ਨਾਨ ਖਾਣ ਦੇ ਸ਼ੌਕੀਨਾਂ ਲਈ ਦਿਲਚਸਪ ਖਬਰ, ਜਾਣੋ ਇਸਲਾਮੀ ਦਰਬਾਰਾਂ ਤੋਂ ਸਾਡੀਆਂ ਪਲੇਟਾਂ ਤੱਕ ਕਿਵੇਂ ਪੁੱਜਾ

ਨੈਸ਼ਨਲ ਡੈਸਕ : ਭਾਰਤੀ ਖਾਣੇ ਦੇ ਸੁਆਦ ਨੇ ਅੱਜ ਸੱਤ ਸਮੁੰਦਰੋਂ ਪਾਰ ਵੀ ਆਪਣੀ ਖਾਸ ਜਗ੍ਹਾ ਬਣਾ ਲਈ ਹੈ ਅਤੇ ਦੁਨੀਆ ਭਰ ਦੇ ਲੋਕ ਭਾਰਤੀ ਪਕਵਾਨਾਂ ਨੂੰ ਬਹੁਤ ਚਾਅ ਨਾਲ ਖਾਂਦੇ ਹਨ। ਇਸ ਸੂਚੀ ਵਿੱਚ ਸਭ ਤੋਂ ਉੱਪਰ ਭਾਰਤੀ 'ਨਾਨ' ਦਾ ਨਾਮ ਆਉਂਦਾ ਹੈ, ਜਿਸ ਨੇ ਹਾਲ ਹੀ ਵਿੱਚ ਆਨਲਾਈਨ ਫੂਡ ਗਾਈਡ 'ਟੇਸਟ ਐਟਲਸ' (Taste Atlas) ਦੀ ਦੁਨੀਆ ਦੀ ਸਭ ਤੋਂ ਵਧੀਆ ਬ੍ਰੈੱਡ ਦੀ ਸੂਚੀ ਵਿੱਚ ਪਹਿਲਾ ਸਥਾਨ ਹਾਸਲ ਕਰਕੇ ਇਟਲੀ ਦੀ 'ਪੀਟਾ ਬ੍ਰੈੱਡ' ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ। ਤੰਦੂਰ ਦੀ ਅੱਗ ਵਿੱਚ ਪੱਕੀ, ਮੁਲਾਇਮ ਅਤੇ ਮੱਖਣ ਦੀ ਮਹਿਕ ਨਾਲ ਭਰੀ ਨਾਨ ਦਾ ਸੁਆਦ ਹਰ ਕਿਸੇ ਦਾ ਦਿਲ ਜਿੱਤ ਲੈਂਦਾ ਹੈ।

ਨਾਨ ਦਾ ਇਤਿਹਾਸ ਅਤੇ ਭਾਰਤ ਵਿੱਚ ਆਮਦ 
ਨਾਨ ਦਾ ਇਤਿਹਾਸ ਸਦੀਆਂ ਪੁਰਾਣਾ ਹੈ ਅਤੇ ਇਸ ਦੀਆਂ ਜੜ੍ਹਾਂ ਮੱਧ ਏਸ਼ੀਆ, ਖਾਸ ਕਰਕੇ ਫਾਰਸ (ਈਰਾਨ) ਨਾਲ ਜੁੜੀਆਂ ਹੋਈਆਂ ਹਨ। ਮੰਨਿਆ ਜਾਂਦਾ ਹੈ ਕਿ ਨਾਨ ਸਭ ਤੋਂ ਪਹਿਲਾਂ ਪ੍ਰਾਚੀਨ ਮੇਸੋਪੋਟੇਮੀਆ (ਆਧੁਨਿਕ ਇਰਾਕ) ਵਿੱਚ ਬਣੀ ਸੀ। ਭਾਰਤ ਵਿੱਚ ਇਸ ਦਾ ਪ੍ਰਵੇਸ਼ 16ਵੀਂ ਸ਼ਤਾਬਦੀ ਵਿੱਚ ਮੁਗ਼ਲ ਕਾਲ ਦੌਰਾਨ ਹੋਇਆ ਸੀ। ਮੁਗ਼ਲ ਸ਼ਾਸਕਾਂ ਨੇ ਹੀ ਭਾਰਤ ਵਿੱਚ ਤੰਦੂਰ ਵਿੱਚ ਨਾਨ ਬਣਾਉਣ ਦੀ ਕਲਾ ਨੂੰ ਮਸ਼ਹੂਰ ਕੀਤਾ। ਨਾਨ ਦਾ ਪਹਿਲਾ ਲਿਖਤੀ ਰਿਕਾਰਡ 1300 ਈਸਵੀ ਵਿੱਚ ਭਾਰਤੀ-ਫਾਰਸੀ ਕਵੀ ਅਮੀਰ ਖੁਸਰੋ ਦੇ ਨੋਟਸ ਵਿੱਚ ਮਿਲਦਾ ਹੈ, ਜਿੱਥੇ ਉਨ੍ਹਾਂ ਨੇ 'ਨਾਨ-ਏ-ਤੁਨੁਕ' (ਹਲਕੀ ਰੋਟੀ) ਅਤੇ 'ਨਾਨ-ਏ-ਤਨੁਰੀ' (ਤੰਦੂਰ ਵਿੱਚ ਪੱਕੀ ਰੋਟੀ) ਦਾ ਜ਼ਿਕਰ ਕੀਤਾ ਸੀ।

