ਬੋਲਟ ਯੁੱਗ ਦੇ ਬਾਅਦ ਡਾਇਮੰਡ ਲੀਗ ''ਚ ਨਜ਼ਰਾਂ ਕੋਲਮੈਨ ''ਤੇ

ਲੰਡਨ— ਉਸੇਨ ਬੋਲਟ ਦੇ ਸੰਨਿਆਸ ਦੇ ਬਾਅਦ ਵਿਸ਼ਵ ਇੰਡੋਰ 60 ਮੀਟਰ ਚੈਂਪੀਅਨ ਕ੍ਰਿਸਟੀਅਨ ਕੋਲਮੈਨ ਦੇ ਕੋਲ ਸ਼ਨੀਵਾਰ ਤੋਂ ਸ਼ੁਰੂ ਹੋ ਰਹੀ ਲੰਡਨ ਡਾਇਮੰਡ ਲੀਗ 'ਚ ਫਰਾਟਾ ਦੌੜ 'ਚ ਆਪਣੀ ਛਾਪ ਛੱਡਣ ਦਾ ਸੁਨਹਿਰੀ ਮੌਕਾ ਹੋਵੇਗਾ। ਪਿਛਲੇ ਸਾਲ ਅਗਸਤ 'ਚ ਲੰਡਨ ਸਟੇਡੀਅਮ 'ਚ ਵਿਸ਼ਵ ਚੈਂਪੀਅਨਸ਼ਿਪ ਸੈਮੀਫਾਈਨਲ 'ਚ ਅਮਰੀਕਾ ਦੇ ਇਸ 22 ਸਾਲਾਂ ਦੇ ਦੌੜਾਕ ਨੇ 100 ਮੀਟਰ 'ਚ ਬੋਲਟ ਦੀ ਚਾਰ ਸਾਲ ਦੀ ਅਜੇਤੂ ਮੁਹਿੰਮ 'ਤੇ ਰੋਕ ਲਗਾਈ ਸੀ। ਮੈਰਿਸ ਗ੍ਰੀਨ ਦਾ 19 ਸਾਲਾ ਪੁਰਾਣਾ ਵਿਸ਼ਵ ਇੰਡੋਰ ਰਿਕਾਰਡ ਫਰਵਰੀ 'ਚ ਤੋੜਨ ਦੇ ਬਾਅਦ ਹੁਣ ਕੋਲਮੈਨ ਦੀਆਂ ਨਜ਼ਰਾਂ 100 ਮੀਟਰ 'ਤੇ ਹੋਣਗੀਆਂ। ਉਹ 2016 ਰੀਓ ਓਲੰਪਿਕ ਦੇ ਬਾਅਦ ਤੋਂ 100 ਮੀਟਰ 'ਚ ਦੁਨੀਆ ਦੇ ਸਭ ਤੋਂ ਤੇਜ਼ ਦੌੜਾਕ ਹਨ। 

ਪਿਛਲੇ ਸਾਲ ਉਨ੍ਹਾਂ ਨੇ ਅਮਰੀਕਾ 'ਚ 9.82 ਸਕਿੰਟ ਦਾ ਰਿਕਾਰਡ ਬਣਾਇਆ ਸੀ। ਸੌ ਮੀਟਰ 'ਚ ਅਮਰੀਕਾ ਦੇ ਕੈਮਰਨ ਬੁਰੇਲ, 2011 ਦੇ ਵਿਸ਼ਵ ਚੈਂਪੀਅਨ ਯੋਹਾਨ ਬਲੈਕ, ਦੱਖਣੀ ਅਫਰੀਕਾ ਦੇ ਰਾਸ਼ਟਰਮੰਡਲ ਖਿਤਾਬ ਜੇਤੂ ਅਕਾਨੀ ਸਿਮਬਾਈਨ ਅਤੇ ਬ੍ਰਿਟੇਨ ਦੇ ਰੀਸੇ ਪ੍ਰੇਸਕੋਡ ਸ਼ਾਮਲ ਹਨ। ਪੁਰਸ਼ਾਂ ਦੀ 400 ਮੀਟਰ ਦੌੜ 'ਚ ਗ੍ਰੇਨਾਡਾ ਦੇ ਕਿਰਾਨੀ ਜੇਮਸ ਦੀ ਵਾਪਸੀ ਹੋਵੇਗੀ ਜਿਨ੍ਹਾਂ ਨੇ ਓਲੰਪਿਕ 'ਚ ਸੋਨ ਤਮਗਾ ਜਿੱਤਿਆ ਸੀ। ਮਹਿਲਾਵਾਂ ਦੀ 200 ਮੀਟਰ 'ਚ ਜਮੈਕਾ ਦੀ ਓਲੰਪਿਕ ਚੈਂਪੀਅਨ ਐਲੇਨ ਥਾਮਪਸਨ ਅਤੇ ਨੀਦਰਲੈਂਡ ਦੀ ਵਿਸ਼ਵ ਚੈਂਪੀਅਨ ਡਾਫਨੇ ਸ਼ਿਪਰਸ 'ਤੇ ਸਾਰਿਆਂ ਦੀਆਂ ਨਜ਼ਰਾਂ ਹੋਣਗੀਆਂ।