ਚੜ੍ਹਤ ਕਾਇਮ ਰੱਖਣ ਲਈ ਗੈਂਗਸਟਰਾਂ ਦੇ 2 ਧੜਿਆਂ ਵਿਚਾਲੇ ਫਾਇਰਿੰਗ, ਪੁਲਸ ਨੇ ਮੌਕੇ ਤੋਂ 3 ਖੋਲ੍ਹ ਕੀਤੇ ਬਰਾਮਦ
Wednesday, Feb 04, 2026 - 03:40 AM (IST)
ਸਾਹਨੇਵਾਲ (ਜਗਰੂਪ) : ਬੀਤੀ 2 ਫਰਵਰੀ ਦੀ ਦੇਰ ਰਾਤ ਥਾਣਾ ਸਾਹਨੇਵਾਲ ਅਧੀਨ ਆਉਂਦੇ ਮਹਾਦੇਵ ਨਗਰ ’ਚ 2 ਧੜਿਆਂ ਵਿਚਾਲੇ ਹੋਈ ਕਥਿਤ ਫਾਇਰਿੰਗ ਅਤੇ ਝਗੜੇ ਨੂੰ ਲੈ ਕੇ ਪੁਲਸ ਨੇ ਕਾਰਵਾਈ ਕਰਦੇ ਹੋਏ ਕੁਝ ਨੌਜਵਾਨਾਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਸ ਮਾਮਲੇ ਨੂੰ ਲੈ ਕੇ ਜਾਣਕਾਰੀ ਸਾਂਝੀ ਕਰਦੇ ਹੋਏ ਏ. ਡੀ. ਸੀ. ਪੀ.-2 ਕਰਨਵੀਰ ਸਿੰਘ ਨੇ ਦੱਸਿਆ ਕਿ ਇਹ ਝਗੜਾ ਅਪਰਾਧਿਕ ਰਿਕਾਰਡ ਵਾਲੇ 2 ਧੜਿਆਂ ਵਿਚਾਲੇ ਹੋਇਆ ਸੀ, ਜਿਸ ਨੂੰ ਲੈ ਕੇ ਪੁਲਸ ਨੇ 19-20 ਨੌਜਵਾਨਾਂ ਖਿਲਾਫ ਕੇਸ ਦਰਜ ਕਰਦੇ ਹੋਏ 4 ਨੌਜਵਾਨਾਂ ਨੂੰ ਗ੍ਰਿਫਤਾਰ ਕੀਤਾ ਹੈ।
ਇਹ ਵੀ ਪੜ੍ਹੋ : ਲੁਧਿਆਣਾ ਦੇ ਵਪਾਰੀ ਨਾਲ 21 ਲੱਖ ਰੁਪਏ ਦੀ ਠੱਗੀ; ਨਕਲੀ ਟਰਾਂਸਪੋਰਟਰ ਲੱਖਾਂ ਦਾ ਸਾਮਾਨ ਲੈ ਕੇ ਫਰਾਰ
ਪੁਲਸ ਨੇ ਜਾਂਚ ਦੌਰਾਨ ਮੌਕੇ ਤੋਂ 3 ਖਾਲੀ ਖੋਲ੍ਹ ਵੀ ਬਰਾਮਦ ਕੀਤੇ ਹਨ। ਇਸ ਝਗੜੇ ’ਚ 3-4 ਨੌਜਵਾਨ ਦੋਵੇਂ ਪਾਸਿਆਂ ਤੋਂ ਜ਼ਖਮੀ ਹੋਏ ਹਨ। ਝਗੜਾ ਕਰਨ ਵਾਲਿਆਂ ਦਾ ਪੁਰਾਣਾ ਅਪਰਾਧਿਕ ਰਿਕਾਰਡ ਹੈ ਅਤੇ ਸਾਰਿਆਂ ਦੀ ਉਮਰ 20 ਤੋਂ 25 ਸਾਲ ਦੇ ਵਿਚਕਾਰ ਹੈ। ਏ. ਡੀ. ਸੀ. ਪੀ. ਕਰਨਵੀਰ ਸਿੰਘ ਨੇ ਦੱਸਿਆ ਕਿ ਪੁਲਸ ਦੀਆਂ ਟੀਮਾਂ ਬਣਾ ਕੇ ਬਾਕੀ ਦੇ ਨੌਜਵਾਨਾਂ ਦੀ ਗ੍ਰਿਫਤਾਰੀ ਲਈ ਵੀ ਛਾਪੇਮਾਰੀ ਕੀਤੀ ਜਾ ਰਹੀ ਹੈ, ਪੁਲਸ ਜਲਦ ਹੀ ਬਾਕੀਆਂ ਨੂੰ ਵੀ ਗ੍ਰਿਫਤਾਰ ਕਰ ਲਵੇਗੀ।
