ਸੂਦਾਂ ਚੌਂਕ ’ਚ ਤੜਕਸਾਰ ਲੁਟੇਰਿਆਂ ਨੇ ਘੇਰ ਕੇ ਲੁੱਟਿਆ ਟਰੱਕ

ਮਖੂ (ਵਾਹੀ) : ਪੁਲਸ ਦੀ ਢਿੱਲਮੱਠ ਦੇ ਚੱਲਦਿਆਂ ਲਗਾਤਾਰ ਵਾਰਦਾਤਾਂ ਨੂੰ ਅੰਜਾਮ ਦਿੰਦੇ ਆ ਰਹੇ ਬੇਖੌਫ਼ ਲੁੱਟੇਰਿਆਂ ਵੱਲੋਂ ਪਿੰਡ ਸੂਦਾਂ ਨੂੰ ਜਾਂਦੇ ਚੌੰਕ ਕੋਲ ਤੜਕਸਾਰ ਪੰਜ ਤੋਂ ਸਵਾ ਪੰਜ ਵਜੇ ਦੇ ਦਰਮਿਆਨ ਤੇਜ਼ਧਾਰ ਹਥਿਆਰਾਂ ਦੀ ਨੋਕ ’ਤੇ ਜਬਰੀ ਟਰੱਕ ਰੋਕ ਕੇ ਸਮਾਨ ਲੁੱਟ ਲਿਆ ਗਿਆ। ਟਰੱਕ ਨੰਬਰ ਪੀਬੀ10ਏਬੀ9842 ਦੇ ਚਾਲਕ ਸੁਨੀਲ ਕੁਮਾਰ ਪੁੱਤਰ ਫ਼ਕੀਰ ਚੰਦ ਵਾਸੀ ਖੰਨਾ ਨੇ ਦੱਸਿਆ ਕਿ ਉਹ ਮੋਹਨਪੁਰ ਡੀਪੂ ’ਚੋਂ ਸਮਾਨ ਲੱਦ ਕੇ ਵਿਪਨ ਮੈਡੀਕਲ ਸਟੋਰ ਮਖੂ ’ਚ ਛੱਡਣ ਆ ਰਿਹਾ ਸੀ। ਇਸੇ ਦੌਰਾਨ ਸੂਦਾਂ ਚੌਂਕ ਨੇੜੇ ਬਣੇ ਫਲਾਈਓਵਰ ਕੋਲ ਮੋਟਰ ਸਾਈਕਲ ਸਵਾਰ ਲੁਟੇਰਿਆਂ ਨੇ ਜਬਰੀ ਟਰੱਕ ਰੁਕਵਾ ਲਿਆ। ਜਿਸ ਤੋਂ ਬਾਅਦ ਕਿਰਚ ਮਾਰ ਦੇਣ ਦੀਆਂ ਧਮਕੀਆਂ ਦੇ ਕੇ ਉਸ ਦਾ ਮੋਬਾਇਲ ਸੈਮਸੰਗ ਏ-50 ਖੋਹ ਲਿਆ। ਜਦਕਿ ਕੁਝ ਲੁਟੇਰਿਆਂ ਨੇ ਟਰੱਕ ਦੇ ਪਿੱਛੇ ਜਾ ਕੇ ਰੱਸੇ ਵੱਢ ਕੇ ਤਰਪਾਲ ਵੀ ਪਾੜ ਦਿੱਤੀ। 

ਪੀੜਤ ਟਰੱਕ ਚਾਲਕ ਸੁਨੀਲ ਕੁਮਾਰ ਨੇ ਦੱਸਿਆ ਕਿ ਲੁਟੇਰੇ ਵਾਰਦਾਤ ਦੌਰਾਨ ਮਹਿੰਗੀ ਸਰਫ਼ ਦੇ ਛੇ ਅਤੇ ਚਾਹ ਦੇ ਚਾਰ ਬੈਗ ਆਦਿ ਛੱਬੀ ਹਜ਼ਾਰ ਤੋਂ ਵੱਧ ਮੁੱਲ ਦਾ ਸਮਾਨ ਲੁੱਟ ਕੇ ਲੈ ਗਏ। ਦੱਸਣਯੋਗ ਹੈ ਕਿ ਕਈ ਸਾਲਾਂ ਤੋਂ ਚੋਰੀਆਂ, ਡਾਕੇ ਅਤੇ ਲੁੱਟ ਖੋਹ ਦੀਆਂ ਸੈਂਕੜੇ ਵਾਰਦਾਤਾਂ ਹੋ ਜਾਣ ਦੇ ਬਾਵਜੂਦ ਅਜੇ ਤੱਕ ਪੁਲਸ ਕਿਸੇ ਇਕ ਵੀ ਵਾਰਦਾਤ ਨੂੰ ਹੱਲ ਨਹੀਂ ਕਰ ਸਕੀ। ਜਿਸ ਕਾਰਨ ਬਦਮਾਸ਼ਾਂ ਦੇ ਹੌਸਲੇ ਲਗਾਤਾਰ ਵੱਧਦੇ ਜਾ ਰਹੇ ਹਨ। ਪੀੜਤ ਵੱਲੋਂ ਵਾਰਦਾਤ ਦੀ ਲਿਖਤੀ ਸੂਚਨਾ ਥਾਣੇ ਵਿਖੇ ਦੇ ਦਿੱਤੀ ਗਈ ਸੀ। ਭਰੋਸੇਯੋਗ ਸੂਤਰਾਂ ਅਨੁਸਾਰ ਮਾਮਲਾ ਸਥਾਨਕ ਮਾਲ ਲੁੱਟੇ ਜਾਣ ਦਾ ਹੋਣ ਕਾਰਨ ਪੁਲਸ ਵੱਲੋਂ ਕੁਝ ਸ਼ੱਕੀ ਅਨਸਰਾਂ ਨੂੰ ਕਾਬੂ ਵੀ ਕੀਤਾ ਗਿਆ ਹੈ ਪਰ ਪੁਲਸ ਅਧਿਕਾਰੀ ਅਜੇ ਕਿਸੇ ਵੀ ਲੁਟੇਰੇ ਦੇ ਫੜੇ ਜਾਣ ਦੀ ਪੁਸ਼ਟੀ ਨਹੀਂ ਕਰ ਰਹੀ।