ਕੀ ਜ਼ਿਲ੍ਹਾ ਅੰਮ੍ਰਿਤਸਰ (ਦਿਹਾਤੀ) ਦੇ ਨਵੇਂ SSP ਹਿਲੌਰੀ ਅੱਗੇ ਲੱਗੇ ਚੁਨੌਤੀਆਂ ਦੇ ਢੇਰ ਦਾ ਸਾਹਮਣਾ ਕਰ ਪਾਉਣਗੇ?

ਮਜੀਠਾ/ਕੱਥੂਨੰਗਲ (ਸਰਬਜੀਤ ਵਡਾਲਾ) - ਭਾਰਤ-ਪਾਕਿ ਦੀ ਅੰਤਰ ਰਾਸ਼ਟਰੀ ਸਰਹੱਦ ਦੇ ਬਿਲਕੁਲ ਨਾਲ ਲੱਗਦੇ ਜ਼ਿਲ੍ਹਾ ਅੰਮ੍ਰਿਤਸਰ ਦਿਹਾਤੀ ਦੇ ਇਲਾਕਿਆਂ ਦੀ ਗੱਲ ਕਰੀਏ ਤਾਂ ਇਥੇ ਬਾਰਡਰ ਨਾਲ ਲੱਗਦਾ ਹੋਣ ਕਰਕੇ ਆਸਾਨੀ ਨਾਲ ਨਸ਼ੇ ਦੀ ਸਮਗਲਿੰਗ ਹੁੰਦੀ ਹੈ। ਖ਼ਾਸ ਕਰਕੇ ਬਾਰਡਰ ਪਾਰ ਤੋਂ ਹੈਰੋਇਨ ਦੀਆਂ ਵੱਡੀਆਂ ਖੇਪਾਂ ਪਾਕਿ ਨਸ਼ਾ ਤਸਕਰ ਬਾਰਡਰ ਰਾਹੀਂ ਭਾਰਤ ਵਿਚ ਭੇਜਦੇ ਰਹਿੰਦੇ ਹਨ। ਫਿਰ ਵੀ ਸਾਡੀ ਪੁਲਸ ਪਾਕਿ ਸਮਗਲਰਾਂ ਦੇ ਮਨਸੂਬਿਆਂ ਨੂੰ ਨਾਕਾਮ ਕਰਨ ਵਿਚ ਕਈ ਵਾਰ ਸਫਲ ਹੋਈ ਹੈ ਪਰ ਹੁਣ ਜਿੰਨ੍ਹਾਂ ਮੁੱਦਿਆਂ ਨੂੰ ਅਸੀਂ ਅੱਜ ਜਗ ਬਾਣੀ ਦੇ ਮਾਧਿਅਮ ਰਾਹੀਂ ਉਜਾਗਰ ਕਰਨ ਜਾ ਰਹੇ ਹਾਂ। 

ਮਹਿਜ਼ੇ ਨਵੇਂ ਆਏ ਜ਼ਿਲ੍ਹਾ ਅੰਮ੍ਰਿਤਸਰ (ਦਿਹਾਤੀ) ਦੇ ਐੱਸ.ਐੱਸ.ਪੀ ਦੀਪਕ ਹਿਲੌਰੀ ਲਈ ਕਿਸੇ ਚੁਨੌਤੀ ਤੋਂ ਘੱਟ ਨਹੀਂ ਹਨ। ਇਸੇ ਕਰਕੇ ਹੁਣ ਇਹ ਦੇਖਣਾ ਹੋਵੇਗਾ ਕਿ ਦੀਪਕ ਹਿਲੌਰੀ ਆਪਣੇ ਐੈੱਸ.ਐੱਸ.ਪੀ ਦੇ ਇਸ ਕਾਰਜਕਾਲ ਦੌਰਾਨ ਆਪਣੇ ਅੱਗੇ ਲੱਗੇ ਚੁਨੌਤੀਆਂ ਦੇ ਢੇਰਾਂ ਦਾ ਸਾਹਮਣਾ ਕਰਦੇ ਹੋਏ ਇਸ ਨੂੰ ਹੱਲ ਕਰ ਪਾਉਂਦੇ ਹਨ ਜਾਂ ਨਹੀਂ। ਦੂਜਾ ਸਰਹੱਦੀ ਖੇਤਰ ਹੋਣ ਕਰਕੇ ਇਥੇ ਹੁੰਦੀ ਨਸ਼ਿਆਂ ਦੀ ਵਿਕਰੀ ’ਤੇ ਵੀ ਕੀ ਨਵੇਂ ਪੁਲਸ ਮੁਖੀ ਰੋਕ ਲਗਾਉਣ ਵਿਚ ਸਫਲ ਹੋਣਗੇ? ਇਹ ਤਾਂ ਹੁਣ ਆਉਣ ਵਾਲੇ ਕੁਝ ਦਿਨਾਂ ਵਿਚ ਨਵੇਂ ਪੁਲਸ ਮੁਖੀ ਦੀ ਕਾਰਗੁਜ਼ਾਰੀ ਬਾਰੇ ਪਤਾ ਚੱਲ ਜਾਵੇਗਾ। 

ਨਸ਼ੇ ਦੇ ਵੱਡੇ ਸੌਦਾਗਰਾਂ ਦਾ ਪਹੁੰਚ ਤੋਂ ਬਾਹਰ ਹੋਣਾ:- 
ਜ਼ਿਲ੍ਹਾ ਅੰਮ੍ਰਿਤਸਰ (ਦਿਹਾਤੀ) ਅਧੀਨ ਆਉਂਦੇ ਇਲਾਕਿਆਂ ਵਿਚ ਪਿਛਲੇ ਸਮੇਂ ਤੋਂ ਹੋ ਰਹੀਆਂ ਕਈ ਲੁੱਟਾਂ-ਖੋਹਾਂ ਆਦਿ ਦੀਆਂ ਵਾਰਦਾਤਾਂ ਨੇ ਲੋਕ ਮਨਾਂ ਅੰਦਰ ਡਰ ਅਤੇ ਸਹਿਮ ਪੈਦਾ ਕਰਕੇ ਰੱਖ ਦਿੱਤਾ ਹੈ। ਆਧੁਨਿਕ ਢੰਗ ਨਾਲ ਚੋਰੀਆਂ ਕਰਨ ਵਾਲੇ ਚੋਰਾਂ ਨੂੰ ਫੜਣ ਲਈ ਪੁਲਸ ਨੂੰ ਖ਼ੂਬ ਪਸੀਨਾ ਬਹਾਉਣਾ ਪੈ ਰਿਹਾ ਹੈ। ਪੁਲਸ ਦੀਆਂ ਅਨੇਕਾਂ ਕੋਸ਼ਿਸ਼ਾਂ ਅਤੇ ਦਾਅਵਿਆਂ ਦੇ ਬਾਵਜੂਦ ਨਸ਼ੇ ਦੇ ਵੱਡੇ ਸੌਦਾਗਰ ਪਹੁੰਚ ਤੋਂ ਬਾਹਰ ਹਨ।

ਪਾਕਿ ਦੀ ਸਰਹੱਦ ਨੇੜੇ ਹੋਣ ਦਾ ਨੁਕਸਾਨ :  
ਵੈਸੇ ਤਾਂ ਗੁਆਂਢ ਦਾ ਸਾਥ ਰਿਸ਼ਤੇਦਾਰ ਨਾਲੋਂ ਅਹਿਮ ਮੰਨਿਆ ਜਾਂਦਾ ਹੈ ਪਰ ਸਾਡਾ ਗੁਆਂਢੀ ਮੁਲਖ ਪਾਕਿਸਤਾਨ ਇੰਨ੍ਹਾ ਨੀਚ ਅਤੇ ਘਟੀਆ ਹੈ ਕਿ ਉਹ ਸਰਹੱਦ ਦੇ ਨੇੜਲੇ ਇਲਾਕਿਆਂ ਵਿਚ ਘਿਣੌਨੇ ਤੋਂ ਘਿਣੌਨਾ ਕੰਮ ਕਰਨ ਲਈ ਇਕ ਵਾਰ ਵੀ ਨਹੀਂ ਸੋਚਦਾ। ਇਸਦਾ ਖਮਿਆਜਾ ਜ਼ਿਲ੍ਹਾ ਅੰਮ੍ਰਿਤਸਰ ਦਿਹਾਤੀ ਅਧੀਨ ਆਉਂਦੇ ਵੱਖ-ਵੱਖ ਥਾਣਿਆਂ ਦੀ ਪੁਲਸ ਨੂੰ ਭੁਗਤਨਾ ਪੈ ਰਿਹਾ ਹੈ। ਸ਼ਾਇਦ ਸਰਹੱਦ ਕਰਕੇ ਇਥੇ ਨਸ਼ੇ ਦਾ ਕਾਰੋਬਾਰ ਵਧਿਆ ਹੈ, ਜਿਸ ਨੂੰ ਕੰਟਰੋਲ ਕਰਨ ਲਈ ਨਵੇਂ ਪੁਲਸ ਮੁੱਖੀ ਹਿਲੌਰੀ ਨੂੰ ਕੋਈ ਨਿਵੇਕਲਾਂ ਅਤੇ ਉਸਾਰੂ ਢੰਗ ਤਰੀਕਾ ਅਪਣਾਉਣਾ ਪਵੇਗਾ।

ਲੀਡਰਾਂ ਦੀ ਸਿੱਧੀ ਦਖਲਅੰਦਾਜ਼ੀ:  
ਜ਼ਿਲ੍ਹਾ ਅੰਮ੍ਰਿਤਸਰ (ਦਿਹਾਤੀ) ਵਿਚ ਵਿਧਾਨ ਸਭਾ ਹਲਕਾ ਮਜੀਠਾ, ਅਜਨਾਲਾ, ਰਾਜਾਸਾਂਸੀ, ਜੰਡਿਆਲਾ ਗੁਰੂ, ਅਟਾਰੀ ਤੇ ਬਾਬਾ ਬਕਾਲਾ ਦੇ ਸਿਆਸੀ ਲੀਡਰਾਂ ਦੀ ਸਿੱਧੀ ਦਖਲਅੰਦਾਜ਼ੀ ਹੁੰਦੀ ਰਹੀ ਹੈ। ਭਵਿੱਖ ਵਿਚ ਇਸ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ। ਇਕ ਗੱਲ ਹੋਰ ਇੰਨ੍ਹਾਂ ਹਲਕਿਆਂ ਦੇ ਲਗਭਗ ਸਾਰੇ ਸਿਆਸੀ ਲੀਡਰ ਸਿਆਸਤ ਦੇ ਪੁਰਾਣੇ ਧੁਰੰਤਰ ਹਨ, ਜਿੰਨ੍ਹਾ ਦੀ ਆਪਣੀ-ਆਪਣੀ ਪਾਰਟੀ ਵਿਚ ਪੂਰੀ ਤੂਤੀ ਬੋਲਦੀ ਹੈ। ਇਸ ਲਈ ਹਰੇਕ ਲੀਡਰ ਨੂੰ ਸੈਟਿਸਫਾਇਡ ਕਰਨਾ ਨਵੇਂ ਪੁਲਸ ਮੁਖੀ ਹਿਲੌਰੀ ਅੱਗੇ ਛੋਟੀ ਚੁਣੌਤੀ ਨਹੀਂ ਹੋਵੇਗੀ। 

ਨਾਜ਼ਾਇਜ਼ ਨਸ਼ਿਆਂ ਦੀ ਵਿਕਰੀ : 
ਐੱਸ.ਐੱਸ.ਪੀ ਸਾਹਿਬ! ਇਸ ਦਿਹਾਤੀ ਖੇਤਰ ਅਧੀਨ ਆਉਂਦੇ ਪਿੰਡਾਂ ਅਤੇ ਕਸਬਿਆਂ ਵਿਚ ਨਸ਼ਿਆਂ ਦੀ ਨਜਾਇਜ਼ ਵਿਕਰੀ ਤੁਹਾਡੇ ਲਈ ਇਕ ਵੱਡੀ ਚੁਣੌਤੀ ਹੈ। ਸੂਤਰਾਂ ਮੁਤਾਬਕ ਇਸ ਵੇਲੇ ਨਾਜ਼ਾਇਜ ਸ਼ਰਾਬ ਤੋਂ ਇਲਾਵਾ ਕਈ ਹੋਰ ਤਰਾਂ ਦੇ ਨਸ਼ੇ ਆਮ ਵਿਕ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਅਜਿਹੇ ਨਸ਼ੇ ਵੇਚਣ ਵਾਲਿਆਂ ਨੂੰ ਜਿਥੇ ਕੁਝ ਕੁ ਰਾਜਨੀਤਕ ਤਾਕਤਾਂ ਦਾ ਸਮਰਥਨ ਪ੍ਰਾਪਤ ਹੈ, ਉਥੇ ਕਈਆਂ ਨੂੰ ਪੁਲਸ ਵਿਭਾਗ ਦੇ ਕਈ ਲਾਲਚੀ ਕਿਸਮ ਦੇ ਅਧਿਕਾਰੀਆਂ ਤੇ ਕਰਮਚਾਰੀਆਂ ਦਾ ਸਾਥ ਵੀ ਮਿਲਦਾ ਰਹਿੰਦਾ ਹੈ। ਇਸ ਕਰਕੇ ਇਮਾਨਦਾਰ ਪੁਲਸ ਕਰਮਚਾਰੀ ਆਪਣਾ ਫਰਜ਼ ਨਿਭਾਉਣ ਤੋਂ ਖੁੰਝ ਜਾਂਦੇ ਹਨ। 

ਚੋਰਾਂ ਤੇ ਲੁਟੇਰਿਆਂ ਦਾ ਕਹਿਰ ਜਾਰੀ: 
ਦੱਸਣਯੋਗ ਹੈ ਕਿ ਜ਼ਿਲ੍ਹਾ ਅੰਮ੍ਰਿਤਸਰ ਦੇ ਦਿਹਾਤੀ ਖੇਤਰ ਵਿਚ ਪੁਲਸ ਦਾ ਰਾਜ ਨਹੀਂ ਸਗੋਂ ਚੋਰਾਂ ਤੇ ਲੁਟੇਰਿਆਂ ਦਾ ਰਾਜ ਹੈ। ਚੋਰ ਲੋਕਾਂ ਦੇ ਘਰਾਂ ਦੁਕਾਨਾਂ ਨੂੰ ਨਿਸ਼ਾਨਾ ਬਣਾ ਕੇ ਲੱਖਾਂ ਰੁਪਏ ਚੋਰੀ ਕਰਕੇ ਲੈ ਜਾਂਦੇ ਹਨ। ਲੁਟੇਰੇ ਦਿਨ ਦਿਹਾੜੇ ਰਾਹਗੀਰਾਂ ਨੂੰ ਆਪਣੇ ਨੋਕੀਲੇ ਹਥਿਆਰਾਂ ਨਾਲ ਬੰਦੀ ਬਣਾ ਕੇ ਉਨ੍ਹਾਂ ਨੂੰ ਲੁੱਟਦੇ ਹਨ। ਕਈਆਂ ਨੂੰ ਚੰਦ ਪੈਸਿਆਂ ਦੇ ਖਾਤਿਰ ਮੌਤ ਦੇ ਘਾਟ ਵੀ ਉੱਤਾਰ ਦਿੰਦੇ ਹਨ। ਹੁਣ ਇਹ ਦੇਖਣਾ ਹੋਵੇਗਾ ਕੀ ਨਵੇਂ ਪੁਲਸ ਮੁਖੀ ਹਿਲੋਰੀ ਵਲੋਂ ਚੋਰਾਂ ਤੇ ਲੁਟੇਰਿਆਂ ਦਾ ਲੋਕ ਮਨਾਂ ਵਿਚ ਪਾਇਆ ਜਾਂਦਾ ਡਰ ਤੇ ਸਹਿਮ ਥੰਮਦਾ ਹੈ ਜਾਂ ਫਿਰ ਇਸੇ ਤਰ੍ਹਾਂ ਲੁਟੇਰੇ ਤੇ ਚੋਰ ਆਪਣਾ ਕਹਿਰ ਜਾਰੀ ਰੱਖਦੇ ਹੋਏ ਲੋਕਾਂ ਨੂੰ ਲੁੱਟਦੇ ਰਹਿਣਗੇ।

