ਪਿਤਾ ਦਾ ਸੁਪਨਾ ਕੀਤਾ ਪੂਰਾ, ਹੁਸ਼ਿਆਰਪੁਰ ਦੀ ਧੀ ਬਣੀ ਜੱਜ (ਤਸਵੀਰਾਂ)

ਹੁਸ਼ਿਆਰਪੁਰ (ਅਮਰੀਕ)— ਇਥੋਂ ਦੇ ਦਸੂਹਾ ਨਾਲ ਸੰਬੰਧ ਰੱਖਣ ਵਾਲੀ ਪੱਲਵੀ ਰਾਣਾ ਨੇ ਪੰਜਾਬ ਸਿਵਲ ਸਰਵਿਸੇਜ ਜਿਊਡੀਸ਼ਰੀ ਦੀ ਪ੍ਰੀਖਿਆ 'ਚ ਜਨਰਲ ਕੈਟੇਗਿਰੀ 'ਚ 13ਵਾਂ ਸਥਾਨ ਹਾਸਲ ਕਰਕੇ ਮਾਤਾ-ਪਿਤਾ ਦਾ ਨਾਂ ਰੌਸ਼ਨ ਕੀਤਾ ਹੈ। ਜੱਜ ਬਣਨ ਜਾ ਰਹੀ ਪੱਲਵੀ ਰਾਣਾ ਦੇ ਪਿਤਾ ਮਲਕੀਤ ਸਿੰਘ ਰਾਣਾ ਏ. ਡੀ. ਜੇ. ਹੁਸ਼ਿਆਰਪੁਰ ਦੇ ਰੀਡਰ ਦੇ ਰੂਪ 'ਚ ਕੰਮ ਕਰਦੇ ਹਨ ਅਤੇ ਮਾਤਾ ਪੁਸ਼ਪਾ ਰਾਣੀ ਘਰੇਲੂ ਪਤਨੀ ਹੈ। ਪੱਲਵੀ ਦਾ ਭਰਾ ਮਿਤੁਲ ਸਿੰਘ ਰਾਣਾ ਹੁਸ਼ਿਆਰਪੁਰ ਤੋਂ ਵਕਾਲਤ ਕਰ ਰਿਹਾ ਹੈ।

ਪਰਿਵਾਰ ਦੇ ਸਾਥ ਨੇ ਇਥੋਂ ਤੱਕ ਪਹੁੰਚਾਇਆ
ਪੱਲਵੀ ਨੇ ਦੱਸਿਆ ਕਿ ਉਸ ਦੇ ਪਰਿਵਾਰ ਦਾ ਸਾਥ ਹੀ ਉਸ ਨੂੰ ਇਥੋਂ ਤੱਕ ਲੈ ਕੇ ਆਇਆ ਹੈ। ਉਸ ਨੇ ਦੱਸਿਆ ਕਿ ਉਹ ਸ਼ੁਰੂ ਤੋਂ ਹੀ 10 ਤੋਂ 12 ਘੰਟੇ ਪੜ੍ਹਾਈ ਕਰਦੀ ਰਹੀ ਹੈ। ਮਿਹਨਤ ਦੇ ਨਾਲ-ਨਾਲ ਕਿਸਮਤ ਦਾ ਸਾਥ ਮਿਲਣਾ ਸਫਲਤਾ ਲਈ ਬੇਹੱਦ ਜ਼ਰੂਰੀ ਹੈ। ਪਹਿਲੀ ਵਾਰ 'ਚ ਉਸ ਦਾ ਨਾਂ 38ਵੇਂ ਰੈਂਕ 'ਤੇ ਸੀ, ਜਿਸ 'ਚ 36 ਹੀ ਸਫਲ ਹੋਏ ਸਨ।

ਪਿਤਾ ਸੁਪਨਾ ਕੀਤਾ ਪੂਰਾ
ਪੱਲਵੀ ਦੇ ਪਿਤਾ ਮਲਕੀਤ ਸਿੰਘ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਬੇਟੀ ਨੇ ਉਨ੍ਹਾਂ ਦਾ ਉਹ ਸੁਪਨਾ ਪੂਰਾ ਕੀਤਾ ਹੈ ਜੋ ਉਨ੍ਹਾਂ ਨੇ ਉਸ ਦੇ ਜਨਮ ਦੌਰਾਨ ਦੇਖਿਆ ਸੀ ਕਿ ਉਹ ਆਪਣੀ ਬੇਟੀ ਨੂੰ ਜੱਜ ਬਣਾਉਣਗੇ। ਉਨ੍ਹਾਂ ਕਿਹਾ ਕਿ ਪਰਿਵਾਰ ਦੀ ਪਹਿਲੀ ਲੜਕੀ ਹੈ, ਜੋ ਜੱਜ ਬਣੀ ਹੈ ਕਿਉਂਕਿ ਉਹ ਹਿਮਾਚਲ ਦੇ ਪਾਲਮਪੁਰ ਨਾਲ ਸੰਬੰਧ ਰੱਖਦੇ ਹਨ। ਉਥੇ ਹੀ ਦੀ ਮਾਤਾ ਪੁਸ਼ਪਾ ਰਾਣਾ ਨੇ ਕਿਹਾ ਕਿ ਉਨ੍ਹਾਂ ਦੀ ਬੇਟੀ ਦੀ 5 ਸਾਲਾ ਦੀ ਮਿਹਨਤ ਅੱਜ ਰੰਗ ਲਿਆਈ ਹੈ ਅਤੇ ਉਨ੍ਹਾਂ ਨੂੰ ਆਪਣੀ ਧੀ 'ਤੇ ਮਾਣ ਹੈ। ਉਨ੍ਹਾਂ ਕਿਹਾ ਕਿ ਸਮਾਜ ਨੂੰ ਧੀਆਂ ਨੂੰ ਅੱਗੇ ਵਧਣ 'ਚ ਮਦਦ ਕਰਨੀ ਚਾਹੀਦੀ ਹੈ।

ਪੱਲਵੀ ਦੇ ਭਰਾ ਮਿਤੁਲ ਰਾਣਾ ਦਾ ਕਹਿਣਾ ਹੈ ਕਿ ਉਸ ਦੀ ਭੈਣ ਨੇ ਇਕ ਕਮਰੇ 'ਚ ਬੰਦ ਹੋ ਕੇ ਇਸ ਸਫਲਤਾ ਨੂੰ ਹਾਸਲ ਕੀਤਾ ਹੈ। ਉਹ ਆਪਣੀ ਭੈਣ ਦੀ ਸਫਲਤਾ ਨੂੰ ਸਮਝ ਸਕਦੇ ਹਨ ਕਿਉਂਕਿ ਉਹ ਖੁਦ ਵਕਾਲਤ ਕਰ ਰਹੇ ਹਨ।