ਕਮਲਨਾਥ ਦੇ ਭਾਣਜੇ ਦੇ 245 ਕਰੋੜ ਦੇ ਬੇਨਾਮੀ ਸ਼ੇਅਰ ਜ਼ਬਤ

ਨਵੀਂ ਦਿੱਲੀ— ਅਗਸਤਾ ਵੈਸਟਲੈਂਡ ਘਪਲੇ 'ਚ ਮੱਧ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਕਮਲਨਾਥ ਦੇ ਭਾਣਜੇ ਰਤੁਲ ਪੁਰੀ ਦੀਆਂ ਮੁਸ਼ਕਲਾਂ ਘੱਟ ਹੁੰਦੀਆਂ ਨਹੀਂ ਦਿੱਸ ਰਹੀਆਂ ਹਨ। ਆਮਦਨ ਟੈਕਸ ਵਿਭਾਗ ਦੇ ਅਧਿਕਾਰੀ ਨੇ ਦੱਸਿਆ ਕਿ ਰਤੁਲ ਪੁਰੀ ਦੇ ਨਾਂ ਰੱਖੇ 254 ਕਰੋੜ ਰੁਪਏ ਦੇ ਬੇਨਾਮੀ ਸ਼ੇਅਰ ਜ਼ਬਤ ਕੀਤੇ ਗਏ ਹਨ। ਸੂਤਰਾਂ ਦਾ ਕਹਿਣਾ ਹੈ ਕਿ ਆਮਦਨ ਟੈਕਸ ਵਿਭਾਗ ਦੀ ਦਿੱਲੀ ਬੇਨਾਮੀ ਮਨਾਹੀ ਇਕਾਈ ਨੇ ਰਤੁਲ ਪੁਰੀ ਕੰਪਨੀ ਸਮੂਹ ਨਾਲ ਸੰਬੰਧਤ ਨਾਨ ਕਿਊਮੁਲੇਟਿਵ ਕੰਪਲਸਰੀ ਕਨਵਰਟੀਬਲ ਪ੍ਰਿਫੇਂਰੇਸ ਸ਼ੇਅਰਜ਼ (ਸੀ.ਸੀ.ਪੀ.ਐੱਸ.)/ਇਕੁਈਟੀ ਸ਼ੇਅਰਜ਼ ਨੂੰ ਅਸਥਾਈ ਰੂਪ ਨਾਲ ਅਟੈਚ ਕਰ ਲਿਆ ਹੈ। ਆਪਟਿਮਾ ਇੰਫਰਾ ਪ੍ਰਾਈਵੇਟ ਲਿਮਟਿਡ ਵਲੋਂ ਸੀ.ਸੀ.ਪੀ.ਐੱਸ. ਨੂੰ ਐੱਫ.ਡੀ.ਆਈ. ਨਿਵੇਸ਼ ਦੇ ਰੂਪ 'ਚ ਪ੍ਰਾਪਤ ਕੀਤਾ ਗਿਆ ਸੀ।

ਸੂਤਰਾਂ ਦਾ ਕਹਿਣਾ ਹੈ ਕਿ ਰਤੁਲ ਪੁਰੀ ਨੇ ਐੱਚ.ਈ.ਪੀ.ਸੀ.ਐੱਲ. ਨਾਮੀ ਕੰਪਨੀ ਦੇ ਨਾਂ 'ਤੇ ਸੌਰ ਪੈਨਲ ਆਯਾਤ ਕਰਨ ਲਈ ਵਧ ਚਾਲਾਨ ਬਣਾਏ ਅਤੇ ਉਸ ਰਾਹੀਂ 254 ਕਰੋੜ ਰੁਪਏ ਕਮਾਏ। ਇਹ ਕੰਪਨੀ ਦੁਬਈ ਸਥਿਤ ਇਕ ਆਪਰੇਟਰ ਦੀ ਸ਼ੇਲ ਕੰਪਨੀ ਹੈ। ਇਹ ਆਪਰੇਟਰ ਅਗਸਤਾ ਵੈਸਟਲੈਂਡ ਵੀ.ਵੀ.ਆਈ.ਪੀ. ਚਾਪਰ ਘਪਲੇ 'ਚ ਦੋਸ਼ੀ ਹੈ। ਇਸ ਤੋਂ ਇਕ ਦਿਨ ਪਹਿਲਾਂ ਦਿੱਲੀ ਦੀ ਕੋਰਟ ਨੇ ਵੀ.ਵੀ.ਆਈ.ਪੀ. ਹੈਲੀਕਾਪਟਰ ਘਪਲੇ ਨਾਲ ਜੁੜੇ ਧਨ ਸੋਧ ਮਾਮਲੇ 'ਚ ਰਤੁਲ ਪੁਰੀ ਨੂੰ ਮਿਲੇ ਗ੍ਰਿਫਤਾਰੀ ਤੋਂ ਅੰਤਰਿਮ ਸੁਰੱਖਿਆ ਨੂੰ ਸੋਮਵਾਰ ਨੂੰ ਇਕ ਦਿਨ ਲਈ ਵਧਾ ਦਿੱਤਾ ਸੀ। ਹਿੰਦੁਸਤਾਨ ਪਾਵਰ ਪ੍ਰਾਜੈਕਟਸ ਪ੍ਰਾਈਵੇਟ ਲਿਮਟਿਡ ਦੇ ਪ੍ਰਧਾਨ ਪੁਰੀ 27 ਜੁਲਾਈ ਨੂੰ ਕੋਰਟ ਪਹੁੰਚੇ ਸਨ ਅਤੇ ਮਾਮਲੇ 'ਚ ਮੋਹਰੀ ਜ਼ਮਾਨਤ ਮੰਗੀ ਸੀ। ਉਨ੍ਹਾਂ ਨੇ ਕਿਹਾ ਸੀ ਕਿ ਉਨ੍ਹਾਂ ਨੂੰ ਮਾਮਲੇ 'ਚ ਗ੍ਰਿਫਤਾਰ ਕੀਤੇ ਜਾਣ ਦਾ ਡਰ ਹੈ। ਕੋਰਟ ਨੇ ਸ਼ਨੀਵਾਰ ਨੂੰ ਉਨ੍ਹਾਂ ਨੂੰ 29 ਜੁਲਾਈ ਤੱਕ ਲਈ ਅੰਤਰਿਮ ਸੁਰੱਖਿਆ ਪ੍ਰਦਾਨ ਕੀਤਾ ਸੀ। ਉਨ੍ਹਾਂ ਨੇ ਜਿਰਹ ਦੌਰਾਨ ਚੀਫ਼ ਜਸਟਿਸ ਅਰਵਿੰਦ ਕੁਮਾਰ ਨੂੰ ਕਿਹਾ ਸੀ ਕਿ ਉਹ ਜਾਂਚ 'ਚ ਸਹਿਯੋਗ ਕਰ ਰਹੇ ਹਨ ਅਤੇ ਉਨ੍ਹਾਂ ਦੀ ਗ੍ਰਿਫਤਾਰੀ ਦੀ ਕੋਈ ਲੋੜ ਨਹੀਂ ਹੈ। ਪੁਰੀ ਹਾਲ 'ਚ ਮਾਮਲੇ 'ਚ ਪੁੱਛ-ਗਿੱਛ ਲਈ ਇਨਫੋਰਸਮੈਂਟ ਡਾਇਰੈਕਟੋਰੇਟ ਦੇ ਸਾਹਮਣੇ ਪੇਸ਼ ਹੋਏ ਸਨ, ਜੋ ਕਿ ਅਗਸਤਾ ਵੈਸਟਲੈਂਡ ਨਾਲ ਹੁਣ ਰੱਦ ਹੋ ਚੁਕੇ 3600 ਕਰੋੜ ਰੁਪਏ ਦੇ ਹੈਲੀਕਾਪਟਰ ਸੌਦੇ ਨਾਲ ਸੰਬੰਧਤ ਹਨ।