ਜਨਮਦਿਨ ਦੀ ਪਾਰਟੀ ਤੋਂ ਵਾਪਸ ਮੁੜਦੇ ਨੌਜਵਾਨਾਂ ਨਾਲ ਵੱਡਾ ਹਾਦਸਾ, ਬੇਕਾਬੂ ਹੋ ਕੇ ਨਹਿਰ 'ਚ ਡਿੱਗੀ ਕਾਰ (ਤਸਵੀਰਾਂ)
01/06/2023 3:37:03 PM
ਹਠੂਰ (ਸਰਬਜੀਤ ਭੱਟੀ) : ਲੁਧਿਆਣਾ ਦੇ ਪਿੰਡ ਡੱਲਾ ਕੋਲੋਂ ਲੰਘਦੀ ਨਹਿਰ 'ਚ ਕਾਰ ਸਮੇਤ 4 ਨੌਜਵਾਨਾਂ ਦੇ ਡਿੱਗ ਜਾਣ ਦੀ ਖ਼ਬਰ ਪ੍ਰਾਪਤ ਹੋਈ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਬੀਤੀ ਰਾਤ ਪਿੰਡ ਲੱਖਾ ਦੇ 4 ਨੌਜਵਾਨ ਮੱਲ੍ਹਾ ਪਿੰਡ 'ਚੋਂ ਜਨਮਦਿਨ ਮਨਾ ਕੇ ਪਿੰਡ ਡੱਲਾ ਵੱਲ ਨੂੰ ਕਾਰ 'ਤੇ ਸਵਾਰ ਹੋ ਕੇ ਵਾਪਸ ਆ ਰਹੇ ਸਨ। ਇਸ ਦੌਰਾਨ ਕਾਰ ਬੇਕਾਬੂ ਹੋ ਕੇ ਸਿੱਧੀ ਨਹਿਰ 'ਚ ਜਾ ਡਿੱਗੀ। ਕਾਰ 'ਚ ਸਵਾਰ 4 ਨੌਜਵਾਨਾਂ 'ਚੋਂ 2 ਨੌਜਵਾਨਾਂ ਨੂੰ ਤਾਂ ਬਾਹਰ ਕੱਢ ਲਿਆ ਗਿਆ ਪਰ ਬਾਕੀ 2 ਨੌਜਵਾਨ ਲਾਪਤਾ ਹੋ ਗਏ, ਜਿਨ੍ਹਾਂ ਦੀ ਭਾਲ ਕੀਤੀ ਜਾ ਰਹੀ ਹੈ।
ਨੌਜਵਾਨਾਂ ਦੀ ਭਾਲ ਕਰਨ ਸਮੇਂ ਗੱਲਬਾਤ ਕਰਦਿਆਂ ਸਮਾਜ ਸੇਵੀ ਪ੍ਰਧਾਨ ਨਿਰਮਲ ਸਿੰਘ ਧੀਰਾ ਡੱਲਾ ਨੇ ਦੱਸਿਆ ਕਿ ਇਹ ਘਟਨਾ ਬੀਤੀ ਰਾਤ ਕਰੀਬ 11 ਵਜੇ ਦੀ ਹੈ। ਜਦੋਂ ਪਿੰਡ 'ਚ ਇਸ ਬਾਰੇ ਪਤਾ ਲੱਗਾ ਤਾਂ ਉਹ ਤੁਰੰਤ ਨਹਿਰ 'ਤੇ ਪਹੁੰਚ ਗਏ ਅਤੇ ਬੰਟੀ, ਕਾਲੂ ਤੇ ਮੋਟੂ ਨੌਜਵਾਨਾਂ ਨੇ ਨਹਿਰ 'ਚ ਵੜ ਕੇ 2 ਨੌਜਵਾਨਾਂ ਲਖਵੀਰ ਤੇ ਮੋਨੂੰ ਨੂੰ ਬਚਾ ਲਿਆ। ਉਨ੍ਹਾਂ ਵੱਲੋਂ 2 ਨੌਜਵਾਨਾਂ ਦਿਲਪ੍ਰੀਤ ਤੇ ਸਤਨਾਮ ਦੀ ਭਾਲ ਜਾਰੀ ਹੈ।
ਪ੍ਰਧਾਨ ਨਿਰਮਲ ਸਿੰਘ ਧੀਰਾ ਨੇ ਬਚਾਅ 'ਚ ਲੱਗੇ ਡੱਲਾ ਦੇ ਨੌਜਵਾਨਾਂ ਬੰਟੀ, ਕਾਲੂ, ਮੋਟੂ, ਸੋਨੀ, ਸੀਰਾ ਤੇ ਹੋਰ ਨੌਜਵਾਨਾਂ ਦਾ ਧੰਨਵਾਦ ਕਰਦਿਆਂ ਅਜੋਕੀ ਨੌਜਵਾਨ ਪੀੜ੍ਹੀ ਨੂੰ ਅਪੀਲ ਕੀਤੀ ਕਿ ਉਹ ਆਵਾਜਾਈ ਦੇ ਨਿਯਮਾਂ ਦੀ ਪਾਲਣਾ ਕਰਨ ਅਤੇ ਸਮੇਂ ਸਿਰ ਘਰ ਆਉਣ ਤਾਂ ਜੋ ਕਿਸੇ ਵੀ ਮਾਪੇ ਨੂੰ ਅਜਿਹੇ ਵੱਡੇ ਦੁੱਖ ਦਾ ਸਾਹਮਣਾ ਨਾ ਕਰਨਾ ਪਵੇ।
ਨੋਟ : ਇਸ ਖ਼ਬਰ ਸਬੰਧੀ ਕੁਮੈਂਟ ਕਰਕੇ ਦਿਓ ਆਪਣੀ ਰਾਏ
