ਹੁਣ ਬਿਨਾਂ ''ਗ੍ਰੀਨ ਕਾਰਡ'' ਨਹੀਂ ਮਿਲੇਗੀ ਐਂਟਰੀ, ਚਾਰਧਾਮ ਯਾਤਰਾ ''ਤੇ ਜਾਣ ਤੋਂ ਪਹਿਲਾਂ ਜਾਣ ਲਓ ਨਵੇਂ ਨਿਯਮ

ਨੈਸ਼ਨਲ ਡੈਸਕ : ਉਤਰਾਖੰਡ ਵਿੱਚ ਚਾਰਧਾਮ ਯਾਤਰਾ ਨੂੰ ਸੁਰੱਖਿਅਤ ਅਤੇ ਸੁਚਾਰੂ ਬਣਾਉਣ ਲਈ ਧਾਮੀ ਸਰਕਾਰ ਨੇ ਵਾਹਨਾਂ ਦੇ ਸੰਚਾਲਨ ਨੂੰ ਲੈ ਕੇ ਸਖ਼ਤ ਨਿਯਮ ਲਾਗੂ ਕਰ ਦਿੱਤੇ ਹਨ। ਜੇਕਰ ਤੁਸੀਂ ਵੀ ਇਸ ਸਾਲ ਚਾਰਧਾਮ ਯਾਤਰਾ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਇਹ ਜਾਣਨਾ ਬਹੁਤ ਜ਼ਰੂਰੀ ਹੈ ਕਿ ਹੁਣ ਯਾਤਰਾ ਦੌਰਾਨ 'ਗ੍ਰੀਨ ਕਾਰਡ' ਲਾਜ਼ਮੀ ਕਰ ਦਿੱਤਾ ਗਿਆ ਹੈ। ਇਨ੍ਹਾਂ ਨਵੇਂ ਨਿਯਮਾਂ ਦੀ ਪਾਲਣਾ ਨਾ ਕਰਨ 'ਤੇ ਸ਼ਰਧਾਲੂਆਂ ਨੂੰ ਯਾਤਰਾ ਮਾਰਗ ਵਿੱਚ ਪ੍ਰਵੇਸ਼ ਨਹੀਂ ਮਿਲੇਗਾ।

ਕੀ ਹੈ ਗ੍ਰੀਨ ਕਾਰਡ ਅਤੇ ਕਿਉਂ ਹੈ ਜ਼ਰੂਰੀ?
ਗ੍ਰੀਨ ਕਾਰਡ ਇੱਕ ਪ੍ਰਮਾਣਿਤ ਦਸਤਾਵੇਜ਼ ਹੈ ਜੋ ਇਹ ਯਕੀਨੀ ਬਣਾਉਂਦਾ ਹੈ ਕਿ ਯਾਤਰਾ 'ਤੇ ਜਾਣ ਵਾਲਾ ਵਾਹਨ ਪੂਰੀ ਤਰ੍ਹਾਂ ਫਿੱਟ ਹੈ। ਇਸ ਵਿੱਚ ਵਾਹਨ ਦੇ ਫਿਟਨੈਸ ਸਰਟੀਫਿਕੇਟ, ਪਰਮਿਟ, ਟੈਕਸ, ਬੀਮਾ ਅਤੇ ਪ੍ਰਦੂਸ਼ਣ ਸਰਟੀਫਿਕੇਟ ਦਾ ਪੂਰਾ ਵੇਰਵਾ ਸ਼ਾਮਲ ਹੁੰਦਾ ਹੈ। 

ਕਮਰਸ਼ੀਅਲ ਅਤੇ ਨਿੱਜੀ ਵਾਹਨਾਂ ਲਈ ਵੱਖਰੇ ਨਿਯਮ:
ਟੂਰਿਸਟ ਬੱਸਾਂ, ਟੈਕਸੀਆਂ ਅਤੇ ਕੈਬ ਵਰਗੇ ਸਾਰੇ ਵਪਾਰਕ ਵਾਹਨਾਂ ਲਈ ਯਾਤਰਾ 'ਤੇ ਨਿਕਲਣ ਤੋਂ ਪਹਿਲਾਂ ਟਰਾਂਸਪੋਰਟ ਵਿਭਾਗ ਤੋਂ ਗ੍ਰੀਨ ਕਾਰਡ ਅਤੇ 'ਟ੍ਰਿਪ ਕਾਰਡ' (Trip Card) ਦੋਵੇਂ ਬਣਵਾਉਣਾ ਲਾਜ਼ਮੀ ਹੈ। ਜੇਕਰ ਤੁਸੀਂ ਆਪਣੀ ਨਿੱਜੀ ਕਾਰ ਜਾਂ ਬਾਈਕ ਰਾਹੀਂ ਯਾਤਰਾ ਕਰ ਰਹੇ ਹੋ, ਤਾਂ ਤੁਹਾਨੂੰ ਗ੍ਰੀਨ ਕਾਰਡ ਦੀ ਲੋੜ ਨਹੀਂ ਪਵੇਗੀ। ਹਾਲਾਂਕਿ, ਨਿੱਜੀ ਵਾਹਨਾਂ ਲਈ 'ਟ੍ਰਿਪ ਕਾਰਡ' ਬਣਵਾਉਣਾ ਪੂਰੀ ਤਰ੍ਹਾਂ ਲਾਜ਼ਮੀ ਮੰਨਿਆ ਜਾਵੇਗਾ।

