Paris Olympics : ਦੀਪਿਕਾ ਫਿਰ ਫਲਾਪ, ਭਾਰਤੀ ਮਹਿਲਾ ਤੀਰਅੰਦਾਜ਼ੀ ਟੀਮ ਕੁਆਰਟਰ ਫਾਈਨਲ ''ਚ ਹਾਰ ਕੇ ਬਾਹਰ
Sunday, Jul 28, 2024 - 09:49 PM (IST)
ਪੈਰਿਸ : ਭਾਰਤ ਦੀ ਸਭ ਤੋਂ ਤਜਰਬੇਕਾਰ ਤੀਰਅੰਦਾਜ਼ ਦੀਪਿਕਾ ਕੁਮਾਰੀ ਨੇ ਇਕ ਵਾਰ ਫਿਰ ਨਿਰਾਸ਼ ਕੀਤਾ ਅਤੇ ਉਸ ਦੇ ਖਰਾਬ ਪ੍ਰਦਰਸ਼ਨ ਕਾਰਨ ਭਾਰਤੀ ਮਹਿਲਾ ਤੀਰਅੰਦਾਜ਼ੀ ਟੀਮ ਐਤਵਾਰ ਨੂੰ ਕੁਆਰਟਰ ਫਾਈਨਲ 'ਚ ਨੀਦਰਲੈਂਡ ਤੋਂ 0.6 ਨਾਲ ਹਾਰ ਕੇ ਪੈਰਿਸ ਓਲੰਪਿਕ ਤੋਂ ਬਾਹਰ ਹੋ ਗਈ। ਭਾਰਤੀ ਟੀਮ ਦੀ ਸਭ ਤੋਂ ਘੱਟ ਉਮਰ ਦੀ ਖਿਡਾਰਨ ਹਰਿਆਣਾ ਦੀ 18 ਸਾਲਾ ਭਜਨ ਕੌਰ ਨੇ 60 ਵਿੱਚੋਂ 56 ਅੰਕ ਬਣਾਏ ਪਰ ਦੀਪਿਕਾ ਅਤੇ ਅੰਕਿਤਾ ਭਗਤ ਵਰਗੀਆਂ ਤਜਰਬੇਕਾਰ ਖਿਡਾਰਨਾਂ ਕਮਜ਼ੋਰ ਕੜੀ ਸਾਬਤ ਹੋਈਆਂ। ਦੋਵਾਂ ਦਾ ਸਕੋਰ 50 ਦੇ ਕੋਲ ਵੀ ਨਹੀਂ ਰਿਹਾ। ਭਾਰਤੀ ਟੀਮ 51.52, 49.54, 48.53 ਨਾਲ ਹਾਰ ਗਈ।
ਚੌਥੀ ਵਾਰ ਓਲੰਪਿਕ 'ਚ ਦਾਖਲ ਹੋਣ ਵਾਲੀ ਦੀਪਿਕਾ ਨੇ 48 ਅੰਕ ਅਤੇ ਭਗਤ ਨੇ 46 ਅੰਕ ਬਣਾਏ। ਭਗਤ ਨੇ ਇੱਕ ਵਾਰ ਚਾਰ ਦੇ ਰਿੰਗ ਵਿੱਚ ਇੱਕ ਤੀਰ ਵੀ ਛੱਡਿਆ। ਦੂਜੇ ਪਾਸੇ ਭਜਨ ਨੇ 56 ਅੰਕ ਬਣਾਏ। ਭਾਰਤ ਨੇ ਕੁਆਲੀਫਿਕੇਸ਼ਨ ਵਿੱਚ ਚੌਥੇ ਸਥਾਨ ’ਤੇ ਰਹਿ ਕੇ ਸਿੱਧੇ ਕੁਆਰਟਰ ਫਾਈਨਲ ਵਿੱਚ ਥਾਂ ਬਣਾ ਲਈ ਸੀ। ਭਾਰਤੀ ਤੀਰਅੰਦਾਜ਼ੀ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਕਿ ਇਸ ਦੀ ਉਮੀਦ ਨਹੀਂ ਸੀ। ਦੀਪਿਕਾ ਨੇ ਟਰਾਇਲਾਂ 'ਚ ਬਿਹਤਰੀਨ ਪ੍ਰਦਰਸ਼ਨ ਕੀਤਾ ਸੀ ਪਰ ਉਸ ਦੇ ਖਰਾਬ ਪ੍ਰਦਰਸ਼ਨ ਦਾ ਭਾਰਤੀ ਟੀਮ 'ਤੇ ਅਸਰ ਪਿਆ। ਭਾਰਤੀ ਟੀਮ ਨੇ ਪਿਛਲੇ ਮਹੀਨੇ ਅੰਤਾਲੀਆ ਵਿਸ਼ਵ ਕੱਪ ਵਿੱਚ ਇਸੇ ਡੱਚ ਟੀਮ ਨੂੰ 6.2 ਨਾਲ ਹਰਾਇਆ ਸੀ। ਅਧਿਕਾਰੀ ਨੇ ਕਿਹਾ ਕਿ ਇਹ ਟੀਮ ਦੀ ਅਸਫਲਤਾ ਹੈ ਪਰ ਦੀਪਿਕਾ ਨੂੰ ਜ਼ਿੰਮੇਵਾਰੀ ਲੈਣੀ ਹੋਵੇਗੀ ਅਤੇ ਓਲੰਪਿਕ 'ਚ ਹਰ ਵਾਰ ਦੀ ਤਰ੍ਹਾਂ ਭਾਰਤ ਨੂੰ ਇਸ ਤਰ੍ਹਾਂ ਸ਼ਰਮਿੰਦਾ ਕਰਨ ਤੋਂ ਬਚਣਾ ਹੋਵੇਗਾ।
ਭਾਰਤੀ ਮਹਿਲਾ ਟੀਮ ਦੀ ਕੋਚ ਪੂਰਨਿਮਾ ਮਹਤੋ ਨੇ ਕਿਹਾ ਕਿ ਤਜਰਬੇਕਾਰ ਤੀਰਅੰਦਾਜ਼ ਹੋਣ ਦੇ ਨਾਤੇ ਉਸ ਨੂੰ ਮਾਨਸਿਕ ਤੌਰ 'ਤੇ ਮਜ਼ਬੂਤ ਖੇਡਣਾ ਚਾਹੀਦਾ ਸੀ। ਉਮੀਦ ਕੀਤੀ ਜਾਂਦੀ ਹੈ ਕਿ ਉਹ ਮਿਸ਼ਰਤ ਅਤੇ ਵਿਅਕਤੀਗਤ ਵਰਗਾਂ ਵਿੱਚ ਚੰਗਾ ਪ੍ਰਦਰਸ਼ਨ ਕਰਨਗੇ। ਅੰਕਿਤਾ ਧੀਰਜ ਬੋਮਾਦੇਵਰਾ ਦੇ ਨਾਲ ਮਿਕਸਡ ਟੀਮ ਵਿੱਚ ਮੈਦਾਨ ਵਿੱਚ ਉਤਰੇਗੀ। ਭਾਰਤੀ ਪੁਰਸ਼ ਟੀਮ ਸੋਮਵਾਰ ਨੂੰ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਕਰੇਗੀ।
