ਪੰਜਾਬ: ਗੋਲ਼ੀਆਂ ਮਾਰ ਕਤਲ ਕੀਤੇ ਸਾਬਕਾ ਸਰਪੰਚ ਦੇ ਮਾਮਲੇ 'ਚ ਵੱਡੀ ਅਪਡੇਟ! ਭਰਾ ਨਿਕਲਿਆ ਕਾਤਲ

ਲੁਧਿਆਣਾ (ਰਾਜ, ਅਨਿਲ)- ਲੁਧਿਆਣਾ ਦੇ ਲਾਡੋਵਾਲ ਥਾਣਾ ਖੇਤਰ ਅਧੀਨ ਪੈਂਦੇ ਪਿੰਡ ਮੰਨੇਵਾਲ ਦੇ ਸਾਬਕਾ ਸਰਪੰਚ ਨਵਤੇਜ ਸਿੰਘ ਦੇ ਕਤਲਕਾਂਡ ਨੂੰ ਪੁਲਸ ਨੇ ਸੁਲਝਾ ਲਿਆ ਹੈ। ਪੁਲਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਖ਼ੁਲਾਸਾ ਕੀਤਾ ਕਿ ਇਹ ਕਤਲ ਕਿਸੇ ਰਾਜਨੀਤਿਕ ਰੰਜਿਸ਼ ਦਾ ਨਤੀਜਾ ਨਹੀਂ ਸੀ, ਸਗੋਂ ਕਰੋੜਾਂ ਰੁਪਏ ਦੀ 78 ਏਕੜ ਜੱਦੀ ਜ਼ਮੀਨ ਦੀ ਵੰਡ ਨੂੰ ਲੈ ਕੇ ਦੋ ਚਚੇਰੇ ਭਰਾਵਾਂ ਵਿਚਕਾਰ ਪੁਰਾਣੇ ਖ਼ੂਨੀ ਵਿਵਾਦ ਦਾ ਨਤੀਜਾ ਹੈ। ਸਾਬਕਾ ਸਰਪੰਚ ਦੇ ਕਤਲ ਦੀ ਸਾਜ਼ਿਸ਼ ਉਸ ਦੇ ਆਪਣੇ ਭਰਾ ਨੇ ਰਚੀ ਸੀ, ਜਿਸ ਨੇ ਸ਼ੂਟਰਾਂ ਨੂੰ ਕਿਰਾਏ 'ਤੇ ਲਿਆ ਸੀ ਅਤੇ ਉਨ੍ਹਾਂ ਸਰਪੰਚ ਦੀ ਇਨੋਵਾ ਕਾਰ 'ਤੇ ਲਗਭਗ 10 ਗੋਲ਼ੀਆਂ ਚਲਾਈਆਂ ਸਨ। ਗੰਭੀਰ ਜ਼ਖ਼ਮੀ ਸਾਬਕਾ ਸਰਪੰਚ ਨੂੰ ਡੀ. ਐੱਮ. ਸੀ. ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। 

ਇਹ ਵੀ ਪੜ੍ਹੋ: ਮੈਡ ਸੰਧੂ ਦੇ ਕਤਲ 'ਤੇ ਕੁੱਲੜ੍ਹ ਪਿੱਜ਼ਾ ਕੱਪਲ ਦੇ ਸਹਿਜ ਅਰੋੜਾ ਦਾ ਬਿਆਨ, ਪੰਜਾਬ ਛੱਡਣ ਦੀ ਦੱਸੀ ਵਜ੍ਹਾ

