ਨਿਊਜ਼ੀਲੈਂਡ ਦੇ ਸਾਬਕਾ ਕ੍ਰਿਕਟਰ ਨੇ ਕਿਹਾ-ਫਾਈਨਲ ’ਚ ਭਾਰਤੀ ਗੇਂਦਬਾਜ਼ਾਂ ਨੂੰ ਅਭਿਆਸ ਦੀ ਰੜਕੀ ਘਾਟ

ਸਾਊਥੰਪਟਨ : ਨਿਊਜ਼ੀਲੈਂਡ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਸਾਈਮਨ ਡੋਲ ਦਾ ਮੰਨਣਾ ਹੈ ਕਿ ਨਿਊਜ਼ੀਲੈਂਡ ਖ਼ਿਲਾਫ਼ ਚੱਲ ਰਹੇ ਵਰਲਡ ਟੈਸਟ ਚੈਂਪੀਅਨਸ਼ਿਪ (ਡਬਲਯੂ. ਟੀ. ਸੀ.) ਦੇ ਫਾਈਨਲ ਤੋਂ ਪਹਿਲਾਂ ਮੈਚ ਅਭਿਆਸ ਦੀ ਘਾਟ ਭਾਰਤ ਦੇ ਤੇਜ਼ ਹਮਲੇ ਨੂੰ ਸੱਟ ਮਾਰ ਰਹੀ ਹੈ। ਨਿਊਜ਼ੀਲੈਂਡ ਨੂੰ ਡਬਲਯੂ. ਟੀ. ਸੀ. ਦੇ ਫਾਈਨਲ ਤੋਂ ਪਹਿਲਾਂ ਮੇਜ਼ਬਾਨ ਇੰਗਲੈਂਡ ਖ਼ਿਲਾਫ਼ ਦੋ ਟੈਸਟ ਮੈਚ ਖੇਡਣ ਦਾ ਮੌਕਾ ਮਿਲਿਆ, ਜਦਕਿ ਭਾਰਤੀ ਟੀਮ ਨੂੰ ਵੱਕਾਰੀ ਮੈਚ ਤੋਂ ਪਹਿਲਾਂ ਮੈਚ ਲਈ ਕਾਫ਼ੀ ਅਭਿਆਸ ਨਹੀਂ ਮਿਲਿਆ। ਵਿਰਾਟ ਕੋਹਲੀ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਨੇ ਆਖਰੀ ਵਾਰ ਮਾਰਚ ’ਚ ਇੰਗਲੈਂਡ ਖ਼ਿਲਾਫ਼ ਘਰੇਲੂ ਮੈਦਾਨ ’ਚ 3-1 ਦੀ ਘਰੇਲੂ ਲੜੀ ’ਚ ਆਪਣੀ ਜਿੱਤ ਦੌਰਾਨ ਪੰਜ ਰੋਜ਼ਾ ਮੈਚ ਖੇਡਿਆ ਸੀ।

ਡੋਲ ਨੇ ਹਰਸ਼ਾ ਭੋਗਲੇ ਨੂੰ ਕਿਹਾ ਕਿ ਕਈ ਵਾਰ ਤੁਸੀਂ ਇਸ ਨੂੰ ਵੇਖਦੇ ਹੋ ਅਤੇ ਸੋਚਦੇ ਹੋ ਕਿ ਕੀ ਉਨ੍ਹਾਂ ਨੂੰ (ਭਾਰਤ ਨੂੰ) ਤਿਆਰੀ ਕਰਨ ਦਾ ਪੂਰਾ ਮੌਕਾ ਮਿਲਿਆ ਹੈ। ਮੈਨੂੰ ਲੱਗਦਾ ਹੈ ਕਿ ਉਨ੍ਹਾਂ ਨੂੰ ਮਿਲਿਆ। ਮੈਨੂੰ ਲੱਗਦਾ ਹੈ ਕਿ ਪਿਛਲੇ 10-12 ਦਿਨਾਂ ਵਿਚ ਉਨ੍ਹਾਂ ਨੇ ਕਾਫ਼ੀ ਗੇਂਦਬਾਜ਼ੀ ਕੀਤੀ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਉਹ ਮੈਚ ਲਈ ਤਿਆਰ ਹਨ ਪਰ ਮੈਚ ਅਭਿਆਸ ਨੂੰ ਦੁਹਰਾਉਣਾ ਮੁਸ਼ਕਿਲ ਹੈ। ਤੁਸੀਂ ਆਪਣੀਆਂ ਖੁਦ ਦੀਆਂ ਦੋ ਟੀਮਾਂ ਬਣਾ ਕੇ ਅਜਿਹਾ ਕਰਨ ਦੀ ਕੋਸ਼ਿਸ਼ ਕਰ ਸਕਦੇ ਹੋ ਪਰ ਇਹ ਕਾਫ਼ੀ ਨਹੀਂ ਹੈ ਅਤੇ ਇਹ ਮਹੱਤਵਪੂਰਨ ਹੈ। ਮੈਚ ਅਭਿਆਸ ਨੂੰ ਬਦਲਣਾ ਮੁਸ਼ਕਿਲ ਹੈ, ਜੋ ਤੁਹਾਨੂੰ ਬਿਹਤਰ ਬਣਾਉਂਦਾ ਹੈ ਅਤੇ ਤੁਹਾਨੂੰ ਇਨ੍ਹਾਂ ਮੈਚਾਂ ਲਈ ਤਿਆਰ ਕਰਦਾ ਹੈ।

