...ਤੇ ਗਾਇਕ ਬਣਨ ਦੇ ਸ਼ੌਂਕ ਨੇ ਬਣਾ ਦਿੱਤਾ ''ਕਿਡਨੈਪਰ''

ਚੰਡੀਗੜ੍ਹ (ਕੁਲਦੀਪ, ਬਠਲਾ) : ਕੁਝ ਦਿਨ ਜ਼ਿਲਾ ਮੋਹਾਲੀ ਦੇ ਕਸਬਾ ਕੁਰਾਲੀ ਤੋਂ 11 ਸਾਲਾ ਬੱਚੇ ਅਸ਼ੀਸ਼ਜੋਤ ਨੂੰ ਅਗਵਾ ਕਰ ਕੇ ਦੋ ਲੱਖ ਰੁਪਏ ਦੀ ਫਿਰੌਤੀ ਮੰਗਣ ਵਾਲੇ ਮੁੱਖ ਮੁਲਜ਼ਮ ਨੂੰ ਪੁਲਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਜ਼ਿਲਾ ਪੁਲਸ ਮੁਖੀ ਮੋਹਾਲੀ ਹਰਚਰਨ ਸਿੰਘ ਭੁੱਲਰ ਨੇ ਇਸ ਸਬੰਧੀ ਪ੍ਰੈੱਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਕੁਰਾਲੀ ਤੋਂ ਅਗਵਾ ਹੋਏ ਅਸ਼ੀਸ਼ਜੋਤ ਨੂੰ ਵਾਰਦਾਤ ਤੋਂ 12 ਘੰਟਿਆਂ ਦੇ ਅੰਦਰ-ਅੰਦਰ 7 ਅਪ੍ਰੈਲ ਨੂੰ ਪੁਲਸ ਨੇ ਅੰਬਾਲਾ ਤੋਂ ਬਰਾਮਦ ਕਰ ਲਿਆ ਸੀ।  ਪੁਲਸ ਦੀ ਟੀਮ ਨੇ ਤਫ਼ਤੀਸ਼ ਦੌਰਾਨ ਮੁਲਜ਼ਮ ਸਾਹਿਲ ਵਰਮਾ ਵਾਸੀ ਮਕਾਨ ਨੰਬਰ 480/9 ਡਾਕਟਰ ਨੰਦਾਲ ਵਾਲੀ ਗਲੀ, ਗੋਹਾਣਾ, ਜ਼ਿਲਾ ਸੋਨੀਪਤ (ਹਰਿਆਣਾ) ਨੂੰ ਗ੍ਰਿਫ਼ਤਾਰ ਕੀਤਾ। ਕੁਰਾਲੀ ਵਿਖੇ ਗਾਇਕਾਂ ਦੇ ਘਰ ਆਉਂਦਾ-ਜਾਂਦਾ ਸੀ। ਮੁਲਜ਼ਮ ਭੁੱਲਰ ਨੇ ਦੱਸਿਆ ਕਿ ਮੁਲਜ਼ਮ ਸਾਹਿਲ (25) ਤੋਂ ਮੁੱਢਲੀ ਪੁੱਛ-ਪੜਤਾਲ ਵਿਚ ਸਾਹਮਣੇ ਆਇਆ ਕਿ ਇਹ ਸਾਧਾਰਨ ਪਰਿਵਾਰ ਨਾਲ ਸਬੰਧ ਰੱਖਦਾ ਹੈ। ਉਸ ਦਾ ਪਿਤਾ ਗੋਹਾਣਾ ਵਿਖੇ ਰਾਜ ਮਿਸਤਰੀ ਦੀ ਠੇਕੇਦਾਰੀ ਕਰਦਾ ਹੈ। ਸ਼ੁਰੂ ਤੋਂ ਸੰਗੀਤ ਦਾ ਸ਼ੌਕ ਹੋਣ ਕਰਕੇ ਉਹ ਸੰਗੀਤ ਸਿੱਖਣ ਲੱਗ ਪਿਆ ਸੀ ਤੇ ਨਾਲ-ਨਾਲ ਪੜ੍ਹਾਈ ਵੀ ਕਰਦਾ ਰਿਹਾ। ਉਸ ਨੇ ਸਰਕਾਰੀ ਕਾਲਜ ਗੋਹਾਣਾ ਤੋਂ ਬੀ. ਏ. ਪਾਸ ਕੀਤੀ ਸੀ। ਉਸ ਨੇ 2016 ਵਿਚ ਚੰਡੀਗੜ੍ਹ ਵਿਚ ਇਕ ਗੀਤ ਦੀ ਸ਼ੂਟਿੰਗ ਕੀਤੀ ਸੀ, ਜਿਸ ਦੌਰਾਨ ਇਸ ਦੀ ਜਾਣ-ਪਛਾਣ ਸ਼ੂਟਿੰਗ ਦਾ ਕੰਮ ਕਰਦੇ ਅਮਰ ਅਤੇ ਸੋਨੂੰ ਵਾਸੀ ਕੁਰਾਲੀ ਨਾਲ ਹੋ ਗਈ। ਉਸ ਦਾ ਅਮਰ ਤੇ ਸੋਨੂੰ ਦੇ ਘਰ ਕੁਰਾਲੀ ਵਿਖੇ ਆਉਣਾ-ਜਾਣਾ ਬਣਿਆ ਰਹਿੰਦਾ ਸੀ। ਮੁਲਜ਼ਮ ਸਾਹਿਲ ਕੁਝ ਸਮਾਂ ਪਰਮਿੰਦਰ ਸਿੰਘ ਉਰਫ ਸੋਨੂੰ ਪੁੱਤਰ ਵਾਸੀ ਵਾਰਡ ਨੰਬਰ-4 ਕੁਰਾਲੀ ਦੇ ਘਰ ਕੁਰਾਲੀ ਵਿਖੇ ਰਹਿੰਦਾ ਰਿਹਾ ਤੇ ਦੋ ਮਹੀਨਿਆਂ ਤੋਂ ਇਹ ਪਿੰਡ ਪਪਰਾਲੀ ਫੈਕਟਰੀ ਵਿਚ ਬਣੇ ਕਮਰਿਆਂ ਵਿਚ ਕਿਰਾਏ 'ਤੇ ਰਹਿ ਰਿਹਾ ਸੀ। 
ਕੁਰਾਲੀ ਤੋਂ ਹੀ ਖਰੀਦੀ ਮਾਰੂਤੀ 'ਚ ਕੀਤਾ ਸੀ ਬੱਚਾ ਅਗਵਾ 
ਜ਼ਿਲਾ ਪੁਲਸ ਮੁਖੀ ਨੇ ਦੱਸਿਆ ਕਿ ਮੁਲਜ਼ਮ ਸਾਹਿਲ ਨੇ 15 ਦਿਨ ਪਹਿਲਾਂ ਇਕ ਚਿੱਟੇ ਰੰਗ ਦੀ ਮਾਰੂਤੀ ਕਾਰ (ਸੀ. ਐੱਚ. 01 ਐੱਲ 1469) ਜਸਪਾਲ ਸਿੰਘ ਵਾਸੀ ਕੁਰਾਲੀ ਤੋਂ 14 ਹਜ਼ਾਰ ਰੁਪਏ ਵਿਚ ਖਰੀਦੀ ਸੀ, ਜਿਸ ਵਿਚ ਉਹ ਰੋਜ਼ਾਨਾ ਸਿੰਘਪੁਰਾ ਰੋਡ ਕੁਰਾਲੀ ਸਟੇਡੀਅਮ ਵਿਚ ਜਾਂਦਾ ਸੀ। ਸਟੇਡੀਅਮ ਦੇ ਬਾਹਰ ਬਰਗਰ ਵਾਲੀ ਰੇਹੜੀ ਲੱਗੀ ਹੋਈ ਸੀ, ਜਿਥੇ ਮੁਲਜ਼ਮ 31 ਮਾਰਚ ਤੇ 2 ਅਪ੍ਰੈਲ 2019 ਨੂੰ ਅਸ਼ੀਸ਼ਜੋਤ ਸਿੰਘ ਸਮੇਤ ਇਸ ਦੇ 2 ਸਾਥੀ ਬੱਚਿਆਂ ਨੂੰ ਮਿਲਿਆ ਸੀ ਅਤੇ ਬਰਗਰ ਵੀ ਖੁਆਏ ਸਨ। ਇਸ ਕਾਰਨ ਅਸ਼ੀਸ਼ਜੋਤ ਸਿੰਘ ਨਾਲ ਇਸ ਦੀ ਨੇੜਤਾ ਹੋ ਗਈ। ਉਨ੍ਹਾਂ ਦੱਸਿਆ ਕਿ 6 ਅਪ੍ਰੈਲ ਨੂੰ ਸ਼ਾਮ ਸਮੇਂ ਮੁਲਜ਼ਮ ਸਾਹਿਲ ਵਰਮਾ ਆਪਣੀ ਕਾਰ ਵਿਚ ਸਬਜ਼ੀ ਮੰਡੀ ਕੁਰਾਲੀ ਗਿਆ ਤਾਂ ਇਸ ਨੂੰ ਸਬਜ਼ੀ ਮੰਡੀ ਵਿਚ ਅਸ਼ੀਸ਼ਜੋਤ ਸਿੰਘ ਤੇ ਉਸ ਦੇ ਸਾਥੀ ਮਿਲੇ। ਮੁਲਜ਼ਮ ਨੇ ਇਨ੍ਹਾਂ ਬੱਚਿਆਂ ਨੂੰ ਚੌਧਰੀ ਹਸਪਤਾਲ ਦੇ ਸਾਹਮਣੇ ਡੇਅਰੀ ਵਿਚੋਂ ਆਈਸਕ੍ਰੀਮ ਲੈ ਕੇ ਦਿੱਤੀ ਤੇ ਅਸ਼ੀਸ਼ਜੋਤ ਸਿੰਘ ਨੂੰ ਗੱਲਾਂ ਵਿਚ ਲਾ ਕੇ ਆਪਣੀ ਕਾਰ ਵਿਚ ਬਿਠਾ ਕੇ ਪਿੰਡ ਸਿੰਘਪੁਰਾ ਰਾਹੀਂ ਬਾਈਪਾਸ ਨੂੰ ਹੁੰਦੇ ਹੋਏ ਲੁਧਿਆਣਾ ਸਾਈਡ ਨੂੰ ਲੈ ਗਿਆ। ਜਦੋਂ ਅਸ਼ੀਸ਼ਜੋਤ ਵਾਪਸ ਆਪਣੇ ਘਰ ਜਾਣ ਲਈ ਜ਼ਿੱਦ ਕਰਨ ਲੱਗਿਆ ਤਾਂ ਇਸ ਨੇ ਗੱਲਾਂ ਵਿਚ ਲਾ ਕੇ ਕਿਹਾ ਕਿ ਹਨੇਰਾ ਹੋ ਗਿਆ ਮੇਰੇ ਘਰ ਚੱਲਦੇ ਹਾਂ। ਇਹ ਲੁਧਿਆਣਾ ਤੋਂ ਪਹਿਲਾਂ ਕੁਹਾੜਾ ਕਸਬਾ ਟੱਪ ਕੇ ਕਾਰ ਸਾਈਡ 'ਤੇ ਖੜ੍ਹੀ ਕਰ ਕੇ ਅਸ਼ੀਸ਼ਜੋਤ ਸਿੰਘ ਨੂੰ ਆਪਣੇ ਨਾਲ ਸਿਟੀ ਮਾਹਲ ਰੈਸਟੋਰੈਂਟ ਲੈ ਗਿਆ। ਇਸ ਨੇ ਹੋਟਲ ਵਿਚ ਜਾ ਕੇ ਕਮਰਾ ਲਿਆ ਤੇ ਬੱਚੇ ਨੂੰ ਰੋਟੀ-ਪਾਣੀ ਖੁਆਇਆ। ਅਸ਼ੀਸ਼ਜੋਤ ਸਿੰਘ ਸੌਂ ਗਿਆ ਤਾਂ ਇਹ ਸਾਰੀ ਰਾਤ ਉਸ ਦੀ ਨਿਗਰਾਨੀ ਕਰਦਾ ਰਿਹਾ।

