ਬਠਿੰਡਾ : ਨਹੀਂ ਰੀਸਾਂ ਇਸ ਬਾਬੇ ਦੀਆਂ, ਲੱਕੜ ਦਾ ਬਣਾ 'ਤਾ ਸਾਈਕਲ (ਵੀਡੀਓ)

ਤਲਵੰਡੀ ਸਾਬੋ (ਮਨੀਸ਼) : ਕਹਿੰਦੇ ਹਨ ਕਿ ਸ਼ੌਕ ਦਾ ਕੋਈ ਮੁੱਲ ਨਹੀਂ ਹੁੰਦਾ ਤੇ ਨਾ ਹੀ ਸ਼ੌਕ ਪੁਗਾਉਣ ਦੀ ਕੋਈ ਉਮਰ ਹੁੰਦੀ ਹੈ ਤੇ ਇਸ ਗੱਲ ਨੂੰ ਸਾਬਿਤ ਕੀਤਾ ਹੈ ਬਠਿੰਡਾ ਪਿੰਡ ਤੁੰਗਵਾਲੀ ਦੇ ਕਿਸਾਨ ਗੁਰਚਰਨ ਸਿੰਘ ਨੇ, ਜਿਸ ਦੇ ਚਰਚੇ ਇਕੱਲੇ ਇਲਾਕੇ 'ਚ ਹੀ ਨਹੀਂ, ਸਗੋਂ ਸੋਸ਼ਲ ਮੀਡੀਆ ਤੱਕ ਹੋ ਰਹੇ ਹਨ।

ਦਰਅਸਲ ਪੇਸ਼ੇ ਵਜੋਂ ਕਿਸਾਨ ਗੁਰਚਰਨ ਸਿੰਘ ਨੇ ਇਕ ਲੱਕੜ ਦਾ ਸਾਇਕਲ ਬਣਾਇਆ ਹੈ। ਕਿਸਾਨ ਨੇ ਦੱਸਿਆ ਕਿ ਇਸ ਸਾਈਕਲ ਨੂੰ ਤਿਆਰ ਕਰਨ ਦਾ ਮਕਸਦ ਅੱਜ-ਕੱਲ ਦੇ ਬੱਚਿਆਂ ਨੂੰ ਸਾਈਕਲ ਚਲਾਉਣ ਲਈ ਪ੍ਰੇਰਿਤ ਕਰਨਾ ਸੀ ਤੇ ਇਸ ਦੇ ਲਈ ਉਹ ਬੱਚਿਆਂ ਨੂੰ ਕੁਝ ਵੱਖਰਾ ਕਰ ਕੇ ਦੇਣਾ ਚਾਹੁੰਦੇ ਸਨ। ਉਨ੍ਹਾਂ ਅੱਗੇ ਦੱਸਿਆ ਕਿ ਲੱਕੜ ਦਾ ਪਹਿਲਾ ਸਾਈਕਲ ਤਿਆਰ ਕਰਨ ਲਈ ਉਨ੍ਹਾਂ ਨੂੰ ਕਾਫੀ ਦਿਨ ਲੱਗ ਗਏ ਤੇ ਲੱਕੜ ਵੀ ਕਾਫੀ ਵੇਸਟ ਹੋਈ ਪਰ ਹੁਣ ਉਹ 2-3 ਦਿਨ 'ਚ ਸਾਈਕਲ ਤਿਆਰ ਕਰ ਲੈਂਦੇ ਹਨ।

ਲੱਕੜ ਦੇ ਇਸ ਸਾਈਕਲ ਨੂੰ ਵੇਖਣ ਲਈ ਜਿਥੇ ਆਸ-ਪਾਸ ਦੇ ਲੋਕ ਲਗਾਤਾਰ ਆ ਰਹੇ ਹਨ, ਉਥੇ ਹੀ ਲੋਕਾਂ ਵਲੋਂ ਸਾਈਕਲ ਬਣਾਉਣ ਦੇ ਆਰਡਰ ਵੀ ਆਉਣ ਲੱਗੇ ਹਨ। ਦੱਸ ਦੇਈਏ ਕਿ ਫਸਲੀ ਚੱਕਰ 'ਚੋਂ ਨਿਕਲ ਸਹਾਇਕ ਧੰਦੇ ਅਪਣਾਉਣ ਵਾਲਾ ਗੁਰਚਰਨ ਸਿੰਘ ਸ਼ਹਿਦ ਦੇ ਕੰਮ 'ਚ ਵੀ ਕਾਫੀ ਨਾਮਨਾਂ ਖੱਟ ਚੁੱਕੇ ਹਨ ਤੇ ਕਿਸਾਨਾਂ ਲਈ ਮਿਸਾਲ ਬਣੇ ਹੋਏ ਹਨ।