ਖੇਤਾਂ ਤੋਂ ਇਕੱਲੇ ਵਾਪਸ ਆਉਂਦੇ ਹੋਏ ਸਰਪੰਚ 'ਤੇ ਵਰ੍ਹਾਈਆਂ ਗਈਆਂ ਗੋਲ਼ੀਆਂ
ਜਾਣਕਾਰੀ ਮੁਤਾਬਕ ਕ੍ਰਿਸ਼ਨਾ ਨਗਰ (ਘੁਮਾਰ ਮੰਡੀ) ਦੇ ਰਹਿਣ ਵਾਲੇ 60 ਸਾਲਾ ਸਾਬਕਾ ਸਰਪੰਚ ਨਵਤੇਜ ਸਿੰਘ ਨੀਟੂ ਸ਼ਨੀਵਾਰ ਸ਼ਾਮ ਨੂੰ ਆਪਣੀ 30-35 ਏਕੜ ਜ਼ਮੀਨ 'ਤੇ ਚੱਲ ਰਹੇ ਕੰਮ ਦੀ ਨਿਗਰਾਨੀ ਕਰਨ ਲਈ ਮੰਨੇਵਾਲ ਪਿੰਡ ਗਏ ਸਨ। ਉਨ੍ਹਾਂ ਦਾ ਵਕੀਲ ਪੁੱਤਰ ਆਮ ਤੌਰ 'ਤੇ ਉਨ੍ਹਾਂ ਦੇ ਨਾਲ ਹੁੰਦਾ ਸੀ ਪਰ ਸ਼ਨੀਵਾਰ ਨੂੰ ਕਿਸੇ ਕਾਰਨ ਕਰਕੇ ਉਹ ਉਨ੍ਹਾਂ ਨਾਲ ਨਹੀਂ ਗਿਆ ਅਤੇ ਨਵਤੇਜ ਸਿੰਘ ਆਪਣੀ ਇਨੋਵਾ ਕਾਰ ਵਿੱਚ ਇਕੱਲੇ ਘਰ ਵਾਪਸ ਆ ਰਹੇ ਸਨ। ਸ਼ਾਮ ਸਾਢੇ 6 ਜਦੋਂ ਇਨੋਵਾ ਕਾਰ ਲਾਡੋਵਾਲ ਟੋਲ ਪਲਾਜ਼ਾ ਪਾਰ ਕਰਕੇ ਸਾਊਥ ਸਿਟੀ ਰੋਡ ਪੁਲ ਵੱਲ ਮੁੜੀ ਤਾਂ ਪੰਜਾਬ ਫੂਡ ਦਫ਼ਤਰ ਨੇੜੇ ਉਡੀਕ ਕਰ ਰਹੇ ਦੋ ਬਾਈਕ ਸਵਾਰ ਸ਼ੂਟਰਾਂ ਨੇ ਕਾਰ ਨੂੰ ਘੇਰ ਲਿਆ। ਹਮਲਾਵਰਾਂ ਨੇ ਇਨੋਵਾ ਦੇ ਡਰਾਈਵਰ ਵਾਲੇ ਪਾਸੇ ਨੂੰ ਨਿਸ਼ਾਨਾ ਬਣਾਇਆ ਅਤੇ ਗੋਲ਼ੀਆਂ ਚਲਾ ਕੇ ਖਿੜਕੀ ਨੂੰ ਤੋੜ ਦਿੱਤਾ ਅਤੇ ਨਵਤੇਜ ਸਿੰਘ ਨੂੰ ਗੋਲ਼ੀਆਂ ਮਾਰ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ। 

ਇਹ ਵੀ ਪੜ੍ਹੋ: ਪਰਗਟ ਸਿੰਘ ਨੂੰ ਹੀ ਕਿਉਂ ਬਣਾਇਆ ਗਿਆ PPCC ਦਾ ਪ੍ਰਧਾਨ! ਜਾਣੋ ਆਖ਼ਰੀ ਸਮੇਂ ਕਿਵੇਂ ਪਲਟ ਗਿਆ ਫ਼ੈਸਲਾ