ਡੋਲ ਨੇ ਇਹ ਬਿਆਨ ਨਿਊਜ਼ੀਲੈਂਡ ਦੀ ਪਹਿਲੀ ਪਾਰੀ ’ਚ ਭਾਰਤੀ ਤੇਜ਼ ਗੇਂਦਬਾਜ਼ਾਂ ਦੇ ਉਮੀਦ ਤੋਂ ਘੱਟ ਪ੍ਰਦਰਸ਼ਨ ਕਾਰਨ ਦਿੱਤਾ ਕਿਉਂਕਿ ਨਿਊਜ਼ੀਲੈਂਡ ਨੇ ਪਹਿਲੀ ਪਾਰੀ ’ਚ ਭਾਰਤ ਦੀਆਂ 217 ਦੌੜਾਂ ਦੇ ਜਵਾਬ ’ਚ ਦੋ ਵਿਕਟਾਂ ਲਈ 101 ਦੌੜਾਂ ਬਣਾਈਆਂ ਸਨ। ਐਜਿਸ ਬਾਉਲ ਵਿਚ ਤੇਜ਼ ਗੇਂਦਬਾਜ਼ੀ ਦੇ ਹਾਲਾਤ ਦੇ ਬਾਵਜੂਦ ਜਸਪ੍ਰੀਤ ਬੁਮਰਾਹ, ਇਸ਼ਾਂਤ ਸ਼ਰਮਾ ਅਤੇ ਮੁਹੰਮਦ ਸ਼ੰਮੀ ਜ਼ਿਆਦਾ ਸਵਿੰਗ ਹਾਸਲ ਕਰਨ ’ਚ ਅਸਫਲ ਰਹੇ, ਜਦਕਿ ਨਿਊਜ਼ੀਲੈਂਡ ਦੇ ਤੇਜ਼ ਗੇਂਦਬਾਜ਼ ਕਾਈਲ ਜੈਮੀਸਨ (31 ਦੌੜਾਂ ’ਤੇ 5), ਨੀਲ ਵੈਗਨੇਰ ਨੇ 40 ਦੌੜਾਂ ’ਤੇ 2 ਅਤੇ ਟ੍ਰੇਂਟ ਬੋਲਟ ਨੇ 47 ਦੌੜਾਂ ’ਤੇ 2 ਵਿਕਟਾਂ ਦਾ ਲਾਭ ਲਿਆ। ਮੀਂਹ ਨਾਲ ਪ੍ਰਭਾਵਿਤ ਮੈਚ ’ਚ ਤੇਜ਼ ਗੇਂਦਬਾਜ਼ੀ ਦੇ ਅਨੁਕੂਲ ਹਾਲਾਤ ਦਾ ਫਾਇਦਾ ਉਠਾਉਂਦੇ ਹੋਏ ਭਾਰਤ ਨੂੰ ਘੱਟ ਸਕੋਰ ’ਤੇ ਰੋਕਿਆ।

ਡੋਲ ਨੇ ਕਿਹਾ ਕਿ ਨਿਊਜ਼ੀਲੈਂਡ ਨੂੰ ਯਕੀਨਨ ਇਸ ਮਾਣਮੱਤੇ ਮੈਚ ਤੋਂ ਪਹਿਲਾਂ ਇੰਗਲੈਂਡ ਖ਼ਿਲਾਫ਼ ਦੋ ਮੈਚ ਖੇਡਣ ਦਾ ਫਾਇਦਾ ਮਿਲਿਆ। ਨਿਊਜ਼ੀਲੈਂਡ ਇੰਗਲੈਂਡ ਖ਼ਿਲਾਫ਼ ਲਾਰਡਸ ਵਿਖੇ ਆਪਣਾ ਪਹਿਲਾ ਟੈਸਟ ਉਸੇ ਤਰ੍ਹਾਂ ਦੀ ਤਿਆਰੀ ਨਾਲ ਖੇਡਿਆ, ਜਿਸ ਤਿਆਰੀ ਨਾਲ ਭਾਰਤ ਉਤਰਿਆ। ਨਿਊਜ਼ੀਲੈਂਡ ਦੀ ਟੀਮ ਸਾਊਥੰਪਟਨ ਵਿਚ ਲੱਗਭਗ 10-11 ਦਿਨ ਰਹੀ ਹੈ, ਆਪਣੀਆਂ ਟੀਮਾਂ ਵਿਚਾਲੇ ਮੈਚ ਖੇਡੇ, ਅਭਿਆਸ ਕੀਤਾ ਤੇ ਜਦੋਂ ਉਹ ਲਾਰਡਸ ਵਿਖੇ ਉਤਰੇ ਤਾਂ ਲੈਅ ’ਚ ਲੱਗ ਰਹੇ ਸਨ।

