ਦੂਜੀ ਤੇਜਸ ਐਕਸਪ੍ਰੈਸ ਨੂੰ ਹਰੀ ਝੰਡੀ, ਮੁੰਬਈ ਲਈ ਹੋਈ ਰਵਾਨਾ
01/17/2020 3:03:58 PM
ਨਵੀਂ ਦਿੱਲੀ/ਕਪੂਰਥਲਾ — ਸ਼ੁੱਕਰਵਾਰ ਯਾਨੀ ਕਿ ਅੱਜ ਅਹਿਮਦਾਬਾਦ-ਮੁੰਬਈ ਵਿਚਕਾਰ ਚੱਲਣ ਵਾਲੀ IRCTC ਦੀ ਦੂਜੀ ਤੇਜਸ ਟ੍ਰੇਨ ਨੂੰ ਹਰੀ ਝੰਡੀ ਦਿਖਾਈ। ਰੇਲਵੇ ਮੰਤਰੀ ਪਿਯੂਸ਼ ਗੋਇਲ ਅਤੇ ਗੁਜਰਾਤ ਦੇ ਮੁੱਖ ਮੰਤਰੀ ਵਿਜੇ ਰੁਪਾਨੀ ਨੇ ਭਾਰਤੀ ਰੇਲਵੇ ਦੀ ਸਹਿਯੋਗੀ ਕੰਪਨੀ IRCTC ਦੀ ਦੂਜੀ ਰੇਲ ਗੱਡੀ ਤੇਜਸ ਐਕਸਪ੍ਰੈਸ ਨੂੰ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ। IRCTC ਇਸ ਸਮੇਂ ਲਖਨਊ-ਨਵੀਂ ਦਿੱਲੀ ਮਾਰਗ 'ਤੇ ਪ੍ਰਾਈਵੇਟ ਤੇਜਸ ਟ੍ਰੇਨ ਚਲਾ ਰਹੀ ਹੈ।
ਰੇਲਵੇ ਅਧਿਕਾਰੀਆਂ ਨੇ ਦੱਸਿਆ ਕਿ ਦੂਜੀ ਤੇਜਸ ਵਪਾਰਕ ਤੌਰ 'ਤੇ 19 ਜਨਵਰੀ 2020 ਤੋਂ ਅਹਿਮਦਾਬਾਦ ਤੋਂ ਸ਼ੁਰੂ ਹੋਵੇਗੀ। ਉਨ੍ਹਾਂ ਕਿਹਾ ਕਿ ਇਸ ਰੇਲ ਗੱਡੀ ਲਈ ਟਿਕਟਾਂ IRCTC ਦੀ ਵੈੱਬਸਾਈਟ 'ਤੇ ਆਨ ਲਾਈਨ ਬੁੱਕ ਕੀਤੀਆਂ ਜਾ ਸਕਦੀਆਂ ਹਨ। ਇਸ ਦੀਆਂ ਟਿਕਟਾਂ ਰੇਲਵੇ ਰਿਜ਼ਰਵੇਸ਼ਨ ਕਾਊਟਰਾਂ 'ਤੇ ਉਪਲਬਧ ਨਹੀਂ ਹੋਣਗੀਆਂ। IRCTC ਦੇ ਆਨਲਾਈਨ ਟਰੈਵਲ ਪੋਰਟਲ ਸਹਿਭਾਗੀਆਂ ਜਿਵੇਂ ਕਿ ਪੇਟੀਐਮ, ਇਕਸੀਗੋ, ਫੋਨਪੇਅ, ਮੇਕ ਮਾਈ ਟਰਿੱਪ, ਗੂਗਲ, ਗੋਇਬੀਬੋ, ਰੇਲ ਯਾਤਰੀ ਅਤੇ ਹੋਰ ਮਾਧਿਅਮ ਦੁਆਰਾ ਵੀ ਇਸ ਟ੍ਰੇਨ ਦੀਆਂ ਟਿਕਟਾਂ ਬੁੱਕ ਕੀਤੀਆਂ ਜਾ ਸਕਦੀਆਂ ਹਨ।
Gujarat: The inaugural run of Ahmedabad-Mumbai Tejas Express has been flagged off in Ahmedabad. The commercial run of the Tejas Express will begin on January 19. pic.twitter.com/H8qckOLm6D
— ANI (@ANI) January 17, 2020
