ਚਚੇਰੇ ਭਰਾ ਤੇ ਭੈਣ ਨੇ ਦੁਕਾਨਾਂ ਦੇ ਸੌਦੇ ਨੂੰ ਲੈ ਕੇ ਮਾਰੀ 26 ਲੱਖ ਦੀ ਠੱਗੀ

ਸੰਗਰੂਰ (ਵਿਵੇਕ ਸਿੰਧਵਾਨੀ, ਰਵੀ) - ਮਲੇਰਕੋਟਲਾ 'ਚ ਇਕ ਔਰਤ ਅਤੇ ਉਸ ਦੇ ਭਰਾ 'ਤੇ ਆਪਣੇ ਤਾਏ ਦੇ ਮੁੰਡੇ ਨਾਲ ਦੁਕਾਨਾਂ ਦੇ ਸੌਦੇ ਦਾ ਜ਼ੁਬਾਨੀ ਕਰਾਰਨਾਮਾ ਦੇਣ ਤੋਂ ਬਾਅਦ 26 ਲੱਖ ਰੁਪਏ ਦੀ ਠੱਗੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ । ਪੁਲਸ ਨੇ ਇਸ ਮਾਮਲੇ 'ਚ  ਰੁਬੀਨਾ ਦੀ ਸ਼ਿਕਾਇਤ 'ਤੇ ਠੱਗੀ ਮਾਰਨ ਦੇ ਦੋਸ਼ ਹੇਠ ਖੁਰਸ਼ੀਦ ਅਹਿਮਦ, ਮੁਹੰਮਦ ਸ਼ਕੀਲ ਤੇ ਸ਼ਕੀਲਾ ਪ੍ਰਵੀਨ 'ਤੇ ਕੇਸ ਦਰਜ ਕਰ ਲਿਆ ਹੈ। ਉਕਤ ਦੋਸ਼ੀ ਫਿਲਹਾਲ ਪੁਲਸ ਦੀ ਗ੍ਰਿਫਤ 'ਚੋਂ ਬਾਹਰ ਦੱਸੇ ਜਾ ਰਹੇ ਹਨ। 
ਪੁਲਸ ਨੂੰ  ਦਿੱਤੀ ਗਈ ਸ਼ਿਕਾਇਤ 'ਤੇ ਰੂਬੀਨਾ ਨੇ ਦੋਸ਼ ਲਗਾਇਆ ਕਿ ਉਸ ਦੇ ਚਾਚੇ ਦੇ ਲੜਕੇ ਅਤੇ ਲੜਕੀ ਨੇ 11 ਦਸੰਬਰ 2016 ਨੂੰ ਉਸਦੇ ਘਰ ਆ ਕੇ ਦੋ ਦੁਕਾਨਾਂ ਸਰਹੰਦੀ ਗੇਟ ਰੋਡ, ਨੇੜੇ ਕੱਚਾ ਕੋਟ ਮਾਲੇਰਕੋਟਲਾ ਦਾ ਜ਼ੁਬਾਨੀ ਇਕਰਾਰਨਾਮਾ ਬੈਅ ਬਦਲੇ 26 ਲੱਖ ਰੁਪਏ 'ਚ ਕਰ ਗਏ। ਉਸਨੇ 10 ਹਜ਼ਾਰ ਰੁਪਏ ਨਕਦ ਅਤੇ ਇਕ ਲੱਖ 90 ਹਜ਼ਾਰ ਰੁਪਏ ਦਾ ਚੈੱਕ ਮੁਲਜ਼ਮਾਂ ਨੂੰ ਦਿੰਦੇ ਹੋਏ ਦੁਕਾਨਾਂ ਦੀ ਰਜਿਸਟਰੀ ਕਰਵਾਉਣ ਦਾ ਸਮਾਂ ਜੂਨ 2017 ਵਿਚ ਤੈਅ ਕੀਤਾ। ਮੁਲਜ਼ਮਾਂ ਨੇ 6 ਮਈ 2017 ਤੱਕ ਉਸ ਤੋਂ ਕੁਝ ਨਕਦ ਅਤੇ ਚੈੱਕਾਂ ਰਾਹੀਂ 26 ਲੱਖ ਰੁਪਏ ਵਸੂਲ ਕਰ ਲਏ। ਜਦੋਂ ਉਸਨੇ ਜੂਨ 2017 'ਚ ਮੁਲਜ਼ਮਾਂ ਨੂੰ ਰਜਿਸਟਰੀ ਕਰਵਾਉਣ ਲਈ ਕਿਹਾ ਤਾਂ ਉਹ ਟਾਲ-ਮਟੋਲ ਕਰਨ ਲੱਗ ਪਏ।
ਉਸ ਨੂੰ ਪੜਤਾਲ ਕਰਨ 'ਤੇ ਪਤਾ ਲੱਗਾ ਕਿ ਉਕਤ ਦੁਕਾਨਾਂ ਦੀ ਅਸਲ ਮਾਲਕ ਤਾਂ ਉਸਦੀ ਚਾਚੀ ਬਸ਼ੀਰਾ ਪਤਨੀ ਅਬਦੁਲ ਲਤੀਫ ਹੈ। ਉਸ ਵੱਲੋਂ ਵਾਰ-ਵਾਰ ਕਹਿਣ 'ਤੇ ਵੀ ਮੁਲਜ਼ਮਾਂ ਨੇ ਉਸਦੇ ਨਾਂ ਰਜਿਸਟਰੀ ਨਹੀਂ ਕਰਵਾਈ। ਪੁਲਸ ਨੇ ਮੁੱਦਈ ਦੀ ਦਰਖਾਸਤ 'ਤੇ ਪੜਤਾਲ ਕਰਨ ਉਪਰੰਤ ਮੁਲਜ਼ਮਾਂ ਵਿਰੁੱਧ ਧੋਖਾਦੇਹੀ ਅਤੇ ਹੋਰ ਕਈ ਧਾਰਾਵਾਂ ਹੇਠ ਪਰਚਾ ਦਰਜ ਕਰ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।