ਆਰ. ਟੀ. ਏ. ਦਫ਼ਤਰ ''ਚ ''ਕਰੇ ਕੋਈ, ਭਰੇ ਕੋਈ'' ਵਾਲੀ ਕਹਾਵਤ ਹੋਈ ਸੱਚ
Thursday, Feb 07, 2019 - 11:43 AM (IST)
ਜਲੰਧਰ (ਅਮਿਤ) - 'ਕਰੇ ਕੋਈ, ਭਰੇ ਕੋਈ' ਵਾਲੀ ਕਹਾਵਤ ਆਰ. ਟੀ. ਏ. ਦਫ਼ਤਰ 'ਚ ਉਸ ਸਮੇਂ ਸਹੀ ਸਾਬਤ ਹੋਈ ਜਦੋਂ 1 ਕਲਰਕ ਦੀ ਗਲਤੀ ਦੀ ਸਜ਼ਾ ਬਾਕੀ ਦੇ 9 ਕਲਰਕਾਂ ਨੂੰ ਭੁਗਤਣੀ ਪਈ। ਹਾਲਾਂਕਿ ਕਲਰਕਾਂ ਨੂੰ ਥੋੜ੍ਹੇ ਸਮੇਂ 'ਚ ਰਾਹਤ ਮਿਲ ਗਈ ਸੀ ਪਰ ਕੁਝ ਸਮੇਂ ਤੱਕ ਪੂਰੇ ਦਫ਼ਤਰ 'ਚ ਤਣਾਅ ਵਾਲਾ ਮਾਹੌਲ ਜ਼ਰੂਰ ਦੇਖਣ ਨੂੰ ਮਿਲਿਆ। ਮਿਲੀ ਜਾਣਕਾਰੀ ਅਨੁਸਾਰ ਆਰ. ਟੀ. ਏ. ਦਫ਼ਤਰ 'ਚ ਤਾਇਨਾਤ ਪ੍ਰਦੀਪ ਕੁਮਾਰ ਨਾਂ ਦੇ ਕਲਰਕ ਦੀ ਸੈਲਰੀ ਅਟੈਚ ਕਰਨ ਲਈ ਮਾਣਯੋਗ ਅਦਾਲਤ ਵਲੋਂ ਕੁਝ ਦਿਨ ਪਹਿਲਾਂ ਹੁਕਮ ਜਾਰੀ ਕੀਤਾ ਗਿਆ ਸੀ। ਜਿਸ ਦੀ ਤਾਮੀਲ ਕਰਦੇ ਸਮੇਂ ਕਈ ਕਰਮਚਾਰੀਆਂ ਨੂੰ ਵੀ ਥੋੜ੍ਹੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ, ਕਿਉਂਕਿ ਖਜ਼ਾਨਾ ਦਫ਼ਤਰ 'ਚ ਜੋ ਬਿੱਲ ਸਬਮਿਟ ਕੀਤਾ ਜਾਂਦਾ ਹੈ, ਉਹ ਸਾਰੇ ਕਰਮਚਾਰੀਆਂ ਦਾ ਇਕੱਠਾ ਭੇਜਿਆ ਜਾਂਦਾ ਹੈ। ਅਜਿਹੇ 'ਚ ਜਦੋਂ ਤੱਕ ਅਦਾਲਤ ਵਲੋਂ ਸੈਲਰੀ ਅਟੈਚ ਕੀਤੀ ਜਾਣ ਵਾਲੇ ਕਲਰਕ ਦਾ ਬਿੱਲ ਵੱਖ ਨਹੀਂ ਭੇਜਿਆ ਗਿਆ ਉਦੋਂ ਤੱਕ ਬਾਕੀ ਦੇ ਕਲਰਕਾਂ ਦੀ ਸੈੱਲਰੀ ਵੀ ਉਨ੍ਹਾਂ ਦੇ ਖਾਤੇ 'ਚ ਨਹੀਂ ਜਾ ਸਕੀ। ਪ੍ਰਦੀਪ ਕੁਮਾਰ ਕੋਲ ਆਰ. ਸੀ. ਟਰਾਂਸਫਰ ਦਾ ਕੰਮਕਾਜ ਹੈ, ਜਿਸ ਕਾਰਨ ਕਈ ਵਾਰ ਉਸ ਨੂੰ ਅਦਾਲਤਾਂ ਤੋਂ ਸੰਮਨ ਆਉਂਦੇ ਰਹਿੰਦੇ ਹਨ ਪਰ ਪਤਾ ਨਹੀਂ ਕਿਸ ਕਾਰਨ ਉਹ ਅਦਾਲਤ 'ਚ ਨਹੀਂ ਜਾਂਦਾ ਸੀ। ਅਜਿਹੇ ਹੀ ਇਕ ਹੋਰ ਮਾਮਲੇ 'ਚ ਉਹ ਅਦਾਲਤ ਨਹੀਂ ਗਿਆ, ਜਿਸ ਤੋਂ ਬਾਅਦ ਮਾਣਯੋਗ ਅਦਾਲਤ ਨੇ ਉਸਦੀ ਸੈਲਰੀ ਅਟੈਚ ਕਰਨ ਦਾ ਹੁਕਮ ਜਾਰੀ ਕਰ ਦਿੱਤਾ। ਇਸ ਸਬੰਧੀ ਜਦੋਂ ਕਲਰਕ ਪ੍ਰਦੀਪ ਕੁਮਾਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਨੇ ਜਵਾਬ ਦੇਣ ਤੋਂ ਸਾਫ ਇਨਕਾਰ ਕਰ ਦਿੱਤਾ ਅਤੇ ਕਿਹਾ ਕਿ ਉਹ ਇਸ ਮਾਮਲੇ ਦੇ ਸਬੰਧ 'ਚ ਸਵੇਰੇ ਗੱਲ ਕਰਨਗੇ।
ਸਾਰਾ ਦਿਨ ਸ਼ਰਾਬ ਪੀ ਕੇ ਦਫ਼ਤਰ ਵਿਚ ਬੈਠਣ ਦੇ ਲੱਗ ਚੁੱਕੇ ਹਨ ਗੰਭੀਰ ਦੋਸ਼
ਜਿਸ ਕਲਰਕ ਦੀ ਆਈ. ਡੀ. ਬਲਾਕ ਅਤੇ ਕਰਮਚਾਰੀਆਂ ਦੀ ਸੈਲਰੀ 'ਤੇ ਰੋਕ ਲੱਗਣ ਦਾ ਕਾਰਨ ਦੱਸਿਆ ਜਾ ਰਿਹਾ ਹੈ, 'ਤੇ ਸਾਰਾ ਦਿਨ ਸ਼ਰਾਬ ਪੀ ਕੇ ਦਫ਼ਤਰ 'ਚ ਬੈਠਣ ਦੇ ਗੰਭੀਰ ਦੋਸ਼ ਲੱਗ ਚੁੱਕੇ ਹਨ। ਉਕਤ ਕਲਰਕ ਨੂੰ ਕਈ ਵਾਰ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ ਪਰ ਉਹ ਇਸ ਗੱਲ ਨੂੰ ਅਣਸੁਣਿਆ ਕਰ ਦਿੰਦਾ ਹੈ।
ਤਹਿਸੀਲ ਦੇ ਕਿਸੇ ਬੂਥ 'ਚ ਨਾਜਾਇਜ਼ ਤੌਰ 'ਤੇ ਆਈ. ਡੀ. ਚਲਾਉਣ ਦੀ ਚਰਚਾ
ਕਲਰਕ ਪ੍ਰਦੀਪ ਕੁਮਾਰ ਦੀ ਆਈ. ਡੀ. ਬਲਾਕ ਹੋਣ ਤੋਂ ਪਹਿਲਾਂ ਡੀ. ਏ. ਸੀ. ਕੰਪਲੈਕਸ ਦੇ ਅੰਦਰ ਤਹਿਸੀਲ ਵਿਚ ਕਿਸੇ ਇਕ ਨਿੱਜੀ ਵਿਅਕਤੀ ਦੇ ਬੂਥ 'ਤੇ ਨਾਜਾਇਜ਼ ਤੌਰ 'ਤੇ ਚਲਾਏ ਜਾਣ ਦੀ ਚਰਚਾ ਵੀ ਬੁੱਧਵਾਰ ਨੂੰ ਸਾਰਾ ਦਿਨ ਜਾਰੀ ਰਹੀ। ਸੂਤਰਾਂ ਅਨੁਸਾਰ ਉਕਤ ਕਲਰਕ ਕੋਈ ਕੰਮ ਵੀ ਨਹੀਂ ਸੀ ਕਰਦਾ ਸਗੋਂ ਤਹਿਸੀਲ ਦੇ ਇਕ ਬੁਥ 'ਤੇ ਉਸ ਨੇ ਆਪਣੀ ਆਈ.ਡੀ.ਗਲਤ ਢੰਗ ਨਾਲ ਦਿੱਤੀ ਹੋਈ ਸੀ, ਜਿਸ 'ਚ ਸਾਰੇ ਏਜੰਟਾਂ ਦੇ ਜਾਇਜ਼ ਅਤੇ ਨਾਜਾਇਜ਼ ਕੰਮ ਕੀਤੇ ਜਾਂਦੇ ਸਨ।
