ਸੇਲਿੰਗ (ਨੌਕਾਯਾਨ) ਪ੍ਰਤੀਯੋਗਤਾ ਵਿੱਚ ਭਾਰਤ ਦੇ ਮਨੂ ਫ੍ਰਾਂਸਿਸ ਅਤੇ ਕੁਰਿਸਿੰਕਲ ਨੋਬਲ ਦੀ ਜੋੜੀ ਨੇ ਪੁਰਸ਼ ਸਕਿਫ਼ ਈਵੈਂਟ ਵਿੱਚ ਚਾਂਦੀ ਦਾ ਤਗਮਾ ਆਪਣੇ ਨਾਮ ਕੀਤਾ ਹੈ। ਕੋਚੀ ਦੇ ਰਹਿਣ ਵਾਲੇ ਅਤੇ ਬਚਪਨ ਦੇ ਦੋਸਤ ਮਨੂ ਅਤੇ ਨੋਬਲ ਨੇ ਨੌਂ ਰੇਸਾਂ ਤੋਂ ਬਾਅਦ ਕੁੱਲ 23 ਅੰਕ ਹਾਸਲ ਕਰਕੇ ਦੂਜਾ ਸਥਾਨ ਪ੍ਰਾਪਤ ਕੀਤਾ। ਇਸ ਪ੍ਰਤੀਯੋਗਤਾ ਵਿੱਚ ਸਭ ਤੋਂ ਘੱਟ ਅੰਕ ਹਾਸਲ ਕਰਨ ਵਾਲੀ ਟੀਮ ਜੇਤੂ ਬਣਦੀ ਹੈ। ਚੀਨ ਦੀ ਵੇਨ ਜੈਡਿੰਗ ਅਤੇ ਲਿਊ ਤਿਆਨ ਦੀ ਜੋੜੀ ਨੇ 16 ਅੰਕਾਂ ਨਾਲ ਸੋਨ ਤਗਮਾ ਜਿੱਤਿਆ, ਜਦਕਿ ਹਾਂਗਕਾਂਗ ਚੀਨ ਦੇ ਅਕੀਰਾ ਲਿਊਕ ਸਕਾਈ ਅਤੇ ਰਸੇਲ ਆਇਲਸਵਰਥ ਨੇ 24 ਅੰਕਾਂ ਨਾਲ ਕਾਂਸੀ ਦਾ ਤਗਮਾ ਹਾਸਲ ਕੀਤਾ।

ਦੂਜੇ ਪਾਸੇ, ਮਹਿਲਾ ਸਕਿਫ਼ ਈਵੈਂਟ ਵਿੱਚ ਭਾਰਤ ਦੀ ਹਰਸ਼ਿਤਾ ਤੋਮਰ ਅਤੇ ਸ਼ੀਤਲ ਵਰਮਾ ਦੀ ਜੋੜੀ 26 ਅੰਕਾਂ ਨਾਲ ਚੌਥੇ ਅਤੇ ਅੰਤਿਮ ਸਥਾਨ 'ਤੇ ਰਹੀ। ਇਸ ਮਹਿਲਾ ਈਵੈਂਟ ਵਿੱਚ ਜਾਪਾਨ ਦੀ ਟੀਮ ਨੇ 11 ਅੰਕਾਂ ਨਾਲ ਸੋਨ ਤਗਮਾ, ਹਾਂਗਕਾਂਗ ਚੀਨ ਨੇ 16 ਅੰਕਾਂ ਨਾਲ ਚਾਂਦੀ ਦਾ ਤਗਮਾ ਅਤੇ ਚੀਨ ਨੇ 23 ਅੰਕਾਂ ਨਾਲ ਕਾਂਸੀ ਦਾ ਤਗਮਾ ਜਿੱਤਿਆ।