ਕਿਵੇਂ ਬਣਦਾ ਹੈ ਪਰਫੈਕਟ ਸੁਆਦ?
 'ਨਾਨ' ਸ਼ਬਦ ਫਾਰਸੀ ਭਾਸ਼ਾ ਤੋਂ ਲਿਆ ਗਿਆ ਹੈ, ਜਿਸਦਾ ਅਰਥ ਹੈ 'ਰੋਟੀ'। ਇਸ ਨੂੰ ਮੈਦੇ, ਦਹੀਂ, ਖਮੀਰ ਅਤੇ ਦੁੱਧ ਦੇ ਮਿਸ਼ਰਣ ਨਾਲ ਤਿਆਰ ਕੀਤਾ ਜਾਂਦਾ ਹੈ। ਤੰਦੂਰ ਦੀਆਂ ਕੰਧਾਂ 'ਤੇ ਪਕਾਉਣ ਕਾਰਨ ਇਸ ਵਿੱਚ ਇੱਕ ਅਨੋਖਾ ਧੂੰਏਂਦਾਰ ਸੁਆਦ (Smoky Flavor) ਆਉਂਦਾ ਹੈ, ਜੋ ਇਸਨੂੰ ਬਾਹਰੋਂ ਕੁਰਕੁਰਾ ਅਤੇ ਅੰਦਰੋਂ ਨਰਮ ਤੇ ਸਪੰਜੀ ਬਣਾਉਂਦਾ ਹੈ। ਇਸ ਉੱਪਰ ਲੱਗਿਆ ਮੱਖਣ, ਲਸਣ ਜਾਂ ਤਿਲ ਇਸ ਦੇ ਸੁਆਦ ਨੂੰ ਕਈ ਗੁਣਾ ਵਧਾ ਦਿੰਦੇ ਹਨ।

ਰੋਟੀ ਅਤੇ ਨਾਨ ਵਿੱਚ ਮੁੱਖ ਅੰਤਰ 
ਹਾਲਾਂਕਿ ਨਾਨ ਵੀ ਇੱਕ ਤਰ੍ਹਾਂ ਦੀ ਰੋਟੀ ਹੀ ਹੈ, ਪਰ ਦੋਵਾਂ ਵਿੱਚ ਵੱਡਾ ਫਰਕ ਹੁੰਦਾ ਹੈ:
• ਰੋਟੀ: ਇਹ ਕਣਕ ਦੇ ਆਟੇ, ਪਾਣੀ ਅਤੇ ਨਮਕ ਤੋਂ ਬਣਦੀ ਹੈ, ਜਿਸ ਵਿੱਚ ਖਮੀਰ ਨਹੀਂ ਪਾਇਆ ਜਾਂਦਾ। ਇਹ ਪਤਲੀ ਹੁੰਦੀ ਹੈ ਅਤੇ ਤਵੇ ਜਾਂ ਚੁੱਲ੍ਹੇ 'ਤੇ ਪਕਾਈ ਜਾਂਦੀ ਹੈ।
• ਨਾਨ: ਇਸ ਵਿੱਚ ਖਮੀਰ, ਬੇਕਿੰਗ ਪਾਊਡਰ, ਦਹੀਂ ਜਾਂ ਅੰਡਾ ਮਿਲਾਇਆ ਜਾਂਦਾ ਹੈ ਅਤੇ ਇਹ ਮੈਦੇ ਤੋਂ ਬਣਦੀ ਹੈ। ਇਹ ਮੋਟੀ ਅਤੇ ਨਰਮ ਹੁੰਦੀ ਹੈ ਅਤੇ ਰਵਾਇਤੀ ਤੌਰ 'ਤੇ ਤੰਦੂਰ ਵਿੱਚ ਬਣਾਈ ਜਾਂਦੀ ਹੈ।

