ਸਰਕਾਰੀ ਨੌਕਰੀ ''ਤੇ ਲਗਾਉਣ ਦਾ ਝਾਂਸਾ ਦੇ ਕੇ ਵੱਡੀ ਠੱਗੀ

ਫਿਰੋਜ਼ਪੁਰ (ਮਲਹੋਤਰਾ) : ਇਕ ਨੌਜਵਾਨ ਨੂੰ ਨੌਕਰੀ ਦੁਆਉਣ ਦਾ ਲਾਰਾ ਲਗਾ ਕੇ ਉਸਦੇ ਪਰਿਵਾਰ ਕੋਲੋਂ 12 ਲੱਖ ਰੁਪਏ ਠੱਗਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਛਿੰਦਰ ਸਿੰਘ ਵਾਸੀ ਕਪੂਰਥਲਾ ਨੇ ਪੁਲਸ ਨੂੰ ਸ਼ਿਕਾਇਤ "ਚ ਦੱਸਿਆ ਕਿ ਉਸਨੇ ਆਪਣੇ ਲੜਕੇ ਨੂੰ ਸਰਕਾਰੀ ਨੌਕਰੀ ਲਗਵਾਉਣ ਲਈ ਡਾ. ਰਵੀ ਆਹੂਜਾ ਵਾਸੀ ਮੱਖੂ ਦੇ ਨਾਲ ਸੰਪਰਕ ਕੀਤਾ। ਡਾ. ਆਹੂਜਾ ਨੇ ਉਸ ਨੂੰ ਇਸ ਲਾਰੇ ਵਿਚ ਲੈ ਲਿਆ ਕਿ ਉਹ ਪਹਿਲਾਂ ਵੀ ਕਈ ਮੁੰਡੇ ਅਤੇ ਕੁੜੀਆਂ ਨੂੰ ਸਰਕਾਰੀ ਨੌਕਰੀ "ਤੇ ਰਖਵਾ ਚੁੱਕਾ ਹੈ | 

ਸ਼ਿਕਾਇਤਕਰਤਾ ਨੇ ਦੱਸਿਆ ਕਿ ਉਸ ਨੇ ਵੱਖ-ਵੱਖ ਸਮੇਂ ਦੌਰਾਨ ਆਹੂਜਾ ਨੂੰ ਕਰੀਬ 12 ਲੱਖ ਰੁਪਏ ਦਿੱਤੇ ਪਰ ਪੈਸੇ ਦੇਣ ਦੇ ਕਾਫੀ ਸਮਾਂ ਬਤੀਤ ਹੋਣ 'ਤੇ ਵੀ ਜਦੋਂ ਉਸ ਨੇ ਉਸਦੇ ਲੜਕੇ ਨੂੰ ਨਾ ਤਾਂ ਨੌਕਰੀ ਲਗਵਾਇਆ ਅਤੇ ਨਾ ਹੀ ਉਸਦੇ ਪੈਸੇ ਮੋੜੇ ਤਾਂ ਉਸ ਨੇ ਪੁਲਸ ਕੋਲ ਸ਼ਿਕਾਇਤ ਦਿੱਤੀ। ਏ.ਐੱਸ.ਆਈ. ਰਾਮ ਸਿੰਘ ਅਨੁਸਾਰ ਦੋਸ਼ੀ ਖਿਲਾਫ ਧੋਖਾਧੜੀ ਦਾ ਪਰਚਾ ਦਰਜ ਕਰਨ ਉਪਰੰਤ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ।