ਸੋਨੇ ਦੀ ਵਾਲੀ ਝਪਟ ਕੇ ਭੱਜ ਰਹੇ ਨੌਜਵਾਨ ਨੂੰ ਲੋਕਾਂ ਨੇ ਫੜ ਕੇ ਕੀਤਾ ਪੁਲਸ ਹਵਾਲੇ

ਟਾਂਡਾ ਉੜਮੁੜ (ਪੰਡਿਤ ਵਰਿੰਦਰ )— ਜਾਜਾ ਰੇਲਵੇ ਫਲਾਈਓਵਰ ਰੋਡ 'ਤੇ ਬੀਤੀ ਸ਼ਾਮ ਔਰਤ ਦੀ ਵਾਲੀ ਝਪਟ ਕੇ ਭੱਜ ਰਹੇ ਨੌਜਵਾਨ ਝਪਟਮਾਰ ਨੂੰ ਲੋਕਾਂ ਨੇ ਫੜਕੇ ਪੁਲਸ ਹਵਾਲੇ ਕੀਤਾ। ਪੁਲਸ ਨੇ ਵਾਰਦਾਤ ਦਾ ਸ਼ਿਕਾਰ ਹੋਈ ਔਰਤ ਜਗੀਰ ਕੌਰ ਪਤਨੀ ਕਾਲਾ ਨਿਵਾਸੀ ਵਾਰਡ 3 ਟਾਂਡਾ ਦੇ ਬਿਆਨ ਦੇ ਆਧਾਰ 'ਤੇ ਝਪਟਮਾਰੀ ਕਰਨ ਵਾਲੇ ਨੌਜਵਾਨ ਜਗਪ੍ਰੀਤ ਸਿੰਘ ਪੁੱਤਰ ਰਣਜੀਤ ਸਿੰਘ ਨਿਵਾਸੀ ਜਲਾਲਪੁਰ ਦੇ ਖਿਲਾਫ ਮਾਮਲਾ ਦਰਜ ਕੀਤਾ ਹੈ। ਵਾਰਦਾਤ ਸ਼ਾਮ ਚਾਰ ਵਜੇ ਦੀ ਹੈ ਜਦ ਜਾਜਾ ਚੌਕ ਤੋਂ ਟਾਂਡਾ ਵੱਲ ਪੈਦਲ ਆ ਰਹੀ ਉਕਤ ਔਰਤ ਜਗੀਰ ਕੌਰ ਦਾ ਪਿੱਛਾ ਕਰ ਰਹੇ ਝਪਟਮਾਰ ਜਗਪ੍ਰੀਤ ਸਿੰਘ ਨੇ ਉਸ ਦੇ ਇਕ ਕੰਨ 'ਚੋਂ ਸੋਨੇ ਦੀ ਵਾਲੀ ਝਪਟ ਲਈ ਅਤੇ ਭੱਜ ਨਿਕਲਿਆ। ਔਰਤ ਦੇ ਰੌਲਾ ਪਾਉਣ 'ਤੇ ਲੋਕਾਂ ਨੇ ਉਸ ਦਾ ਪਿੱਛਾ ਕਰਕੇ ਉਸ ਨੂੰ ਦਬੋਚ ਲਿਆ ਅਤੇ ਪੁਲਸ ਹਵਾਲੇ ਕਰ ਦਿੱਤਾ। ਪੁਲਸ ਨੇ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।