ਨਾਨ ਦੀਆਂ ਮਸ਼ਹੂਰ ਕਿਸਮਾਂ ਬਾਜ਼ਾਰ ਵਿੱਚ ਕਈ ਤਰ੍ਹਾਂ ਦੀਆਂ ਨਾਨ ਮਿਲਦੀਆਂ ਹਨ, ਜੋ ਲੋਕਾਂ ਦੀ ਪਹਿਲੀ ਪਸੰਦ ਹਨ:
• ਗਾਰਲਿਕ ਨਾਨ: ਲਸਣ ਦੇ ਸੁਆਦ ਵਾਲੀ ਇਹ ਨਾਨ ਸਭ ਤੋਂ ਵੱਧ ਪਸੰਦ ਕੀਤੀ ਜਾਂਦੀ ਹੈ।
• ਪਨੀਰ ਨਾਨ: ਇਸ ਵਿੱਚ ਮਸਾਲੇਦਾਰ ਪਨੀਰ ਦੀ ਸਟਫਿੰਗ ਹੁੰਦੀ ਹੈ।
• ਪੇਸ਼ਾਵਰੀ ਨਾਨ: ਇਹ ਇੱਕ ਮਿੱਠੀ ਨਾਨ ਹੈ ਜਿਸ ਵਿੱਚ ਸੁੱਕੇ ਮੇਵਿਆਂ ਦਾ ਪੇਸਟ ਭਰਿਆ ਹੁੰਦਾ ਹੈ।
• ਕੰਧਾਰੀ ਨਾਨ: ਇਸ ਨੂੰ ਅਨਾਰ ਦੇ ਬੀਜਾਂ ਅਤੇ ਖਸਖਸ ਨਾਲ ਸਜਾਇਆ ਜਾਂਦਾ ਹੈ, ਜੋ ਇੱਕ ਖੱਟਾ-ਮਿੱਠਾ ਸੁਆਦ ਦਿੰਦਾ ਹੈ।
• ਬਟਰ ਨਾਨ: ਇਹ ਸਭ ਤੋਂ ਆਮ ਕਿਸਮ ਹੈ ਜਿਸ 'ਤੇ ਖੁੱਲ੍ਹਾ ਘਿਓ ਜਾਂ ਮੱਖਣ ਲਗਾਇਆ ਜਾਂਦਾ ਹੈ।

ਕਿਸ ਚੀਜ਼ ਨਾਲ ਖਾਈਏ ਨਾਨ?
 ਨਾਨ ਦੀ ਨਰਮ ਬਣਾਵਟ ਇਸ ਨੂੰ ਗ੍ਰੇਵੀ ਵਾਲੀਆਂ ਸਬਜ਼ੀਆਂ ਅਤੇ ਦਾਲਾਂ ਨਾਲ ਬਿਹਤਰੀਨ ਬਣਾਉਂਦੀ ਹੈ। ਬਟਰ ਚਿਕਨ, ਪਨੀਰ ਟਿੱਕਾ ਮਸਾਲਾ, ਕੋਰਮਾ ਅਤੇ ਦਾਲ ਮੱਖਣੀ ਨਾਲ ਨਾਨ ਦਾ ਸੁਮੇਲ ਦੁਨੀਆ ਭਰ ਵਿੱਚ ਮਸ਼ਹੂਰ ਹੈ। ਭਾਰਤ ਵਿੱਚ ਦਿੱਲੀ ਅਤੇ ਅੰਮ੍ਰਿਤਸਰ ਵਿੱਚ ਬਣਨ ਵਾਲੇ ਨਾਨ ਦੇ ਸੁਆਦ ਦਾ ਕੋਈ ਮੁਕਾਬਲਾ ਨਹੀਂ ਹੈ।

ਘਰ ਵਿੱਚ ਬਣਾਉਣ ਦਾ ਤਰੀਕਾ 
ਤੁਸੀਂ ਘਰ ਵਿੱਚ ਵੀ ਤਵੇ 'ਤੇ ਮੁਲਾਇਮ ਨਾਨ ਬਣਾ ਸਕਦੇ ਹੋ। ਇਸ ਲਈ ਮੈਦੇ ਵਿੱਚ ਚੀਨੀ, ਖਮੀਰ, ਦਹੀਂ, ਨਮਕ ਅਤੇ ਤੇਲ ਪਾ ਕੇ ਨਰਮ ਆਟਾ ਗੁੰਨ ਲਓ ਅਤੇ 2 ਘੰਟੇ ਲਈ ਰੱਖ ਦਿਓ। ਫਿਰ ਇਸ ਨੂੰ ਵੇਲ ਕੇ ਇੱਕ ਪਾਸੇ ਪਾਣੀ ਲਗਾਓ ਅਤੇ ਗਰਮ ਤਵੇ ਜਾਂ ਕੜਾਹੀ 'ਤੇ ਚਿਪਕਾ ਕੇ ਪਕਾਓ। ਇਸ ਨੂੰ ਓਵਨ ਵਿੱਚ 200°C 'ਤੇ 5-7 ਮਿੰਟ ਲਈ ਵੀ ਬੇਕ ਕੀਤਾ ਜਾ ਸਕਦਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e

ਇਹ ਵੀ ਪੜ੍ਹੋ : ਤੂਫ਼ਾਨੀ ਤਾਕਤ ਦਾ ਕਾਮਯਾਬ ਸ਼ਾਹੀ ਨੁਸਖਾ ਕਰ ਲਓ ਨੋਟ, ਪੂਰੀ ਸਰਦੀਆਂ ਆਵੇਗਾ ਕੰਮ