ਨਵੇਂ ਯੂਨੀਪੋਲ ਲਾਉਣ ’ਚ ਚੱਲੇਗੀ ਕੰਪਨੀ ਦੀ ਮਨਮਾਨੀ

ਲੁਧਿਆਣਾ (ਹਿਤੇਸ਼)-ਨਗਰ ਨਿਗਮ ਦੇ ਅਧਿਕਾਰੀਆਂ ਨੇ ਇਸ਼ਤਿਹਾਰੀ ਕੰਪਨੀ ਦੇ ਸਾਹਮਣੇ ਗੋਡੇ ਟੇਕ ਦਿੱਤੇ ਹਨ, ਜਿਸ ਦੇ ਤਹਿਤ ਨਵੇਂ ਯੂਨੀਪੋਲ ਲਾਉਣ ’ਚ ਕੰਪਨੀ ਦੀ ਮਨਮਾਨੀ ਚੱਲੇਗੀ ਤੇ ਜ਼ੋਨ-ਡੀ ’ਚ ਨਵੇਂ ਯੂਨੀਪੋਲ ਲਾਉਣ ’ਚ ਭਰਮਾਰ ਰਹੇਗੀ। ਜਾਣਕਾਰੀ ਅਨੁਸਾਰ ਨਗਰ ਨਿਗਮ ਵਲੋਂ ਨਵੇਂ ਇਸ਼ਤਿਹਾਰ ਟੈਂਡਰ ’ਚ 370 ਯੂਨੀਪੋਲ ਲਾਉਣ ਦੀ ਮਨਜ਼ੂਰੀ ਦਿੱਤੀ ਗਈ ਹੈ, ਜਿਨ੍ਹਾਂ ’ਚ ਪਹਿਲਾਂ ਤੋਂ ਲੱਗੇ ਹੋਏ ਨਗਰ ਨਿਗਮ ਵਿਚ 82 ਯੂਨੀਪੋਲ ਵੀ ਸ਼ਾਮਲ ਕੀਤੇ ਗਏ ਹਨ। ਹੁਣ ਜੋ ਨਵੇਂ ਯੂਨੀਪੋਲ ਲੱਗਣੇ ਬਾਕੀ ਹਨ, ਉਸ ਲਈ ਕੰਪਨੀ ਵਲੋਂ ਡਰਾਇੰਗ ਬਣਾ ਕੇ ਦੇਣ ਦੀ ਸ਼ਰਤ ਟੈਂਡਰ ’ਚ ਸ਼ਾਮਲ ਕੀਤੀ ਗਈ ਹੈ। ਇਸ ਦੀ ਆਡ਼ ਵਿਚ ਕੰਪਨੀ ਮਨਮਾਨੀ ’ਤੇ ਉੱਤਰ ਆਈ ਹੈ। ਇਸ ਦੇ ਤਹਿਤ ਕੰਪਨੀ ਨੇ ਜ਼ੋਨ-ਡੀ ਦੇ ਇਲਾਕੇ ’ਚ ਸਭ ਤੋਂ ਜ਼ਿਆਦਾ ਯੂਨੀਪੋਲ ਲਾਉਣ ਦੀ ਯੋਜਨਾ ਬਣਾਈ ਹੈ। ਸੂਤਰਾਂ ਅਨੁਸਾਰ ਕੰਪਨੀ ਵਲੋਂ ਜਿਸ ਤਰ੍ਹਾਂ ਦੀ ਡਰਾਇੰਗ ਤਿਆਰ ਕੀਤੀ ਗਈ ਹੈ। ਉਸ ਦੇ ਕਾਰਨ ਜ਼ੋਨ-ਡੀ ਵਿਚ ਲਗਭਗ 300 ਯੂਨੀਪੋਲ ਲਾਏ ਜਾ ਰਹੇ ਹਨ ਤੇ ਬਾਕੀ ਤਿੰਨ ਜ਼ੋਨਾਂ ’ਚ ਇਹ ਸੰਖਿਆ ਸਿਰਫ 70 ਰਹਿ ਜਾਵੇਗੀ। ਇਸ ਤਰ੍ਹਾਂ ਉਸ ਸਮੇਂ ਹੋ ਰਿਹਾ ਹੈ, ਜਦੋਂ ਨਗਰ ਨਿਗਮ ਵਲੋਂ ਟੈਂਡਰ ਲਾਉਣ ਲਈ ਤਿਆਰ ਕੀਤੇ ਗਏ ਮਾਸਟਰ ਪਲਾਨ ’ਚ ਯੂਨੀਪੋਲ ਲਾਉਣ ਦੇ ਲਈ ਲੋਕੇਸ਼ਨ ਮਾਰਕ ਕੀਤੀ ਹੋਈ ਹੈ। ਜਿਸ ਦੇ ਆਧਾਰ ’ਤੇ ਕੰਪਨੀ ਵਲੋਂ ਤਿਆਰ ਕੀਤੀ ਗਈ ਡਰਾਇੰਗ ’ਤੇ ਇਤਰਾਜ਼ ਦੀ ਜਗ੍ਹਾ ਨਗਰ ਨਿਗਮ ਅਧਿਕਾਰੀਆਂ ਨੇ ਗੋਡੇ ਟੇਕ ਦਿੱਤੇ।