ਰਾਤ 1:42 ਵਜੇ ਬੈਂਕ ਖਾਤੇ ’ਤੇ ਸਾਈਬਰ ਹਮਲਾ: ਬਿਨਾਂ ਓ. ਟੀ. ਪੀ. ਉੱਡੇ 46 ਹਜ਼ਾਰ, 3 ਵਾਰ ’ਚ ਖਾਲੀ ਕੀਤਾ ਖਾਤਾ

ਅੰਮ੍ਰਿਤਸਰ (ਦਲਜੀਤ) : ਸ਼ਹਿਰ ’ਚ ਸਾਈਬਰ ਠੱਗੀ ਦੇ ਮਾਮਲੇ ਲਗਾਤਾਰ ਵਧ ਰਹੇ ਹਨ ਅਤੇ ਹੁਣ ਜਾਲਸਾਜ਼ਾਂ ਨੇ ਬੈਂਕਿੰਗ ਪ੍ਰਣਾਲੀ ਨੂੰ ਸਿੱਧੀ ਚੁਣੌਤੀ ਦੇਣੀ ਸ਼ੁਰੂ ਕਰ ਦਿੱਤੀ ਹੈ। ਤਾਜ਼ਾ ਮਾਮਲੇ ’ਚ ਬਿਨਾਂ ਓ. ਟੀ. ਪੀ. ਦੇ ਹੀ ਰਾਤ ਦੇ ਸਮੇਂ ਇਕ ਬੈਂਕ ਖਾਤੇ ਵਿਚੋਂ ਤਿੰਨ ਵੱਖ-ਵੱਖ ਟ੍ਰਾਂਜ਼ੈਕਸ਼ਨਾਂ ਰਾਹੀਂ ਲੱਗਭਗ 46 ਹਜ਼ਾਰ ਰੁਪਏ ਉੱਡਾ ਲਏ ਗਏ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਟ੍ਰਾਂਜ਼ੈਕਸ਼ਨ ਹੋਣ ਤੋਂ ਬਾਅਦ ਸਬੰਧਤ ਬੈਂਕ ਵੱਲੋਂ ਕਰੀਬ ਰਾਤ 2 ਵਜੇ ਫ਼ੋਨ ਕਰਕੇ ਜਾਣਕਾਰੀ ਦਿੱਤੀ ਗਈ, ਜਿਸ ਨਾਲ ਬੈਂਕ ਦੀ ਕਾਰਗੁਜ਼ਾਰੀ ’ਤੇ ਵੀ ਸਵਾਲ ਖੜ੍ਹੇ ਹੋ ਰਹੇ ਹਨ।

ਪੀੜਤ ਵਿਵੇਕ ਤਲਵਾੜ ਨੇ ਦੱਸਿਆ ਕਿ ਉਸ ਦਾ ਖਾਤਾ ਕਾਫ਼ੀ ਪੁਰਾਣਾ ਹੈ ਅਤੇ ਉਹ ਇਸ ’ਚੋਂ ਘੱਟ ਹੀ ਲੈਣ-ਦੇਣ ਕਰਦਾ ਹੈ। 24 ਅਪ੍ਰੈਲ ਦੀ ਰਾਤ ਜਦੋਂ ਉਹ ਘਰ ’ਚ ਆਰਾਮ ਕਰ ਰਿਹਾ ਸੀ, ਉਦੋਂ ਜਾਲਸਾਜ਼ਾਂ ਨੇ ਉਸ ਦੇ ਖਾਤੇ ਨੂੰ ਨਿਸ਼ਾਨਾ ਬਣਾਇਆ ਅਤੇ ਲਗਾਤਾਰ ਤਿੰਨ ਟ੍ਰਾਂਜ਼ੈਕਸ਼ਨਾਂ ਕਰ ਦਿੱਤੀਆਂ। ਵਿਵੇਕ ਅਨੁਸਾਰ ਸਭ ਤੋਂ ਪਹਿਲਾਂ ਰਾਤ 1:42 ਵਜੇ 21,500 ਰੁਪਏ ਕੱਟੇ ਗਏ। ਇਸ ਤੋਂ ਕਰੀਬ 10 ਮਿੰਟ ਬਾਅਦ ਦੂਜੀ ਵਾਰ 21,750 ਰੁਪਏ ਹੋਰ ਨਿਕਾਲ ਲਏ ਗਏ। ਇਸ ਤੋਂ ਬਾਅਦ ਵੀ ਠੱਗ ਨਹੀਂ ਰੁਕੇ ਅਤੇ 1:56 ਵਜੇ 2,000 ਰੁਪਏ ਦੀ ਤੀਜੀ ਟ੍ਰਾਂਜ਼ੈਕਸ਼ਨ ਕਰ ਦਿੱਤੀ ਗਈ। ਕੁੱਲ ਮਿਲਾ ਕੇ ਲੱਗਭਗ 45,250 ਰੁਪਏ ਦੀ ਰਕਮ ਖਾਤੇ ’ਚੋਂ ਗਾਇਬ ਹੋ ਗਈ।