ਜਾਣੋ ਟ੍ਰੇਨ ਦਾ ਸ਼ਡਿਊਲ
ਰੋਜ਼ਾਨਾ ਚੱਲਣ ਦੌਰਾਨ ਅਹਿਮਦਾਬਾਦ-ਮੁੰਬਈ ਸੈਂਟਰਲ ਤੇਜਸ ਐਕਸਪ੍ਰੈਸ ਟ੍ਰੇਨ ਦੀ ਸੰਖਿਆ 82902 ਹੋਵੇਗੀ। ਜੋ ਸਵੇਰੇ 06.40 ਵਜੇ ਅਹਿਮਦਾਬਾਦ ਤੋਂ ਰਵਾਨਾ ਹੋਵੇਗੀ ਅਤੇ ਦੁਪਹਿਰ 01.10 ਵਜੇ ਮੁੰਬਈ ਸੈਂਟਰਲ ਪਹੁੰਚੇਗੀ। ਵਾਪਸੀ ਵਿਚ ਇਸ ਟ੍ਰੇਨ ਦੀ ਸੰਖਿਆ 82901 ਹੋਵੇਗੀ ਜਿਹੜੀ ਕਿ ਮੁੰਬਈ ਸੈਂਟਰਲ ਤੋਂ ਬਾਅਦ ਦੁਪਹਿਰ 03.40 ਵਜੇ ਰਵਾਨਾ ਹੋਏਗੀ ਅਤੇ ਸਵੇਰੇ 09.55 ਵਜੇ ਅਹਿਮਦਾਬਾਦ ਪਹੁੰਚੇਗੀ।
ਰਸਤੇ ਵਿਚ ਇਹ ਟ੍ਰੇਨ ਨਡੀਆਡ, ਵਡੋਦਰਾ, ਭਰੂਚ, ਸੂਰਤ, ਵਾਪੀ ਅਤੇ ਬੋਰੀਵਲੀ ਰੇਲਵੇ ਸਟੇਸ਼ਨਾਂ 'ਤੇ ਰੁਕੇਗੀ। ਟ੍ਰੇਨ ਹਫਤੇ ਵਿਚ ਛੇ ਦਿਨ ਸੋਮਵਾਰ, ਮੰਗਲਵਾਰ, ਬੁੱਧਵਾਰ, ਸ਼ੁੱਕਰਵਾਰ, ਸ਼ਨੀਵਾਰ ਅਤੇ ਐਤਵਾਰ ਨੂੰ ਚਲਾਈ ਜਾਏਗੀ। ਇਹ ਟ੍ਰੇਨ ਵੀਰਵਾਰ ਨੂੰ ਨਹੀਂ ਚੱਲੇਗੀ।
ਜਾਣੋ ਕਿੰਨਾ ਹੋਵੇਗਾ ਇਸ ਦਾ ਕਿਰਾਇਆ
ਅਹਿਮਦਾਬਾਦ ਤੋਂ ਮੁੰਬਈ ਵਿਚਕਾਰ ਐਗਜ਼ੀਕਿਊਟਿਵ ਕੁਰਸੀ(ਚੇਅਰ) ਕਾਰ ਦਾ ਕਿਰਾਇਆ 2384 ਰੁਪਏ ਹੈ। ਇਸ 'ਚ 1875 ਰੁਪਏ ਦਾ ਬੇਸ ਫੇਅਰ, ਜੀਐਸਟੀ 94 ਰੁਪਏ ਅਤੇ ਕੈਟਰਿੰਗ ਚਾਰਜ 415 ਰੁਪਏ ਸ਼ਾਮਲ ਹਨ। ਇਸ ਦੇ ਨਾਲ ਹੀ ਏ.ਸੀ. ਚੇਅਰ ਕਾਰ ਦਾ ਕਿਰਾਇਆ 1289 ਰੁਪਏ ਹੋਵੇਗਾ, ਜਿਸ 'ਚ ਬੇਸ ਫੇਅਰ 870 ਰੁਪਏ, ਜੀਐਸਟੀ 44 ਰੁਪਏ ਅਤੇ ਕੈਟਰਿੰਗ ਚਾਰਜ 375 ਰੁਪਏ ਸ਼ਾਮਲ ਹਨ।
ਮੁੰਬਈ-ਅਹਿਮਦਾਬਾਦ ਵਿਚਕਾਰ ਐਗਜ਼ੀਕਿਊਟਿਵ ਚੇਅਰ ਕਾਰ ਦਾ ਕਿਰਾਇਆ 2374 ਰੁਪਏ ਹੈ, ਜਿਸ 'ਚ 1875 ਰੁਪਏ ਬੇਸ ਫੇਅਰ, 94 ਰੁਪਏ ਜੀਐਸਟੀ ਅਤੇ 405 ਰੁਪਏ ਦੇ ਕੈਟਰਿੰਗ ਚਾਰਜਿਸ ਸ਼ਾਮਲ ਹਨ। ਏ.ਸੀ. ਕੁਰਸੀ ਕਾਰ ਦਾ ਕਿਰਾਇਆ 1274 ਰੁਪਏ ਹੈ, ਜਿਸ 'ਚ ਬੇਸ ਫੇਅਰ ਵਜੋਂ 870 ਰੁਪਏ, 44 ਜੀਐਸਟੀ ਅਤੇ ਕੈਟਰਿੰਗ ਚਾਰਜ ਵਜੋਂ 360 ਰੁਪਏ ਸ਼ਾਮਲ ਹਨ।
