ਸਬਜ਼ੀ ਵਿਕਰੇਤਾਵਾਂ ਨੇ ਕੀਤਾ ਚੇਅਰਮੈਨ ਮੰਡੀ ਬੋਰਡ ਦੀ ਕੋਠੀ ਦਾ ਘਿਰਾਓ
Sunday, Jul 08, 2018 - 04:51 AM (IST)
ਪਟਿਆਲਾ, (ਜੋਸਨ)– ਪੰਜਾਬ ਦੀ ਸਭ ਤੋਂ ਵੱਡੀ ਆਧੁਨਿਕ ਸਹੂਲਤਾਂ ਨਾਲ ਲੈਸ ਸਨੌਰ ਅਤੇ ਰਾਘੋਮਾਜਰਾ ਸਬਜ਼ੀ ਮੰਡੀ ਦੇ ਨਿੱਜੀਕਰਨ ਦੇ ਵਿਰੋਧ ਵਿਚ ਅੱਜ ਸਬਜ਼ੀ ਵਿਕਰੇਤਾਵਾਂ ਨੇ ਚੇਅਰਮੈਨ ਮੰਡੀ ਬੋਰਡ ਦੀ ਕੋਠੀ ਦਾ ਘਿਰਾਓ ਕੀਤਾ ਅਤੇ ਸਰਕਾਰ ਖਿਲਾਫ਼ ਤਿੱਖੀ ਨਾਅਰੇਬਾਜ਼ੀ ਕਰਦਿਆਂ ਆਪਣਾ ਰੋਸ ਜਤਾਇਆ।
ਇਸ ਮੌਕੇ ਉਨ੍ਹਾਂ ਕਾਫੀ ਦੇਰ ਤੱਕ ਸਰਕਾਰ ਅਤੇ ਚੇਅਰਮੈਨ ਵਿਰੁੱਧ ਨਾਅਰੇਬਾਜ਼ੀ ਕੀਤੀ ਅਤੇ ਆਪਣਾ ਰੋਸ ਜਤਾਇਆ। ਇਸ ਦੌਰਾਨ ਉਨ੍ਹਾਂ ਨੇ ਆਪਣਾ ਮੰਗ-ਪੱਤਰ ਚੇਅਰਮੈਨ ਦੇ ਨਿੱਜੀ ਸਕੱਤਰ ਨੂੰ ਵੀ ਸੌਂਪਿਆ। ਇਸ ਦੌਰਾਨ ਧਰਨਾਕਾਰੀਆਂ ਦਾ ਕਹਿਣਾ ਹੈ ਕੀ ਸਰਕਾਰ ਸਬਜ਼ੀ ਮੰਡੀ ਦੀ ਫਡ਼੍ਹ ਨੂੰ ਪ੍ਰਾਈਵੇਟ ਕਰਨ ਦੀ ਯੋਜਨਾ ਬਣਾ ਰਹੀ ਹੈ। ਜਾਣਕਾਰੀ ਦਿੰਦੇ ਹੋਏ ਸਬਜ਼ੀ ਮੰਡੀ ਅੰਦਰ ਫਡ਼੍ਹੀ ਲਾਉਣ ਦਾ ਕੰਮ ਕਰਨ ਵਾਲੇ ਦੁਕਾਨਦਾਰ ਸੁਰੇਸ਼ ਸਿੰਗਲਾ, ਹਨੀ ਗੋਇਲ, ਟਹਿਲ ਸਿੰਘ ਨੇ ਦੱਸਿਆ ਕਿ ਜਦੋਂ ਤੋਂ ਸਨੌਰ-ਪਟਿਆਲਾ ਰੋਡ ’ਤੇ ਸਰਕਾਰ ਵਲੋਂ ਮੰਡੀ ਬਣਾਈ ਗਈ ਹੈ। ਉਸ ਦਿਨ ਤੋਂ ਹੀ ਉਹ ਮੰਡੀ ਅੰਦਰ ਅਾਪਣੀ ਦੁਕਾਨਦਾਰੀ ਕਰ ਕੇ ਅਾਪਣੇ ਪਰਿਵਾਰ ਦਾ ਪਾਲਣ ਪੋਸ਼ਣ ਕਰ ਰਹੇ ਹਾਂ। ਮੰਡੀ ਬੋਰਡ ਵਲੋਂ ਕਿਸੇ ਵੀ ਦੁਕਾਨਦਾਰ ਨੂੰ ਮੰਡੀ ਵਿਚ ਫਡ਼੍ਹੀ ਲਾ ਕੇ ਸਬਜ਼ੀ ਵੇਚਣ ਲਈ ਕੋਈ ਜਗ੍ਹਾ ਹੁਣ ਤੱਕ ਨਹੀਂ ਦਿੱਤੀ ਗਈ। ਉਹ ਅੱਜ ਤੱਕ ਆਡ਼੍ਹਤੀਆਂ ਦੀਆਂ ਦੁਕਾਨਾਂ ਅੱਗੇ ਬੈਠ ਕੇ ਅਾਪਣਾ ਗੁਜ਼ਾਰਾ ਕਰ ਰਹੇ ਹਨ। ਉਲਟਾ ਪੰਜਾਬ ਸਰਕਾਰ ਵਲੋਂ ਸਬਜ਼ੀ ਮੰਡੀ ਵਿਚ ਫਡ਼੍ਹੀਆਂ ਲਾਉਣ ਦਾ ਕੰਮ ਠੇਕੇ ’ਤੇ ਦੇ ਦਿੱਤਾ ਗਿਆ ਤੇ ਠੇਕੇਦਾਰ ਦੇ ਕਰਿੰਦਿਆਂ ਵਲੋਂ ਗਰੀਬ ਦੁਕਾਨਦਾਰਾਂ ਨਾਲ ਧੱਕੇਸ਼ਾਹੀ ਕੀਤੀ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਸਬਜ਼ੀ ਮੰਡੀ ਵਿਚ ਲੱਗਣ ਵਾਲੀਆਂ ਫਡ਼੍ਹੀਆਂ ਤੇ ਦੁਕਾਨਾਂ ਠੇਕੇ ਉੱਪਰ ਨਹੀਂ ਹੋਣੀਆਂ ਚਾਹੀਦੀਆਂ ਇਸ ਨਾਲ ਇਹ ਠੇਕੇਦਾਰ ਆਪਣਾ ਠੇਕਾ ਪੂਰਾ ਕਰਨ ਲਈ ਮਨਮਰਜ਼ੀ ਨਾਲ ਪਰਚੀਆਂ ਦੇ ਪੈਸੇ ਮੰਗਣਗੇ। ਇਸ ਪ੍ਰੇਸ਼ਾਨੀ ਨੂੰ ਦੂਰ ਕਰਨ ਲਈ ਜ਼ਿਲਾ ਪ੍ਰਸ਼ਾਸਨ ਤੋਂ ਮੰਗ ਕਰਦੇ ਹੋਏ ਕਿਹਾ ਕਿ ਠੇਕਾ ਸਿਸਟਮ ਬੰਦ ਕੀਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਮੰਡੀ ਵਿਚ 80 ਫੀਸਦੀ ਸਾਮਾਨ ਲੋਕ ਫਡ਼੍ਹੀਆਂ ਵਾਲਿਆਂ ਤੋਂ ਹੀ ਖਰੀਦਦੇ ਹਨ। ਜੇਕਰ ਇਹ ਸਾਮਾਨ ਦੀ ਖਰੀਦ ਨਹੀਂ ਕਰਨਗੇ ਤਾਂ ਕਿਸਾਨਾਂ ਦਾ ਬਹੁਤ ਬਡ਼ਾ ਨੁਕਸਾਨ ਹੋ ਸਕਦਾ ਹੈ। ਇਨ੍ਹਾਂ ਦੀ ਮੰਗ ਨੂੰ ਪਹਿਲ ਦੇ ਅਾਧਾਰ ’ਤੇ ਪੂਰਾ ਕੀਤਾ ਜਾਵੇ। ਸਬਜ਼ੀ ਵਿਕਰੇਤਾਵਾਂ ਨੇ ਕਿਹਾ ਕਿ ਫੀਸ ਰੇਟ ਇਕ ਹੋਣਾ ਚਾਹੀਦਾ ਹੈ, ਜਦਕਿ ਵੱਖ-ਵੱਖ ਰੇਟ ਤੈਅ ਕਰ ਕੇ ਫੀਸ ਦੀ ਵੱਧ ਵਸੂਲੀ ਕਰ ਕੇ ਅਧਿਕਾਰੀ ਸਾਡੀ ਕਿਰਤ ਨੂੰ ਲੁੱਟਣਾ ਚਾਹੁੰਦੇ ਹਨ, ਨਾਲ ਹੀ ਉਨ੍ਹਾਂ ਮੰਗ ਕੀਤੀ ਹੈ ਕਿ ਜੇਕਰ ਸਰਕਾਰ ਨੇ ਫੀਸ ਦਾ ਰੇਟ ਇਕ ਨਾ ਕੀਤਾ ਤਾਂ ਉਨ੍ਹਾਂ ਵਲੋਂ ਸੰਘਰਸ਼ ਹੋਰ ਤੇਜ਼ ਕੀਤਾ ਜਾਵੇਗਾ ਅਤੇ ਮੰਡੀ ਦੀ ਪੂਰੀ ਹਡ਼ਤਾਲ ਕੀਤੀ ਜਾਵੇਗੀ।
ਓਥੇ ਹੀ ਦੂਜੇ ਪਾਸੇ ਸਬਜ਼ੀ ਮੰਡੀ ਦੇ ਆਡ਼੍ਹਤੀ ਐਸੋਸੀਏਸ਼ਨ ਵਲੋਂ ਵੀ ਸਬਜ਼ੀ ਵਿਕਰੇਤਾਵਾਂ ਨੂੰ ਆਪਣਾ ਸਮਰਥਨ ਦਿੱਤਾ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਫਡ਼੍ਹ ਯੂਨੀਅਨ ਪਹਿਲਾਂ ਹੀ 50 ਰੁਪਏ ਫੀਸ ਪ੍ਰਤੀ ਫਡ਼੍ਹ ਮਾਰਕੀਟ ਕਮੇਟੀ ਨੂੰ ਦੇ ਰਹੀ ਹੈ।