ਟ੍ਰਾਂਜ਼ੈਕਸ਼ਨ ਤੋਂ ਬਾਅਦ ਆਇਆ ਬੈਂਕ ਦਾ ਫ਼ੋਨ

ਤਲਵਾੜ ਅਨੁਸਾਰ ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਇਹ ਸਾਰੀਆਂ ਟ੍ਰਾਂਜ਼ੈਕਸ਼ਨਾਂ ਹੋਣ ਤੋਂ ਬਾਅਦ ਸਬੰਧਤ ਬੈਂਕ ਵੱਲੋਂ ਕਰੀਬ ਰਾਤ 2 ਵਜੇ ਫ਼ੋਨ ਕੀਤਾ ਗਿਆ ਪਰ ਰਾਤ ਜ਼ਿਆਦਾ ਹੋਣ ਕਾਰਨ ਉਨ੍ਹਾਂ ਵੱਲੋਂ ਫ਼ੋਨ ਚੁੱਕਿਆ ਨਹੀਂ ਗਿਆ। ਇਸ ਨਾਲ ਇਹ ਸਵਾਲ ਖੜ੍ਹਾ ਹੁੰਦਾ ਹੈ ਕਿ ਜੇ ਬੈਂਕ ਨੂੰ ਸ਼ੱਕੀ ਟ੍ਰਾਂਜ਼ੈਕਸ਼ਨ ਦੀ ਜਾਣਕਾਰੀ ਸੀ ਤਾਂ ਪਹਿਲਾਂ ਹੀ ਕਦਮ ਕਿਉਂ ਨਹੀਂ ਚੁੱਕੇ ਗਏ?

ਨਾ ਓ. ਟੀ. ਪੀ. ਦਿੱਤਾ, ਨਾ ਕੋਈ ਜਾਣਕਾਰੀ : ਪੀੜਤ

ਵਿਵੇਕ ਤਲਵਾੜ ਨੇ ਸਪੱਸ਼ਟ ਕੀਤਾ ਕਿ ਉਸ ਨੇ ਕਿਸੇ ਨਾਲ ਵੀ ਆਪਣਾ ਓ. ਟੀ. ਪੀ., ਪਾਸਵਰਡ ਜਾਂ ਹੋਰ ਬੈਂਕਿੰਗ ਜਾਣਕਾਰੀ ਸਾਂਝੀ ਨਹੀਂ ਕੀਤੀ। ਉਸ ਦਾ ਕਹਿਣਾ ਹੈ ਕਿ ਇਹ ਲੈਣ-ਦੇਣ ਉਸ ਦੀ ਮਨਜ਼ੂਰੀ ਤੋਂ ਬਿਨਾਂ ਹੋਏ ਹਨ, ਜੋ ਬੈਂਕਿੰਗ ਸੁਰੱਖਿਆ ’ਚ ਵੱਡੀ ਖਾਮੀ ਨੂੰ ਦਰਸਾਉਂਦਾ ਹੈ। ਸਵੇਰੇ ਜਦੋਂ ਪੀੜਤ ਨੇ ਖਾਤੇ ਦੀ ਜਾਂਚ ਕੀਤੀ ਤਾਂ ਰਕਮ ਗਾਇਬ ਦੇਖ ਕੇ ਉਸ ਦੇ ਹੋਸ਼ ਉੱਡ ਗਏ। ਇਸ ਤੋਂ ਬਾਅਦ ਉਸ ਨੇ ਤੁਰੰਤ ਬੈਂਕ ਨਾਲ ਸੰਪਰਕ ਕੀਤਾ ਅਤੇ ਮਾਮਲੇ ਦੀ ਸ਼ਿਕਾਇਤ ਸਾਈਬਰ ਕ੍ਰਾਈਮ ਸੈੱਲ ਅੰਮ੍ਰਿਤਸਰ ’ਚ ਦਰਜ ਕਰਵਾ ਦਿੱਤੀ।

ਲੋਕਾਂ ’ਚ ਡਰ, ਪ੍ਰਣਾਲੀ ’ਤੇ ਭਰੋਸਾ ਹਿੱਲਿਆ

ਸਮਾਜ ਸੇਵਕ ਰਾਜਿੰਦਰ ਸ਼ਰਮਾ ਨੇ ਕਿਹਾ ਕਿ ਜੇ ਬਿਨਾਂ ਓ. ਟੀ. ਪੀ. ਦੇ ਹੀ ਪੈਸੇ ਨਿਕਲਣ ਲੱਗ ਪਏ ਤਾਂ ਫਿਰ ਸੁਰੱਖਿਆ ਦਾ ਕੀ ਲਾਭ? ਉਨ੍ਹਾਂ ਕਿਹਾ ਕਿ ਜਾਲਸਾਜ਼ਾਂ ਵੱਲੋਂ ਕਲੋਨਿੰਗ, ਫਿਸ਼ਿੰਗ ਜਾਂ ਡਾਟਾ ਲੀਕ ਵਰਗੇ ਤਰੀਕੇ ਵਰਤੇ ਜਾਂਦੇ ਹਨ, ਜਿਸ ਨਾਲ ਬਿਨਾਂ ਓ. ਟੀ. ਪੀ. ਦੇ ਲੈਣ-ਦੇਣ ਸੰਭਵ ਬਣ ਜਾਂਦੇ ਹਨ। ਫਿਲਹਾਲ ਮਾਮਲਾ ਸਾਈਬਰ ਸੈੱਲ ਕੋਲ ਪਹੁੰਚ ਚੁੱਕਾ ਹੈ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8