ਰਿਟਾਇਰ ਹੋਣ ਦੀ ਉਮਰ ''ਚ ਸਰਕਾਰੀ ਨੌਕਰੀ ! 27 ਸਾਲ ਤਿਆਰੀ ਮਗਰੋਂ 59 ਸਾਲਾ ਵਿਜੇ ਬਣਿਆ ਟੀਚਰ

ਬਾਗਪਤ (ਏਜੰਸੀ)- ਜਦੋਂ ਲੋਕ ਇਕ ਖਾਸ ਉਮਰ ਤੋਂ ਬਾਅਦ ਮੁਕਾਬਲੇ ਦੀਆਂ ਪ੍ਰੀਖਿਆਵਾਂ ਦੀ ਤਿਆਰੀ ਕਰਨਾ ਬੰਦ ਕਰ ਦਿੰਦੇ ਹਨ, ਉੱਥੇ ਹੀ ਉੱਤਰ ਪ੍ਰਦੇਸ਼ ਦੇਬਾਗਪਤ ਦੇ 59 ਸਾਲਾ ਵਿਜੇ ਕੁਮਾਰ ਸ਼ਰਮਾ ਨੇ ਸਰਕਾਰੀ ਅਧਿਆਪਕ ਬਣਨ ਦੀ ਆਪਣੀ ਆਖਰੀ ਕੋਸ਼ਿਸ਼ ਨੂੰ ਜਾਰੀ ਰੱਖਿਆ ਅਤੇ ਅੰਤ 'ਚ ਸਫਲਤਾ ਪ੍ਰਾਪਤ ਕੀਤੀ। ਸਾਲ 1999 'ਚ ਸਰਕਾਰੀ ਅਧਿਆਪਕ ਬਣਨ ਦਾ ਟੀਚਾ ਤੈਅ ਕਰਨ ਵਾਲੇ ਵਿਜੇ ਨੇ 27 ਸਾਲਾਂ ਤੱਕ ਤਿਆਰੀ ਜਾਰੀ ਰੱਖੀ ਅਤੇ ਕਈ ਅਸਫਲ ਕੋਸ਼ਿਸ਼ਾਂ ਤੋਂ ਬਾਅਦ, ਹੁਣ 59 ਸਾਲ ਦੀ ਉਮਰ 'ਚ ਉਸ ਦਾ ਨਾਮ ਸਰਕਾਰੀ ਅਧਿਆਪਕਾਂ ਦੀ ਸੂਚੀ 'ਚ ਹੈ।

ਸ਼ਰਮਾ ਦਾ ਕਹਿਣਾ ਹੈ ਕਿ ਉਨ੍ਹਾਂ ਲਈ ਇਹ ਨੌਕਰੀ ਤੋਂ ਜ਼ਿਆਦਾ ਉਸ ਟੀਚੇ ਦਾ ਪੂਰਾ ਹੋਣਾ ਹੈ, ਜਿਸ ਨੂੰ ਉਨ੍ਹਾਂ ਨੇ ਸਾਲ 1999 'ਚ ਤੈਅ ਕੀਤਾ ਸੀ। ਬੜੌਤ ਖੇਤਰ ਦੇ ਬਦਹਵਾਦ ਪਿੰਡ ਦੇ ਵਸਨੀਕ ਸ਼ਰਮਾ ਨੂੰ ਸ਼ਾਮਲੀ ਜ਼ਿਲ੍ਹੇ ਦੇ ਇਕ ਸਰਕਾਰੀ ਸਹਾਇਤਾ ਪ੍ਰਾਪਤ ਸੈਕੰਡਰੀ ਸਕੂਲ 'ਚ ਟੀਜੀਟੀ ਸੰਸਕ੍ਰਿਤ ਅਧਿਆਪਕ ਦੇ ਅਹੁਦੇ ਲਈ ਚੁਣਿਆ ਗਿਆ ਹੈ। ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਨੇ ਪਿਛਲੇ ਸੋਮਵਾਰ ਨੂੰ ਲਖਨਊ ਦੇ ਇੰਦਰਾ ਗਾਂਧੀ ਪ੍ਰਤਿਸ਼ਠਾਨ 'ਚ ਆਯੋਜਿਤ ਇਕ ਸਮਾਰੋਹ 'ਚ ਉਨ੍ਹਾਂ ਨੂੰ ਨਿਯੁਕਤੀ ਪੱਤਰ ਸੌਂਪਿਆ।
ਸ਼ਰਮਾ ਨੇ ਦੱਸਿਆ ਕਿ ਉਹ ਲੰਬੇ ਸਮੇਂ ਤੋਂ ਅਧਿਆਪਕ ਭਰਤੀ ਪ੍ਰੀਖਿਆਵਾਂ 'ਚ ਸ਼ਾਮਲ ਹੁੰਦੇ ਰਹੇ। ਉਨ੍ਹਾਂ ਨੇ ਟੀਜੀਟੀ ਦੀ ਲਿਖਤੀ ਪ੍ਰੀਖਿਆ 6 ਵਾਰ ਅਤੇ ਪੀਜੀਟੀ ਦੀ ਪ੍ਰੀਖਿਆ 4 ਵਾਰ ਪਾਸ ਕੀਤੀ। ਇਸ ਦੇ ਬਾਵਜੂਦ ਉਨ੍ਹਾਂ ਨੇ ਤਿਆਰੀ ਜਾਰੀ ਰੱਖੀ। ਇਸ ਵਾਰ ਭਰਤੀ ਪ੍ਰਕਿਰਿਆ 'ਚ ਇੰਟਰਵਿਊ ਨਹੀਂ ਹੋਣ ਕਾਰਨ ਉਨ੍ਹਾਂ ਦੀ ਚੋਣ ਹੋ ਗਈ। ਦਿਲਚਸਪ ਗੱਲ ਇਹ ਹੈ ਕਿ ਸਰਕਾਰੀ ਨੌਕਰੀ ਦੀ ਤਿਆਰੀ ਕਰਦੇ ਸਮੇਂ ਸ਼ਰਮਾ ਨੇ ਲਗਭਗ 26 ਸਾਲਾਂ ਤੱਕ ਇਕ ਨਿੱਜੀ ਸਕੂਲ 'ਚ ਬੱਚਿਆਂ ਨੂੰ ਪੜ੍ਹਾਇਆ। ਉਹ ਵਿਵੇਕਾਨੰਦ ਵਿਦਿਆਪੀਠ ਅਤੇ ਦੂਨ ਪਬਲਿਕ ਸਕੂਲ 'ਚ ਹਿੰਦੀ ਅਤੇ ਸੰਸਕ੍ਰਿਤ ਪੜ੍ਹਾਉਂਦੇ ਰਹੇ।