ਮੋਟਰਸਾਈਕਲ ਨੂੰ ਲਾਈ ਅੱਗ
ਰਾਤ ਨੂੰ ਹੋਈ ਲੜਾਈ ਦੌਰਾਨ ਇਕ ਧਿਰ ਦੇ ਨੌਜਵਾਨਾਂ ਦਾ ਮੋਟਰਸਾਈਕਲ ਝਗੜੇ ਵਾਲੀ ਥਾਂ ਉਪਰ ਹੀ ਰਹਿ ਗਿਆ, ਜਿਸ ਨੂੰ ਅੱਜ ਸਵੇਰੇ ਦੂਜੀ ਧਿਰ ਦੇ ਨੌਜਵਾਨਾਂ ਨੇ ਅੱਗ ਲਾ ਦਿੱਤੀ। ਇਸ ਦੀ ਪੁਸ਼ਟੀ ਮੌਕੇ ’ਤੇ ਮੌਜੂਦ ਕੁਝ ਲੋਕਾਂ ਨੇ ਆਪਣਾ ਨਾਂ ਨਾ ਛਾਪਣ ਦੀ ਸ਼ਰਤ ’ਤੇ ਕੀਤੀ।
ਇਹ ਵੀ ਪੜ੍ਹੋ : EPFO 3.0: EPF ਖਾਤਿਆਂ 'ਚ ਵੱਡਾ ਬਦਲਾਅ, ਹੁਣ ਕੁਝ ਦਿਨਾਂ 'ਚ ਮਿਲ ਜਾਵੇਗਾ PF ਦਾ ਪੂਰਾ ਪੈਸਾ, ਜਾਣੋ ਨਵੇਂ ਨਿਯਮ
ਚੜ੍ਹਤ ਕਾਇਮ ਰੱਖਣ ਦਾ ਮਾਮਲਾ
ਸੂਤਰਾਂ ਦੀ ਮੰਨੀਏ ਤਾਂ ਇਹ ਝਗੜਾ 2 ਨਾਮੀ ਗੈਂਗਸਟਰ ਗਰੁੱਪਾਂ ਵਿਚਾਲੇ ਹੋਇਆ ਦੱਸਿਆ ਜਾ ਰਿਹਾ ਹੈ। ਦੋਵੇਂ ਧੜੇ ਇਕ ਸਿਆਸੀ ਪਾਰਟੀ ਦੇ ਐੱਮ. ਐੱਲ. ਏ. ਦੀ ਸਪੋਰਟ ਕਰਦੇ ਹਨ ਅਤੇ ਅਸਿੱਧੇ ਤੌਰ ’ਤੇ ਝਗੜੇ ਵਾਲੇ ਇਲਾਕੇ ’ਚ ਆਪਣੀ ਚੜ੍ਹਤ ਨੂੰ ਕਾਇਮ ਰੱਖਣ ਅਤੇ ਡਰ ਬਣਾ ਕੇ ਰੱਖਣ ਲਈ ਆਹਮੋ-ਸਾਹਮਣੇ ਹੋਏ ਦੱਸੇ ਜਾ ਰਹੇ ਹਨ। ਸੂਤਰ ਦੱਸਦੇ ਹਨ ਕਿ ਸਿਆਸੀ ਦਬਾਅ ਕਾਰਨ ਹੇਠਲੇ ਪੁਲਸ ਅਧਿਕਾਰੀ ਇਨ੍ਹਾਂ ਗੈਂਗਸਟਰਾਂ ਨੂੰ ਹੱਥ ਪਾਉਣ ਤੋਂ ਡਰਦੇ ਹਨ ਪਰ ਅੱਜ ਏ. ਡੀ. ਸੀ. ਪੀ. ਵੱਲੋਂ ਝਗੜਾ ਕਰਨ ਵਾਲਿਆਂ ਨੂੰ ਜਲਦ ਗ੍ਰਿਫਤਾਰ ਕਰਨ ਦੇ ਦਿੱਤੇ ਹੁਕਮਾਂ ਦੇ ਕੁਝ ਹੀ ਸਮੇਂ ਅੰਦਰ ਪੁਲਸ ਨੇ 4 ਨੌਜਵਾਨਾਂ ਨੂੰ ਗ੍ਰਿਫਤਾਰ ਕਰ ਲਿਆ ਅਤੇ ਬਾਕੀਆਂ ਦੀ ਗ੍ਰਿਫਤਾਰੀ ਨੂੰ ਲੈ ਕੇ ਜੰਗੀ ਪੱਧਰ ’ਤੇ ਛਾਪੇਮਾਰੀ ਸ਼ੁਰੂ ਕਰ ਦਿੱਤੀ ਹੈ।
