ਮਹਾਕਾਲ ਮੰਦਰ ਦੇ ਗਰਭ ਗ੍ਰਹਿ ''ਚ ਹੀ ਲੜ ਪਏ ਪੁਜਾਰੀ ਤੇ ਮੰਹਤ, ਹੱਥੋਪਾਈ ਤਕ ਪਹੁੰਚੀ ਗੱਲ

ਨੈਸ਼ਨਲ ਡੈਸਕ- ਉਜੈਨ ਦੇ ਮਹਾਕਲੇਸ਼ਵਰ ਮੰਦਰ 'ਚ ਬੁੱਧਵਾਰ ਨੂੰ ਇਕ ਅਣਸੁਖਾਂਵੀ ਘਟਨਾ ਵਾਪਰੀ। ਮੰਦਰ ਦੇ ਗਰਭ ਗ੍ਰਹਿ ਵਿੱਚ ਪੁਜਾਰੀ ਮਹੇਸ਼ ਸ਼ਰਮਾ ਅਤੇ ਨਾਥ ਸੰਪਰਦਾ ਦੇ ਮਹੰਤ ਮਹਾਵੀਰਨਾਥ ਵਿਚਕਾਰ ਝਗੜਾ ਹੋ ਗਿਆ। ਇਹ ਝਗੜਾ ਡਰੈੱਸ ਕੋਡ ਅਤੇ ਪਗੜੀ ਉਤਾਰਨ ਨੂੰ ਲੈ ਕੇ ਹੋਇਆ। ਝਗੜਾ ਇਸ ਹੱਦ ਤੱਕ ਵਧ ਗਿਆ ਕਿ ਦੋਵਾਂ ਨੇ ਇੱਕ ਦੂਜੇ ਵਿਰੁੱਧ ਅਪਸ਼ਬਦ ਬੋਲੇ।

ਜਾਣਕਾਰੀ ਮੁਤਾਬਕ, ਰਿਨਮੁਕਤੇਸ਼ਵਰ ਮੰਦਰ ਦੇ ਮਹੰਤ ਮਹਾਵੀਰਨਾਥ, ਗੋਰਖਪੁਰ ਤੋਂ ਆਏ ਮਹੰਤ ਸ਼ੰਕਰਨਾਥ ਮਹਾਰਾਜ ਦੇ ਨਾਲ ਸਵੇਰੇ 8:15 ਵਜੇ ਦਰਸ਼ਨ ਅਤੇ ਪੂਜਾ ਲਈ ਮਹਾਕਾਲ ਮੰਦਰ ਪਹੁੰਚੇ। ਗਰਭ ਗ੍ਰਹਿ ਵਿੱਚ ਦਾਖਲ ਹੋਣ 'ਤੇ ਮੰਦਰ ਦੇ ਪੁਜਾਰੀ ਮਹੇਸ਼ ਸ਼ਰਮਾ ਨੇ ਉਨ੍ਹਾਂ ਨੂੰ ਡਰੈੱਸ ਕੋਡ ਦੀ ਪਾਲਣਾ ਕਰਨ ਅਤੇ ਆਪਣੀਆਂ ਪਗਰੀਆਂ ਉਤਾਰਨ ਲਈ ਕਿਹਾ। ਇਸ ਨਾਲ ਦੋਵਾਂ ਵਿਚਕਾਰ ਬਹਿਸ ਹੋ ਗਈ।

ਮਹੰਤ ਮਹਾਵੀਰਨਾਥ ਨੇ ਦੋਸ਼ ਲਗਾਇਆ ਕਿ ਪੁਜਾਰੀ ਮਹੇਸ਼ ਸ਼ਰਮਾ ਸਾਰੇ ਸ਼ਰਧਾਲੂਆਂ ਨੂੰ ਪਰੇਸ਼ਾਨ ਕਰਦੇ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਨਾਲ ਜਾ ਰਿਹਾ ਮਹੰਤ ਦਿਲ ਦਾ ਮਰੀਜ਼ ਹੈ, ਫਿਰ ਵੀ ਉਨ੍ਹਾਂ ਨੂੰ ਆਪਣੀ ਪਗੜੀ ਅਤੇ ਕੱਪੜੇ ਉਤਾਰਨ ਲਈ ਮਜਬੂਰ ਕੀਤਾ ਗਿਆ। ਮਹੰਤ ਨੇ ਕਿਹਾ ਕਿ ਉਹ ਕੁਲੈਕਟਰ ਨੂੰ ਇੱਕ ਮੰਗ ਪੱਤਰ ਸੌਂਪਣਗੇ ਜਿਸ ਵਿੱਚ ਮਹੇਸ਼ ਸ਼ਰਮਾ ਨੂੰ ਮੰਦਰ ਤੋਂ ਹਟਾਉਣ ਦੀ ਮੰਗ ਕੀਤੀ ਜਾਵੇਗੀ।

ਪੁਜਾਰੀ ਮਹੇਸ਼ ਸ਼ਰਮਾ ਨੇ ਇਹ ਵੀ ਕਿਹਾ ਕਿ ਮਹਾਵੀਰਨਾਥ ਮੰਦਰ ਦੀ ਮਰਿਆਦਾ ਦੀ ਉਲੰਘਣਾ ਕਰਦੇ ਹਨ। ਜਦੋਂ ਸਹਾਇਕ ਪ੍ਰਸ਼ਾਸਕ ਗਰਭ ਗ੍ਰਹਿ ਵਿੱਚ ਪਾਣੀ ਚੜ੍ਹਾ ਰਿਹਾ ਸੀ ਤਾਂ ਉਨ੍ਹਾਂ ਨੇ ਅਣਉਚਿਤ ਭਾਸ਼ਾ ਦੀ ਵਰਤੋਂ ਕੀਤੀ। ਪੁਜਾਰੀ ਨੇ ਕਿਹਾ ਕਿ ਮੰਦਰ ਵਿੱਚ ਦਾਖਲ ਹੋਣ ਲਈ ਇੱਕ ਨਿਰਧਾਰਤ ਡਰੈੱਸ ਕੋਡ ਹੈ, ਜਿਸਦਾ ਸਾਰਿਆਂ ਨੂੰ ਪਾਲਣ ਕਰਨਾ ਚਾਹੀਦਾ ਹੈ।

ਸੀਸੀਟੀਵੀ ਫੁਟੇਜ ਦੇ ਆਧਾਰ 'ਤੇ ਕੀਤੀ ਜਾ ਰਹੀ ਜਾਂਚ

ਮੰਦਰ ਪ੍ਰਬੰਧਕ ਕਮੇਟੀ ਨੇ ਇਸ ਘਟਨਾ ਨੂੰ ਗੰਭੀਰਤਾ ਨਾਲ ਲਿਆ ਹੈ। ਮੰਦਰ ਪ੍ਰਬੰਧਕ ਪ੍ਰਥਮ ਕੌਸ਼ਿਕ ਨੇ ਕਿਹਾ ਕਿ ਸੀਸੀਟੀਵੀ ਫੁਟੇਜ ਦੇ ਆਧਾਰ 'ਤੇ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜੇਕਰ ਕੋਈ ਦੋਸ਼ੀ ਪਾਇਆ ਗਿਆ ਤਾਂ ਕਾਰਵਾਈ ਕੀਤੀ ਜਾਵੇਗੀ।