ਪੁਲਸ ਪ੍ਰਸ਼ਾਸਨ ਵਲੋਂ ਸਖ਼ਤ ਚੈਕਿੰਗ:
ਸੁਰੱਖਿਆ ਦੇ ਮੱਦੇਨਜ਼ਰ ਟਰਾਂਸਪੋਰਟ ਵਿਭਾਗ ਅਤੇ ਪੁਲਸ ਪ੍ਰਸ਼ਾਸਨ ਨੇ ਤੀਰਥ ਮਾਰਗਾਂ 'ਤੇ ਸਖ਼ਤ ਚੈਕਿੰਗ ਸ਼ੁਰੂ ਕਰ ਦਿੱਤੀ ਹੈ। ਜਿਸ ਵਾਹਨ ਕੋਲ ਵੈਧ ਗ੍ਰੀਨ ਕਾਰਡ ਜਾਂ ਟ੍ਰਿਪ ਕਾਰਡ ਨਹੀਂ ਹੋਵੇਗਾ, ਉਸ ਨੂੰ ਅੱਗੇ ਵਧਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ। ਯਾਤਰਾ ਦੌਰਾਨ ਗੱਡੀ ਦੀ ਆਰ.ਸੀ. (RC), ਡਰਾਈਵਿੰਗ ਲਾਇਸੰਸ ਅਤੇ ਬੀਮਾ ਵਰਗੇ ਸਾਰੇ ਦਸਤਾਵੇਜ਼ ਪੂਰੀ ਤਰ੍ਹਾਂ ਅਪਡੇਟ ਅਤੇ ਵੈਧ ਹੋਣੇ ਚਾਹੀਦੇ ਹਨ।

ਸ਼ਰਧਾਲੂਆਂ ਦੀ ਸਹੂਲਤ ਲਈ ਇਹ ਕਾਰਡ ਉਤਰਾਖੰਡ ਟਰਾਂਸਪੋਰਟ ਵਿਭਾਗ ਜਾਂ ਉਤਰਾਖੰਡ ਟੂਰਿਜ਼ਮ ਦੀ ਅਧਿਕਾਰਤ ਵੈੱਬਸਾਈਟ ਰਾਹੀਂ ਆਨਲਾਈਨ ਅਪਲਾਈ ਕੀਤਾ ਜਾ ਸਕਦਾ ਹੈ। ਨਜ਼ਦੀਕੀ ਸੰਭਾਗੀ ਟਰਾਂਸਪੋਰਟ ਦਫ਼ਤਰ (ARTO) ਵਿੱਚ ਜਾ ਕੇ ਵਾਹਨ ਦਾ ਨਿਰੀਖਣ ਕਰਵਾ ਕੇ ਵੀ ਗ੍ਰੀਨ ਕਾਰਡ ਅਤੇ ਟ੍ਰਿਪ ਕਾਰਡ ਪ੍ਰਾਪਤ ਕੀਤਾ ਜਾ ਸਕਦਾ ਹੈ। ਦੱਸ ਦੇਈਏ ਕਿ ਪ੍ਰਸ਼ਾਸਨ ਵੱਲੋਂ ਇਹ ਕਦਮ ਯਾਤਰਾ ਨੂੰ ਵਧੇਰੇ ਸੁਰੱਖਿਅਤ ਬਣਾਉਣ ਲਈ ਚੁੱਕਿਆ ਗਿਆ ਹੈ ਤਾਂ ਜੋ ਕਿਸੇ ਵੀ ਤਰ੍ਹਾਂ ਦੀ ਅਣਸੁਖਾਵੀਂ ਘਟਨਾ ਤੋਂ ਬਚਿਆ ਜਾ ਸਕੇ।