ਹਾਲਾਂਕਿ ਇਸ ਦਾ ਕਿਰਾਇਆ ਸ਼ਤਾਬਦੀ ਐਕਸਪ੍ਰੈਸ ਨਾਲੋਂ ਮਹਿੰਗਾ ਹੈ। ਮੁੰਬਈ-ਅਹਿਮਦਾਬਾਦ ਸ਼ਤਾਬਦੀ ਐਕਸਪ੍ਰੈਸ 'ਚ ਐਗਜ਼ੀਕਿਊਟਿਵ ਚੇਅਰ ਕਾਰ ਦਾ ਕਿਰਾਇਆ 1885 ਰੁਪਏ ਹੈ। ਇਸ ਦੇ ਨਾਲ ਹੀ ਚੇਅਰ ਕਾਰ ਦਾ ਕਿਰਾਇਆ 1295 ਰੁਪਏ ਹੈ।
ਟ੍ਰੇਨ ਦਾ ਬੇਸ ਫੇਅਰ ਸ਼ਤਾਬਦੀ ਐਕਸਪ੍ਰੈਸ ਦੇ ਬਰਾਬਰ ਹੋਵੇਗਾ। ਹਾਲਾਂਕਿ IRCTC ਨੂੰ ਕਿਰਾਏ ਵਧਾਉਣ ਦਾ ਅਧਿਕਾਰ ਹੋਵੇਗਾ। ਲਖਨਊ-ਦਿੱਲੀ ਮਾਰਗ 'ਤੇ ਚੱਲ ਰਹੀ ਤੇਜਸ ਐਕਸਪ੍ਰੈਸ ਦੇ ਕਿਰਾਏ ਦਾ ਫੈਸਲਾ ਵੀ IRCTC ਨੇ ਹੀ ਕੀਤਾ ਹੈ ਜਿਹੜਾ ਕਿ ਸ਼ਤਾਬਦੀ ਤੋਂ ਵੀ ਜ਼ਿਆਦਾ ਹੈ।
ਦੂਜੇ ਪਾਸੇ IRCTC ਯਾਤਰੀਆਂ ਨੂੰ ਟ੍ਰੇਨ ਦੇ ਦੇਰੀ ਨਾਲ ਚੱਲਣ 'ਤੇ ਰਿਫੰਡ ਦੇਵੇਗੀ। ਕਮਾਈ ਲਈ IRCTC ਇਸ ਟ੍ਰੇਨ ਵਿਚ ਇਸ਼ਤਿਹਾਰ ਲਗਾਉਣ ਜਾਂ ਫਿਰ ਐਲ.ਈ.ਡੀ. ਸਕ੍ਰੀਨ 'ਤੇ ਵਿਗਿਆਪਨ ਚਲਾਉਣ ਦੀ ਮਨਜ਼ੂਰੀ ਦੇਵੇਗੀ।
ਯਾਤਰੀਆਂ ਨੂੰ ਮਿਲਣਗੀਆਂ ਇਹ ਸਹੂਲਤਾਂ
- ਇਸ ਰੇਲ ਦੀ ਰਫਤਾਰ 160 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਹੋਵੇਗੀ।
- ਆਧੁਨਿਕ ਸਹੂਲਤਾਂ ਨਾਲ ਲੈਸ ਇਸ ਰੇਲ ਗੱਡੀ ਵਿਚ ਬਿਜਲੀ ਦੀ ਖਪਤ ਵੀ ਘੱਟ ਹੋਵੇਗੀ।
- ਰੇਲਗੱਡੀ ਦੀ ਹਰੇਕ ਸੀਟ ਦੇ ਪਿਛਲੇ ਪਾਸੇ ਇਕ ਐਲ.ਸੀ.ਡੀ. ਲੱਗੀ ਹੈ।
- ਟ੍ਰੇਨ ਵਿਚ ਵਾਈਫਾਈ ਦੇ ਨਾਲ-ਨਾਲ ਕੈਟਰਿੰਗ ਦਾ ਮੈਨਿਊ ਵੀ ਮਸ਼ਹੂਰ ਸ਼ੈੱਫਾਂ ਦੁਆਰਾ ਤਿਆਰ ਕੀਤਾ ਗਿਆ ਹੈ।
- ਯਾਤਰੀਆਂ ਨੂੰ 25 ਲੱਖ ਰੁਪਏ ਦਾ ਮੁਫਤ ਰੇਲ ਯਾਤਰਾ ਬੀਮਾ ਮਿਲੇਗਾ।
- ਹਰੇਕ ਕੋਚ 'ਚ ਡਿਜੀਟਲ ਡੈਸਟੀਨੇਸ਼ਨ ਬੋਰਡ ਅਤੇ ਇਲੈਕਟ੍ਰਾਨਿਕ ਰਿਜ਼ਰਵੇਸ਼ਨ ਚਾਰਟ ਵੀ ਹਨ।