ਭੁੱਲਰ ਨੇ ਦੱਸਿਆ ਕਿ ਸਵੇਰੇ ਇਸ ਨੇ ਹੋਟਲ ਤੋਂ ਬਾਹਰ ਆ ਕੇ ਫਿਰੌਤੀ ਲੈਣ ਲਈ ਅਸ਼ੀਸ਼ਜੋਤ ਦੇ ਘਰ ਫੋਨ ਕੀਤਾ। ਫੋਨ ਕਰਨ ਤੋਂ ਬਾਅਦ ਇਹ ਡਰ ਗਿਆ ਕਿ ਇਸ ਦੇ ਫੋਨ ਦੀ ਲੋਕੇਸ਼ਨ ਵਗੈਰਾ ਹੋਟਲ ਦੀ ਆ ਸਕਦੀ ਹੈ, ਜਿਸ ਕਰ ਕੇ ਫੋਨ ਕਰਨ ਤੋਂ ਬਾਅਦ ਬੱਚੇ ਨੂੰ ਲੈ ਕੇ ਉਹ ਆਟੋ ਵਿਚ ਬਿਠਾ ਕੇ ਲੁਧਿਆਣਾ ਦੇ ਸਮਰਾਲਾ ਚੌਕ ਪਹੁੰਚਿਆ, ਜਿਥੋਂ ਬੱਸ ਵਿਚ ਅੰਬਾਲਾ ਲੈ ਗਿਆ। ਫੜੇ ਜਾਣ ਦੇ ਡਰੋਂ ਉਹ ਬੱਚੇ ਨੂੰ ਅੰਬਾਲਾ ਬੱਸ ਸਟੈਂਡ 'ਤੇ ਛੱਡ ਕੇ ਚਲਾ ਗਿਆ ਅਤੇ ਜਿਸ ਸਿਮ ਰਾਹੀਂ ਫਿਰੌਤੀ ਲੈਣ ਲਈ ਕਾਲ ਕੀਤੀ ਸੀ, ਉਹ ਸਿਮ ਫੋਨ ਵਿਚੋਂ ਕੱਢ ਕੇ ਸੁੱਟ ਦਿੱਤੀ। ਇਸ ਤੋਂ ਪਹਿਲਾਂ ਮੁਲਜ਼ਮ ਨੇ ਅਸ਼ੀਸ਼ਜੋਤ ਸਿੰਘ ਨੂੰ ਕਾਫੀ ਡਰਾਇਆ ਸੀ ਕਿ ਉਸ ਨੇ ਇਸ ਦਾ ਨਾਂ ਕਿਸੇ ਕੋਲ ਨਹੀਂ ਲੈਣਾ ਅਤੇ ਜੇ ਕੋਈ ਵੀ ਪੁੱਛੇ ਤਾਂ ਇਹੀ ਕਹਿਣਾ ਕਿ ਉਸ ਨੂੰ ਚਾਰ ਲੜਕੇ ਹਥਿਆਰਾਂ ਨਾਲ ਡਰਾ ਕੇ ਕੁਰਾਲੀ ਤੋਂ ਚੁੱਕ ਕੇ ਲੈ ਗਏ ਸਨ ਤੇ ਉਸ ਦੇ ਰੌਲਾ ਪਾਉਣ 'ਤੇ ਉਹ ਉਸ ਨੂੰ ਬੱਸ ਅੱਡਾ ਅੰਬਾਲਾ ਛੱਡ ਕੇ ਭੱਜ ਗਏ। ਜ਼ਿਲਾ ਪੁਲਸ ਮੁਖੀ ਅਨੁਸਾਰ ਮੁਲਜ਼ਮ ਨੇ ਅਗਵਾ ਦੇ ਮੰਤਵ ਬਾਰੇ ਦੱਸਿਆ ਕਿ ਉਹ ਮੁੰਬਈ ਵਿਖੇ ਜਾ ਕੇ ਫਿਲਮ ਇੰਡਸਟਰੀ ਵਿਚ ਕੰਮ ਕਰਨਾ ਚਾਹੁੰਦਾ ਸੀ ਅਤੇ ਉਸ ਕੋਲ ਇੰਨੇ ਪੈਸੇ ਨਹੀਂ ਸਨ, ਜਿਸ ਕਰ ਕੇ ਉਸ ਨੇ ਇਸ ਬੱਚੇ ਨੂੰ ਅਗਵਾ ਕਰ ਕੇ ਵਾਰਸਾਂ ਤੋਂ ਫਿਰੌਤੀ ਮੰਗਣ ਦੀ ਸਕੀਮ ਬਣਾਈ, ਤਾਂ ਜੋ ਫਿਰੌਤੀ ਦੇ ਪੈਸਿਆਂ ਨਾਲ ਆਪਣਾ ਮਕਸਦ ਪੂਰਾ ਕਰ ਸਕੇ। ਮੁਲਜ਼ਮ ਤੋਂ ਹੋਰ ਪੁੱਛ-ਪੜਤਾਲ ਕੀਤੀ ਜਾ ਰਹੀ ਹੈ।