ਦੂਨ ਪਬਲਿਕ ਸਕੂਲ ਦੇ ਡਾਇਰੈਕਟਰ ਪ੍ਰਸ਼ਾਂਤ ਜੈਨ ਦੇ ਅਨੁਸਾਰ, ਸ਼ਰਮਾ ਪੜ੍ਹਾਉਣ ਦੇ ਨਾਲ-ਨਾਲ ਮੁਕਾਬਲੇ ਦੀਆਂ ਪ੍ਰੀਖਿਆਵਾਂ ਦੀ ਤਿਆਰੀ 'ਚ ਵੀ ਰੁੱਝੇ ਹੋਏ ਸੀ। ਸ਼ਰਮਾ ਦੇ ਪਿਤਾ ਲਕਸ਼ਮਣ ਸਿੰਘ ਵੀ ਅਧਿਆਪਕ ਵੀ ਸਨ। ਉਨ੍ਹਾਂ ਦੇ 2 ਪੁੱਤਰ ਉੱਤਰ ਪ੍ਰਦੇਸ਼ ਪੁਲਸ 'ਚ ਕੰਮ ਕਰਦੇ ਹਨ ਅਤੇ ਤਿੰਨ ਧੀਆਂ ਹਨ। ਉਨ੍ਹਾਂ ਦੀ ਇਕ ਧੀ ਨੂੰ ਵੀ ਅਧਿਆਪਕ ਦੇ ਅਹੁਦੇ ਲਈ ਚੁਣਿਆ ਗਿਆ ਹੈ ਅਤੇ ਉਹ ਉਡੀਕ ਸੂਚੀ 'ਚ ਹੈ। ਸ਼ਰਮਾ ਕਹਿੰਦੇ ਹਨ ਕਿ ਹਰ ਅਸਫਲ ਕੋਸ਼ਿਸ਼ ਤੋਂ ਬਾਅਦ, ਉਨ੍ਹਾਂ ਨੇ ਆਪਣੀ ਤਿਆਰੀ 'ਚ ਸੁਧਾਰ ਕੀਤਾ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਉਮਰ ਸਫਲਤਾ ਵਿੱਚ ਰੁਕਾਵਟ ਨਹੀਂ ਹੈ, ਬਸ਼ਰਤੇ ਕੋਈ ਕੋਸ਼ਿਸ਼ ਜਾਰੀ ਰੱਖੇ। ਹੁਣ 59 ਸਾਲ ਦੀ ਉਮਰ ਵਿੱਚ ਨਿਯੁਕਤੀ ਸ਼ਰਮਾ ਦੇ 27 ਸਾਲਾਂ ਦੇ ਸਫ਼ਰ 'ਚ ਇਕ ਮੀਲ ਪੱਥਰ ਹੈ, ਜਿਸ 'ਚ ਚੋਣ ਦੀਆਂ ਉਮੀਦਾਂ ਕਈ ਵਾਰ ਉੱਠੀਆਂ ਅਤੇ ਚਕਨਾਚੂਰ ਹੋ ਗਈਆਂ, ਪਰ ਸਰਕਾਰੀ ਅਧਿਆਪਕ ਬਣਨ ਦਾ ਉਨ੍ਹਾਂ ਦਾ ਟੀਚਾ ਅਟੱਲ ਰਿਹਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e