ਡੇਰਾ ਸੱਚਾ ਸੌਦਾ ਦੇ 90 ਤੋਂ ਵੱਧ ਬੈਂਕ ਖਾਤੇ ਫਰੀਜ਼

ਸਿਰਸਾ  (ਸੇਤੀਆ) - ਡੇਰਾ ਸੱਚਾ ਸੌਦਾ ਦੇ ਕੋਲ ਅਥਾਹ ਜਾਇਦਾਦ ਹੈ। ਇਕੱਲੇ ਸਿਰਸਾ ਵਿਚ ਪੁਰਾਣੇ ਤੋਂ ਲੈ ਕੇ ਨਵੇਂ ਡੇਰਾ ਸੱਚਾ ਸੌਦਾ ਤੱਕ 3 ਬੈਂਕਾਂ ਦੀਆਂ ਸ਼ਾਖਾਵਾਂ 'ਚ ਹੀ ਡੇਰੇ ਦੇ 90 ਤੋਂ ਵੱਧ ਬੈਂਕ ਖਾਤਿਆਂ ਵਿਚ ਲਗਭਗ 68.50 ਕਰੋੜ ਰੁਪਏ ਜਮ੍ਹਾ ਸਨ। ਇਨ੍ਹਾਂ ਸਾਰੇ ਖਾਤਿਆਂ ਨੂੰ ਫਰੀਜ਼ ਕਰ ਦਿੱਤਾ ਗਿਆ ਹੈ। ਇਹ ਸਾਰੇ ਕਰੰਟ ਅਕਾਊਂਟ ਸਨ ਅਤੇ ਡੇਰਾ ਸੱਚਾ ਸੌਦਾ ਟਰੱਸਟ ਅਤੇ ਡੇਰੇ ਦੇ ਦੂਸਰੇ ਵਿੰਗ ਆਦਿ ਦੇ ਨਾਂ 'ਤੇ ਸਨ।ਦਰਅਸਲ 25 ਅਗਸਤ ਨੂੰ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਡੇਰਾ ਸੱਚਾ ਸੌਦਾ ਦੀ ਜਾਇਦਾਦ ਅਟੈਚ ਕਰਨ ਸਬੰਧੀ ਹੁਕਮ ਦੇ ਮਗਰੋਂ ਜ਼ਿਲੇ ਵਿਚ ਪ੍ਰਸ਼ਾਸਨ ਨੇ ਡੇਰੇ ਦੇ ਬੈਂਕ ਖਾਤਿਆਂ ਨੂੰ ਫਰੀਜ਼ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕੀਤੀ ਸੀ। ਖਾਸ ਗੱਲ ਇਹ ਹੈ ਕਿ ਡੇਰੇ ਨੇ ਕਾਫੀ ਵੱਡੀ ਰਕਮ ਬੈਂਕ ਦੇ ਕਰਜ਼ੇ ਵਜੋਂ ਵੀ ਲਈ ਹੋਈ ਸੀ ਪਰ ਇਹ ਉਸ ਦੀ ਜਮ੍ਹਾ ਰਕਮ ਦੇ ਮੁਕਾਬਲੇ ਇਕ-ਤਿਹਾਈ ਤੋਂ ਵੀ ਘੱਟ ਹੈ। ਓ. ਬੀ. ਸੀ. ਸ਼ਾਖਾ ਤੋਂ ਡੇਰੇ ਨੇ ਲਗਭਗ 20 ਕਰੋੜ ਰੁਪਏ ਦਾ ਕਰਜ਼ਾ ਲਿਆ ਹੋਇਆ ਹੈ।
ਗੁਰਮੀਤ ਦਾ ਸੇਵਿੰਗ ਅਕਾਊਂਟ ਵੀ ਫਰੀਜ਼
ਓ. ਬੀ. ਸੀ. ਨੇ ਡੇਰਾ ਮੁਖੀ ਗੁਰਮੀਤ ਦਾ ਖਾਤਾ ਵੀ ਫਰੀਜ਼ ਕਰ ਦਿੱਤਾ ਹੈ। ਇਹ ਸੇਵਿੰਗ ਅਕਾਊਂਟ ਸੀ, ਜਿਸ ਵਿਚ ਕੋਈ ਵੱਡੀ ਰਕਮ ਜਮ੍ਹਾ ਨਹੀਂ ਸੀ।
ਹਨੀਪ੍ਰੀਤ ਦਾ ਨਿੱਜੀ ਬੈਂਕ ਖਾਤਾ ਨਹੀਂ ਹੋਇਆ ਫਰੀਜ਼
ਡੇਰਾ ਸੱਚਾ ਸੌਦਾ ਵਿਚ ਸਥਿਤ ਐੱਚ. ਡੀ. ਐੱਫ. ਸੀ. ਬੈਂਕ ਸ਼ਾਖਾ ਵਿਚ ਹਨੀਪ੍ਰੀਤ ਦੇ ਨਿੱਜੀ ਖਾਤੇ ਨੂੰ ਅਜੇ ਤੱਕ ਫਰੀਜ਼ ਨਹੀਂ ਕੀਤਾ ਗਿਆ। ਸੂਤਰਾਂ ਦੀ ਮੰਨੀਏ ਤਾਂ ਇਹ ਖਾਤਾ 2012 ਵਿਚ ਖੁੱਲ੍ਹਵਾਇਆ ਗਿਆ ਸੀ। ਪੁਰਾਣੇ ਡੇਰੇ ਵਿਚ ਸਥਿਤ ਓ. ਬੀ. ਸੀ. ਦੀ ਸ਼ਾਖਾ ਵਿਚ ਬੈਂਕ ਪ੍ਰਸ਼ਾਸਨ ਨੇ ਉਸ ਦਾ ਖਾਤਾ ਕਈ ਦਿਨ ਪਹਿਲਾਂ ਫਰੀਜ਼ ਕਰ ਦਿੱਤਾ ਸੀ ਪਰ ਨਵੇਂ ਡੇਰੇ ਵਿਚ ਸਥਿਤ ਐੱਚ. ਡੀ. ਐੱਫ. ਸੀ. ਬੈਂਕ ਸ਼ਾਖਾ ਵਿਚ ਉਸ ਦਾ ਖਾਤਾ ਚੱਲ ਰਿਹਾ ਹੈ।