ਪੁਲਸ ਦੀ ਗਸ਼ਤ ਨਾ ਮਾਤਰ:
ਜ਼ਿਲ੍ਹਾ ਅੰਮ੍ਰਿਤਸਰ ਦਿਹਾਤੀ ਵਿਚ ਜਿੰਨੇ ਥਾਣੇ ਆਉਂਦੇ ਹਨ, ਉਨ੍ਹਾਂ ਅਧੀਨ ਇਲਾਕਿਆਂ ਵਿਚ ਇਕ ਤਾਂ ਪੁਲਸ ਦੀ ਗਸ਼ਤ ਨਾ ਮਾਤਰ ਹੈ। ਪੁਲਸ ਮਹਿਕਮੇ ਵਲੋਂ ਬਣਾਏ ਗਏ ਨਾਕਿਆਂ ’ਤੇ ਪੁਲਸ ਕਰਮਚਾਰੀ ਤਾਇਨਾਤ ਨਾ ਕੀਤੇ ਜਾਣ ਕਰਕੇ ਲੁੱਟਾਂ-ਖੋਹਾਂ ਹੋਣੀਆਂ ਆਮ ਜਿਹੀ ਗੱਲ ਹੈ। ਪੁਲਸ ਮੁਖੀ ਇਸ ਪਾਸੇ ਵਿਸ਼ੇਸ਼ ਧਿਆਨ ਦਿੰਦੇ ਹੋਏ ਲੋਕ ਮਨਾਂ ਵਿਚ ਆਪਣੀ ਪੈਂਠ ਬਣਾਉਣੀ ਪਵੇਗੀ ਤਾਂ ਜੋ ਲੋਕਾਂ ਦਾ ਪੁਲਸ ’ਤੇ ਵਿਸ਼ਵਾਸ ਬਣਿਆ ਰਹੇ। 

17 ਥਾਣਿਆਂ ਤੇ 31 ਪੁਲਸ ਚੌਕੀਆਂ ਅਪਰਾਧ ਨੂੰ ਨਹੀਂ ਰੋਕ ਪਾਈਆਂ : 
ਉਕਤ ਜ਼ਿਲ੍ਹੇ ਵਿਚ ਦਿਨੋਂ-ਦਿਨ ਪਨਪਦੇ ਜਾ ਰਹੇ ਕਰਾਈਮ ਨੂੰ ਜੜ੍ਹੋਂ ਖ਼ਤਮ ਕਰਨ ਦਾ ਮੁੱਢਲਾ ਫਰਜ਼ ਨਿਭਾਉਣ ਦੇ ਦਾਅਵੇ ਤਾਂ ਜ਼ਿਲ੍ਹਾ ਅੰਮ੍ਰਿਤਸਰ ਦਿਹਾਤੀ ਦੀ ਪੁਲਸ ਲੱਖ ਕਰਦੀ ਹੈ। ਇਸ ਦਿਹਾਤੀ ਜ਼ਿਲ੍ਹੇ ਵਿਚ ਪੈਂਦੇ 17 ਥਾਣਿਆਂ ਅਤੇ 31 ਪੁਲਸ ਚੌਕੀਆਂ ਵਿੱਚ ਤਾਇਨਾਤ ਪੰਜਾਬ ਪੁਲਸ ਦੇ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਦੀ ਗਿਣਤੀ ਸੈਂਕੜਿਆਂ ਦੇ ਹਿਸਾਬ ਨਾਲ ਹੈ। ਇਸ ਦੇ ਬਾਵਜੂਦ ਛੋਟੀਆਂ-ਮੋਟੀਆਂ ਹੁੰਦੀਆਂ ਚੋਰੀਆਂ ਅਤੇ ਲੁੱਟਾਂ-ਖੋਹਾਂ ਦੀਆਂ ਵਾਰਦਾਤਾਂ ਨੂੰ ਉਹ ਅਜੈ ਤੱਕ ਠੱਲ੍ਹ ਨਹੀਂ ਪਾ ਸਕੇ। ਇਹ ਪੁਲਸ ਵਿਭਾਗ ਲਈ ਬਹੁਤ ਸ਼ਰਮ ਵਾਲੀ ਗੱਲ ਹੈ। ਕੀ ਨਵੇਂ ਐੱਸ.