ਘਟਨਾ ਡੈਸ਼ਬੋਰਡ ਕੈਮਰੇ 'ਚ ਕੈਦ, ਸ਼ੂਟਰ ਦਾ ਚਿਹਰਾ ਹੋਇਆ ਬੇਨਕਾਬ
ਘਟਨਾ ਤੋਂ ਬਾਅਦ ਸਥਾਨਕ ਰਾਹਗੀਰਾਂ ਨੇ ਨਵਤੇਜ ਨੂੰ ਡੀ. ਐੱਮ. ਸੀ. ਹਸਪਤਾਲ ਪਹੁੰਚਾਇਆ ਪਰ ਡਾਕਟਰਾਂ ਨੇ ਬਹੁਤ ਜ਼ਿਆਦਾ ਖ਼ੂਨ ਵਹਿਣ ਕਾਰਨ ਨਵਤੇਜ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਇਸ ਕਤਲ 'ਚ ਸਭ ਤੋਂ ਮਹੱਤਵਪੂਰਨ ਅਤੇ ਠੋਸ ਤਕਨੀਕੀ ਸਬੂਤ ਮ੍ਰਿਤਕ ਦੀ ਇਨੋਵਾ ਕਾਰ 'ਚ ਲੱਗਾ ਡੈਸ਼ਬੋਰਡ ਕੈਮਰਾ ਹੈ। ਪੂਰੀ ਘਟਨਾ ਡੈਸ਼ਕੈਮ ਵਿਚ ਰਿਕਾਰਡ ਹੋਈ। ਫੁਟੇਜ 'ਚ ਸਾਫ਼ ਵਿਖਾਈ ਦੇ ਰਿਹਾ ਹੈ ਕਿ ਦੋ ਨੌਜਵਾਨ ਇਕ ਬਾਈਕ 'ਤੇ ਸਵਾਰ ਹੋ ਕੇ ਗੱਡੀ ਵੱਲ ਆਉਂਦੇ ਹਨ, ਪਿੱਛੇ ਮੁੜਦੇ ਹਨ ਅਤੇ ਉਨ੍ਹਾਂ ਦੇ ਪਿੱਛੇ ਬੈਠਾ ਸ਼ੂਟਰ ਪਿਸਤੌਲ ਕੱਢਦਾ ਹੈ ਅਤੇ ਗੋਲੀਬਾਰੀ ਸ਼ੁਰੂ ਕਰ ਦਿੰਦਾ ਹੈ। ਪੁਲਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਪੁਸ਼ਟੀ ਕੀਤੀ ਕਿ ਡੈਸ਼ਕੈਮ ਨੇ ਸ਼ੂਟਰਾਂ ਦੇ ਚਿਹਰੇ ਸਾਫ਼-ਸਾਫ਼ ਫੜ ਲਏ ਹਨ ਅਤੇ ਇਸ ਦੇ ਆਧਾਰ 'ਤੇ ਇਕ ਸ਼ੂਟਰ ਦੀ ਪਛਾਣ ਕਰ ਲਈ ਗਈ ਹੈ।

ਇਹ ਵੀ ਪੜ੍ਹੋ: ਡਾ. ਮਨਮੋਹਨ ਸਿੰਘ ਦੇ ਪਰਿਵਾਰ ਨੂੰ ਮਿਲੇ ਪੰਜਾਬ ਕਾਂਗਰਸ ਦੇ ਨਵੇਂ ਪ੍ਰਧਾਨ ਪਰਗਟ ਸਿੰਘ, ਪਤਨੀ ਨਾਲ ਕੀਤੀ ਮੁਲਾਕਾਤ

ਦਾਦਾ ਦੇ ਸਮੇਂ ਤੋਂ ਚੱਲ ਰਿਹਾ ਸੀ 78 ਏਕੜ ਜ਼ਮੀਨ ਦਾ ਸਿਵਲ ਵਿਵਾਦ
ਪੁਲਸ ਕਮਿਸ਼ਨਰ ਸਵਪਨ ਸ਼ਰਮਾ ਨੇ ਕਤਲ ਦਾ ਪਰਦਾਫ਼ਾਸ਼ ਕਰਦੇ ਹੋਏ ਕਿਹਾ ਕਿ ਦੋਵਾਂ ਪਰਿਵਾਰਾਂ ਦੇ ਦਾਦਾ ਸਕੇ ਭਰਾ ਸਨ। ਇਕ ਪਰਿਵਾਰ ਕੋਲ ਲਗਭਗ 34 ਏਕੜ ਅਤੇ ਦੂਜੇ ਕੋਲ 44 ਏਕੜ ਜ਼ਮੀਨ ਸੀ। ਦੋਵਾਂ ਧਿਰਾਂ ਦੀਆਂ ਜ਼ਮੀਨਾਂ ਨਾਲ ਲੱਗਦੀਆਂ ਹਨ ਅਤੇ ਉਨ੍ਹਾਂ ਵਿਚਕਾਰ ਸਿਵਲ ਕੇਸ ਸਥਾਨਕ ਅਦਾਲਤਾਂ ਤੋਂ ਲੈ ਕੇ ਮਾਨਯੋਗ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਤੱਕ ਚੱਲ ਰਹੇ ਹਨ। ਪਹਿਲਾਂ ਵੀ ਦੋਵਾਂ ਪਰਿਵਾਰਾਂ ਵਿਚਕਾਰ ਟਕਰਾਅ, ਘੇਰਾਬੰਦੀ ਅਤੇ ਧਮਕੀਆਂ ਦੇ ਕਈ ਮਾਮਲੇ ਸਾਹਮਣੇ ਆਏ ਹਨ। ਸ਼ਨੀਵਾਰ ਨੂੰ ਮੌਕਾ ਵੇਖ ਕੇ ਵਿਰੋਧੀ ਪਰਿਵਾਰ ਨੇ ਸੁਪਾਰੀ ਦੇ ਕੇ ਇਸ ਖ਼ੂਨੀ ਵਾਰਦਾਤ ਨੂੰ ਅੰਜਾਮ ਦਿਲਵਾਇਆ। 

