ਲਾ ਲੀਗਾ ''ਚ ਬਾਰਸੀਲੋਨਾ ਨੇ ਓਵਿਏਡੋ ਤੇ ਐਟਲੋਟਿਕੋ ਨੇ ਮਾਲੋਕਰ ਨੂੰ ਹਰਾਇਆ

ਮੈਡਰਿਡ- ਸਪੇਨੀ ਫੁੱਟਬਾਲ ਲੀਗ 'ਲਾ ਲੀਗਾ' ਵਿੱਚ ਦਿੱਗਜ ਕਲੱਬਾਂ ਦਾ ਦਬਦਬਾ ਜਾਰੀ ਹੈ। ਤਾਜ਼ਾ ਮੁਕਾਬਲਿਆਂ ਵਿੱਚ ਐਫਸੀ ਬਾਰਸੀਲੋਨਾ ਅਤੇ ਐਟਲੈਟਿਕੋ ਮੈਡਰਿਡ ਨੇ ਆਪਣੇ-ਆਪਣੇ ਮੈਚਾਂ ਵਿੱਚ 3-0 ਦੀਆਂ ਆਸਾਨ ਜਿੱਤਾਂ ਦਰਜ ਕੀਤੀਆਂ ਹਨ। ਇਨ੍ਹਾਂ ਜਿੱਤਾਂ ਨਾਲ ਬਾਰਸੀਲੋਨਾ ਅੰਕ ਸੂਚੀ ਵਿੱਚ ਪਹਿਲੇ ਸਥਾਨ 'ਤੇ ਬਣੀ ਹੋਈ ਹੈ, ਜਦਕਿ ਐਟਲੈਟਿਕੋ ਮੈਡਰਿਡ ਤੀਜੇ ਸਥਾਨ 'ਤੇ ਪਹੁੰਚ ਗਈ ਹੈ।

ਬਾਰਸੀਲੋਨਾ ਬਨਾਮ ਓਵਿਏਡੋ ਮੁਕਾਬਲਾ
ਬਾਰਸੀਲੋਨਾ ਅਤੇ ਓਵਿਏਡੋ ਵਿਚਾਲੇ ਖੇਡੇ ਗਏ ਮੈਚ ਦਾ ਪਹਿਲਾ ਅੱਧ ਕਾਫੀ ਸੰਘਰਸ਼ਪੂਰਨ ਰਿਹਾ ਅਤੇ 45 ਮਿੰਟ ਤੱਕ ਕੋਈ ਵੀ ਟੀਮ ਗੋਲ ਨਹੀਂ ਕਰ ਸਕੀ। ਪਰ ਦੂਜੇ ਅੱਧ ਵਿੱਚ ਬਾਰਸੀਲੋਨਾ ਨੇ ਹਮਲਾਵਰ ਖੇਡ ਦਿਖਾਈ। 52ਵੇਂ ਮਿੰਟ ਵਿਚ  ਡੈਨੀ ਓਲਮੋ ਨੇ ਸ਼ਾਨਦਾਰ ਸ਼ਾਟ ਨਾਲ ਗੋਲ ਕਰਕੇ ਗਤੀਰੋਧ ਤੋੜਿਆ। 56ਵੇਂ ਮਿੰਟ ਵਿਚ ਵਿਰੋਧੀ ਟੀਮ ਦੀ ਗਲਤੀ ਦਾ ਫਾਇਦਾ ਉਠਾਉਂਦੇ ਹੋਏ ਰਾਫਿਨਹਾ ਨੇ ਬੜ੍ਹਤ ਨੂੰ ਦੁੱਗਣਾ ਕਰ ਦਿੱਤਾ। ਅੰਤਿਮ ਗੋਲ 'ਚ ਲਾਮਿਨ ਯਾਮਲ ਨੇ ਇੱਕ ਸ਼ਾਨਦਾਰ ਓਵਰਹੈੱਡ ਕਿੱਕ ਰਾਹੀਂ ਗੋਲ ਕਰਕੇ ਬਾਰਸੀਲੋਨਾ ਦੀ 3-0 ਨਾਲ ਜਿੱਤ ਪੱਕੀ ਕਰ ਦਿੱਤੀ।

ਐਟਲੈਟਿਕੋ ਮੈਡਰਿਡ ਅਤੇ ਹੋਰ ਮੁਕਾਬਲੇ 
ਐਟਲੈਟਿਕੋ ਮੈਡਰਿਡ ਨੇ ਵੀ ਘਰੇਲੂ ਮੈਦਾਨ 'ਤੇ ਖੇਡਦਿਆਂ ਮਾਲੋਰਕਾ ਨੂੰ 3-0 ਨਾਲ ਮਾਤ ਦਿੱਤੀ। ਅਲੇਕਜ਼ੈਂਡਰ ਸੋਰਲੌਥ ਨੇ 22ਵੇਂ ਮਿੰਟ ਵਿੱਚ ਪਹਿਲਾ ਗੋਲ ਕੀਤਾ, ਜਿਸ ਤੋਂ ਬਾਅਦ ਡੇਵਿਡ ਲੋਪੇਜ਼ (75ਵਾਂ ਮਿੰਟ) ਅਤੇ ਥੀਆਗੋ ਅਲਮਾਡਾ (87ਵਾਂ ਮਿੰਟ) ਨੇ ਗੋਲ ਕੀਤੇ। ਇੱਕ ਹੋਰ ਮੈਚ ਵਿੱਚ ਰੀਅਲ ਸੋਸੀਦਾਦ ਨੇ ਸੇਲਟਾ ਵਿਗੋ ਨੂੰ 3-1 ਨਾਲ ਹਰਾਇਆ, ਜਿਸ ਵਿੱਚ ਮਿਕਲ ਓਯਾਰਜ਼ਾਬਲ ਨੇ ਦੋ ਗੋਲ ਕੀਤੇ। ਅਲਾਵੇਸ ਨੇ ਵੀ ਬੇਟਿਸ ਨੂੰ 2-1 ਨਾਲ ਹਰਾ ਕੇ ਰੇਲੀਗੇਸ਼ਨ ਜ਼ੋਨ (ਬੌਟਮ ਥ੍ਰੀ) ਤੋਂ ਬਾਹਰ ਨਿਕਲਣ ਵਿੱਚ ਸਫਲਤਾ ਹਾਸਲ ਕੀਤੀ।