ਐੱਸ.ਪੀ ਦੀਪਕ ਹਿਲੌਰੀ ਦਿਹਾਤੀ ਖੇਤਰ ਵਿਚ ਵਧਦੇ ਕਰਾਈਮ ਨੂੰ ਰੋਕਣ ਲਈ ਕੋਈ ਨਵੀਂ ਯੁਕਤ ਲੜਾਉਣਗੇ, ਇਹ ਤਾਂ ਹੁਣ ਐੱਸ.ਐੱਸ.ਪੀ ’ਤੇ ਡਿਪੈਂਡ ਕਰਦਾ ਹੈ ਕਿ ਉਨ੍ਹਾਂ ਨੇ ਕਰਾਈਮ ਨੂੰ ਕਿਵੇਂ ਖਤਮ ਕਰਕੇ ਲੋਕਾਂ ਨੂੰ ਡਰ ਮੁਕਤ ਮਾਹੌਲ ਦੇਣਾ ਹੈ।

ਚੋਣਾਂ ਨੂੰ ਅਮਨ ਅਮਾਨ ਨਾਲ ਸੰਪੰਨ ਕਰਵਾਉਣਾ ਹੋਵੇਗਾ ਮੁਖ ਚੁਣੌਤੀ : 
ਇਥੇ ਦੱਸਣਾ ਬਣਦਾ ਹੈ ਕਿ ਹਾਲ ਵਿਚ ਹੋਣ ਵਾਲੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਨੂੰ ਪੂਰੇ ਅਮਨ ਅਮਾਨ ਨਾਲ ਸੰਪੰਨ ਕਰਵਾਉਣਾ ਨਵੇਂ ਆਏ ਪੁਲਸ ਮੁਖੀ ਹਿਲੌਰੀ ਲਈ ਮੁਖ ਚੁਣੌਤੀ ਹੋਵੇਗੀ। ਅਕਸਰ ਜ਼ਿਲ੍ਹਾ ਅੰਮ੍ਰਿਤਸਰ ਦਿਹਾਤੀ ਦੇ ਇਲਾਕਿਆਂ ਵਿਚ ਚੋਣਾਂ ਸਮੇਂ ਲੜਾਈ ਝਗੜੇ ਹੋਣੇ ਆਮ ਜਿਹੀ ਗੱਲ ਹੋ ਜਾਂਦੀ ਹੈ। ਇਸ ਲਈ ਇਸ ਸਥਿਤੀ ਨਾਲ ਨਜਿੱਠਣ ਲਈ ਐੱਸ.ਐੱਸ.ਪੀ ਨੂੰ ਕੋਈ ਅਜਿਹੀ ਵਿਉਂਤਬੰਦੀ ਬਣਾਉਣੀ ਹੋਵੇਗੀ, ਜਿਸ ਦੇ ਚਲਦਿਆਂ ਚੋਣਾਂ ਸਮੇਂ ਨਾ ਕਿਸੇ ਤਰ੍ਹਾਂ ਦੀ ਬੂਥ ਕੈਪਚਰਿੰਗ ਹੋਵੇ ਅਤੇ ਨਾ ਹੀ ਸਿਆਸੀ ਪਾਰਟੀਆਂ ਦੇ ਵਰਕਰ ਮਾਹੌਲ ਨੂੰ ਤਨਾਅਪੂਰਨ ਬਣਾ ਸਕਣ।