ਪਰਿਵਾਰ ਦੇ ਮੁਖੀ ਸਣੇ 7 ਨਾਮਜ਼ਦ, ਛਾਪੇਮਾਰੀ ਕਰ ਰਹੀਆਂ 6 ਵਿਸ਼ੇਸ਼ ਟੀਮਾਂ
ਮ੍ਰਿਤਕ ਦੇ ਪਰਿਵਾਰਕ ਮੈਂਬਰਾਂ ਦੇ ਬਿਆਨਾਂ ਅਤੇ ਸਬੂਤਾਂ ਦੇ ਆਧਾਰ 'ਤੇ ਕਮਿਸ਼ਨਰੇਟ ਪੁਲਸ ਨੇ ਮੁੱਖ ਸਾਜ਼ਿਸ਼ ਕਰਤਾ (ਵਿਰੋਧੀ ਪਰਿਵਾਰ ਦਾ ਮੁਖੀ) ਸਮੇਤ 7 ਮੁਲਜ਼ਮਾਂ ਵਿਰੁੱਧ ਕਤਲ ਅਤੇ ਅਸਲਾ ਐਕਟ ਤਹਿਤ ਮਾਮਲਾ ਦਰਜ ਕੀਤਾ ਹੈ। ਡੀ. ਸੀ. ਪੀ (ਸ਼ਹਿਰ) ਦੀ ਨਿਗਰਾਨੀ ਹੇਠ 6 ਵਿਸ਼ੇਸ਼ ਪੁਲਸ ਟੀਮਾਂ 24 ਘੰਟੇ ਛਾਪੇਮਾਰੀ ਕਰ ਰਹੀਆਂ ਹਨ। ਸਾਰੇ ਨਾਮਜ਼ਦ ਦੋਸ਼ੀ ਆਪਣੇ ਘਰਾਂ ਨੂੰ ਤਾਲੇ ਲਗਾ ਕੇ ਫਰਾਰ ਹਨ। ਪੁਲਸ ਕਮਿਸ਼ਨਰ ਨੇ ਸਪੱਸ਼ਟ ਕੀਤਾ ਕਿ ਗੋਲੀਬਾਰੀ ਕਰਨ ਵਾਲਿਆਂ ਅਤੇ ਸਾਜ਼ਿਸ਼ਕਾਰਾਂ ਦੇ ਅੱਗੇ ਅਤੇ ਪਿੱਛੇ ਸਬੰਧਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ, ਅਤੇ ਸਾਰੇ ਦੋਸ਼ੀਆਂ ਨੂੰ ਬਹੁਤ ਜਲਦੀ ਸਲਾਖਾਂ ਪਿੱਛੇ ਲਿਆਂਦਾ ਜਾਵੇਗਾ। ਸਰਪੰਚ ਦੀ ਮ੍ਰਿਤਕ ਦੇਹ ਦਾ ਪੋਸਟਮਾਰਟਮ ਕਰਵਾਇਆ ਜਾ ਰਿਹਾ ਹੈ। 

ਇਹ ਵੀ ਪੜ੍ਹੋ: 29 ਨਵੰਬਰ ਤੱਕ ਲੱਗੀਆਂ ਵੱਡੀਆਂ ਪਾਬੰਦੀਆਂ! ਨਵਾਂਸ਼ਹਿਰ ਜ਼ਿਲ੍ਹਾ ਮੈਜਿਸਟ੍ਰੇਟ ਨੇ ਹੁਕਮ ਕੀਤੇ ਜਾਰੀ

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ

👇Join us on Whatsapp channel👇

https://whatsapp.com/channel/0029Va94hsaHAdNVur4L170e