ਉਨ੍ਹਾਂ ਕਿਹਾ ਕਿ ਟਿਮ ਸਾਊਥੀ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕੀਤੀ, ਡੇਵੋਨ ਕਾਨਵੇ ਨੇ ਇੱਥੇ 10 ਦਿਨ ਨੈੱਟ ਸੈਸ਼ਨ ਤੋਂ ਬਾਅਦ ਲਾਰਡਸ ਵਿਖੇ ਦੋਹਰਾ ਸੈਂਕੜਾ ਲਗਾਇਆ। ਅਜਿਹਾ ਲੱਗਦਾ ਸੀ, ਜਿਵੇਂ ਉਹ ਤਿਆਰ ਹਨ। ਇੰਡੀਅਨ ਇਲੈਵਨ ’ਚ ਇਸ਼ਾਂਤ ਸ਼ਰਮਾ ਤੋਂ ਇਲਾਵਾ ਕੋਈ ਹੋਰ ਸਵਿੰਗ ਗੇਂਦਬਾਜ਼ ਨਹੀਂ ਹੈ। ਉਹ ਅਸਲ ਸਵਿੰਗ ਗੇਂਦਬਾਜ਼ ਨਹੀਂ ਹੈ। ਮੈਂ ਜਾਣਦਾ ਹਾਂ ਕਿ ਜਸਪ੍ਰੀਤ ਬੁਮਰਾਹ ਗੇਂਦ ਨੂੰ ਸਵਿੰਗ ਕਰ ਸਕਦਾ ਹੈ, ਇਸ਼ਾਂਤ ਇੱਕ ਸਵਿੰਗ ਗੇਂਦਬਾਜ਼ ਹੈ, ਉਹ ਰਾਊਂਡ ਦਿ ਵਿਕਟ ਗੇਂਦਬਾਜ਼ੀ ਕਰਦਾ ਹੋਇਆ ਉਸ ਕੋਣ ਨਾਲ ਆਉਂਦਾ ਹੈ ਕਿ ਗੇਂਦ ਗੁੱਟ ’ਚੋਂ ਬਾਹਰ ਆ ਜਾਂਦੀ ਹੈ। ਉਹ ਗੇਂਦ ਨੂੰ ਖੱਬੇ ਹੱਥ ਦੇ ਬੱਲੇਬਾਜ਼ਾਂ ਤੋਂ ਦੂਰ ਅਤੇ ਸੱਜੇ ਹੱਥ ਦੇ ਬੱਲੇਬਾਜ਼ਾਂ ਲਈ ਅੰਦਰ ਨੂੰ ਲਿਆਉਂਦਾ ਹੈ। ਡੋਲ ਨੇ ਕਿਹਾ ਕਿ ਮੁਹੰਮਦ ਸ਼ੰਮੀ ਕਦੇ ਵੀ ਅਸਲ ਸਵਿੰਗ ਗੇਂਦਬਾਜ਼ ਨਹੀਂ ਰਿਹਾ। ਉਹ ਸੀਮ ਗੇਂਦਬਾਜ਼ ਹੈ। ਮੇਰੇ ਲਈ ਬੁਮਰਾਹ, ਸ਼ੰਮੀ ਨਹੀਂ ਬਲਕਿ ਇਸ਼ਾਂਤ ਵਧੇਰੇ ਮਹੱਤਵਪੂਰਨ ਹੈ। ਮੈਨੂੰ ਗੇਂਦ ਵਧੇਰੇ ਸੀਮ ਕਰਨ ਦੀ ਉਮੀਦ ਸੀ। ਸ਼ੰਮੀ ਅਤੇ ਬੁਮਰਾਹ ਨੇ ਕਦੀ ਕਦੀ ਸੀਮ ’ਤੇ ਗੇਂਦਬਾਜ਼ੀ ਕੀਤੀ ਪਰ ਨਿਰੰਤਰ ਅਜਿਹਾ ਨਹੀਂ ਕਰ ਸਕੇ।