ਓ ਬੱਲੇ...! Bowler ਨੇ 24 ਗੇਂਦਾਂ 'ਚ 7 ਸਕੋਰ ਦੇ ਕੇ ਕੀਤੇ 8 OUT, ਤੋੜੇ ਕਈ ਰਿਕਾਰਡ

ਗੇਲੇਫੂ (ਭੂਟਾਨ): ਕ੍ਰਿਕਟ ਦੇ ਮੈਦਾਨ ਤੋਂ ਇੱਕ ਹੈਰਾਨੀਜਨਕ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ ਭੂਟਾਨ ਦੇ ਗੇਂਦਬਾਜ਼ ਸੋਨਮ ਯੇਸ਼ੇ ਨੇ ਅੰਤਰਰਾਸ਼ਟਰੀ ਟੀ-20 ਕ੍ਰਿਕਟ ਵਿੱਚ ਉਹ ਕਾਰਨਾਮਾ ਕਰ ਦਿਖਾਇਆ ਹੈ ਜੋ ਅੱਜ ਤੱਕ ਦੁਨੀਆ ਦਾ ਕੋਈ ਵੀ ਵੱਡਾ ਗੇਂਦਬਾਜ਼ ਨਹੀਂ ਕਰ ਸਕਿਆ। ਸੋਨਮ ਟੀ-20 ਅੰਤਰਰਾਸ਼ਟਰੀ ਦੀ ਇੱਕ ਪਾਰੀ ਵਿੱਚ 8 ਵਿਕਟਾਂ ਲੈਣ ਵਾਲੇ ਦੁਨੀਆ ਦੇ ਪਹਿਲੇ ਗੇਂਦਬਾਜ਼ ਬਣ ਗਏ ਹਨ। ਉਨ੍ਹਾਂ ਨੇ ਇਹ ਇਤਿਹਾਸਕ ਉਪਲਬਧੀ 26 ਦਸੰਬਰ 2025 ਨੂੰ ਮਿਆਂਮਾਰ ਦੇ ਖ਼ਿਲਾਫ਼ ਖੇਡੇ ਗਏ ਮੈਚ ਵਿੱਚ ਹਾਸਲ ਕੀਤੀ।

ਸਿਰਫ਼ 7 ਦੌੜਾਂ ਦੇ ਕੇ ਝਟਕਾਈਆਂ 8 ਵਿਕਟਾਂ 
ਖੱਬੇ ਹੱਥ ਦੇ ਆਰਥੋਡਾਕਸ ਸਪਿਨਰ ਸੋਨਮ ਯੇਸ਼ੇ ਨੇ ਮਿਆਂਮਾਰ ਦੇ ਬੱਲੇਬਾਜ਼ਾਂ 'ਤੇ ਅਜਿਹਾ ਕਹਿਰ ਵਰ੍ਹਾਇਆ ਕਿ ਉਨ੍ਹਾਂ ਦੀ ਪੂਰੀ ਟੀਮ ਤਾਸ਼ ਦੇ ਪੱਤਿਆਂ ਵਾਂਗ ਬਿਖਰ ਗਈ। ਸੋਨਮ ਨੇ ਆਪਣੇ 4 ਓਵਰਾਂ ਦੇ ਸਪੈੱਲ ਵਿੱਚ ਇੱਕ ਮੇਡਨ ਓਵਰ ਸੁੱਟਦਿਆਂ ਮਹਿਜ਼ 7 ਦੌੜਾਂ ਦਿੱਤੀਆਂ ਅਤੇ 8 ਵਿਕਟਾਂ ਆਪਣੇ ਨਾਮ ਕੀਤੀਆਂ। ਇਸ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਉਨ੍ਹਾਂ ਨੇ ਮਲੇਸ਼ੀਆ ਦੇ ਸਿਆਜ਼ਰੁਲ ਇਦਰਸ (7 ਵਿਕਟਾਂ) ਦਾ ਵਿਸ਼ਵ ਰਿਕਾਰਡ ਤੋੜ ਦਿੱਤਾ ਹੈ।

ਮਿਆਂਮਾਰ ਦੀ ਟੀਮ 45 ਦੌੜਾਂ 'ਤੇ ਢੇਰ 
ਭੂਟਾਨ ਦੇ ਗੇਲੇਫੂ ਅੰਤਰਰਾਸ਼ਟਰੀ ਕ੍ਰਿਕਟ ਸਟੇਡੀਅਮ ਵਿੱਚ ਖੇਡੇ ਗਏ ਇਸ ਮੈਚ ਵਿੱਚ ਭੂਟਾਨ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 20 ਓਵਰਾਂ ਵਿੱਚ 127 ਦੌੜਾਂ ਬਣਾਈਆਂ ਸਨ। ਜਵਾਬ ਵਿੱਚ 128 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਮਿਆਂਮਾਰ ਦੀ ਟੀਮ ਸੋਨਮ ਦੀ ਘਾਤਕ ਗੇਂਦਬਾਜ਼ੀ ਅੱਗੇ ਗੋਡੇ ਟੇਕ ਗਈ ਅਤੇ ਪੂਰੀ ਟੀਮ 9.2 ਓਵਰਾਂ ਵਿੱਚ ਮਹਿਜ਼ 45 ਦੌੜਾਂ 'ਤੇ ਸਿਮਟ ਗਈ। ਭੂਟਾਨ ਨੇ ਇਹ ਮੈਚ ਜਿੱਤ ਕੇ ਪੰਜ ਮੈਚਾਂ ਦੀ ਸੀਰੀਜ਼ ਵਿੱਚ 3-0 ਦੀ ਅਜੇਤੂ ਬੜ੍ਹਤ ਬਣਾ ਲਈ ਹੈ।

ਟੀ-20 ਅੰਤਰਰਾਸ਼ਟਰੀ ਵਿੱਚ ਇਕ ਪਾਰੀ ਵਿਚ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼:
1. ਸੋਨਮ ਯੇਸ਼ੇ (ਭੂਟਾਨ): 8 ਵਿਕਟਾਂ
2. ਸਿਆਜ਼ਰੁਲ ਇਦਰਸ (ਮਲੇਸ਼ੀਆ): 7 ਵਿਕਟਾਂ
3. ਅਲੀ ਦਾਊਦ (ਬਹਿਰੀਨ): 7 ਵਿਕਟਾਂ

ਇਹ ਪ੍ਰਦਰਸ਼ਨ ਕ੍ਰਿਕਟ ਇਤਿਹਾਸ ਵਿੱਚ ਉਸ ਸੁਨਾਮੀ ਵਾਂਗ ਸੀ ਜਿਸ ਨੇ ਵਿਰੋਧੀ ਟੀਮ ਦੇ ਬੱਲੇਬਾਜ਼ੀ ਦੇ ਕਿਲ੍ਹੇ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰ ਦਿੱਤਾ।