ਭਾਰਤੀ ਬੰਦਰਗਾਹਾਂ ਤੱਕ ਪੁੱਜਾ ਇਜ਼ਰਾਈਲ-ਈਰਾਨ ਜੰਗ ਦਾ ਸੇਕ ! ਸਮੁੰਦਰ ਵਿਚਾਲੇ ਫਸੀਆਂ 2,000 ਕਾਰਾਂ

ਗੈਜੇਟ ਡੈਸਕ : ਪੱਛਮੀ ਏਸ਼ੀਆ 'ਚ ਚੱਲ ਰਿਹਾ ਈਰਾਨ, ਇਜ਼ਰਾਈਲ ਅਤੇ ਅਮਰੀਕਾ ਦਾ ਸੰਘਰਸ਼ ਹੁਣ ਭਾਰਤ ਦੀ ਨਿਰਯਾਤ (Export) ਵਿਵਸਥਾ ਲਈ ਵੱਡੀ ਮੁਸੀਬਤ ਬਣ ਗਿਆ ਹੈ। ਜੰਗ ਦੇ ਕਾਰਨ ਸਮੁੰਦਰੀ ਰਸਤਿਆਂ ਵਿੱਚ ਪੈਦਾ ਹੋਏ ਖ਼ਤਰੇ ਕਾਰਨ ਭਾਰਤ ਤੋਂ ਖਾੜੀ (Gulf) ਦੇਸ਼ਾਂ ਨੂੰ ਭੇਜੀਆਂ ਜਾ ਰਹੀਆਂ ਲਗਭਗ 2,000 ਹੁੰਡਈ ਕਾਰਾਂ ਹੁਣ ਰਸਤੇ ਵਿੱਚ ਹੀ ਫਸ ਗਈਆਂ ਹਨ ਅਤੇ ਉਨ੍ਹਾਂ ਨੂੰ ਵਾਪਸ ਚੇਨਈ ਪੋਰਟ 'ਤੇ ਲਿਆਉਣ ਦੀ ਸੰਭਾਵਨਾ ਬਣ ਗਈ ਹੈ।

ਸ਼ਿਪਿੰਗ ਰੂਟ ਬਦਲਣ ਨਾਲ ਵਧੀ ਮੁਸ਼ਕਲ 
ਰਿਪੋਰਟਾਂ ਅਨੁਸਾਰ, ਇਹ ਗੱਡੀਆਂ ਪਹਿਲਾਂ ਸ੍ਰੀਲੰਕਾ ਦੇ ਹੰਬਨਟੋਟਾ ਬੰਦਰਗਾਹ ਰਾਹੀਂ ਪੱਛਮੀ ਏਸ਼ੀਆ ਭੇਜੀਆਂ ਜਾਣੀਆਂ ਸਨ। ਪਰ 'ਸਟਰੇਟ ਆਫ ਹੋਰਮੂਜ਼' ਅਤੇ ਲਾਲ ਸਾਗਰ ਵਿੱਚ ਵਧਦੇ ਜੰਗੀ ਜੋਖਮਾਂ ਕਾਰਨ ਸ਼ਿਪਿੰਗ ਕੰਪਨੀਆਂ ਆਪਣੇ ਜਹਾਜ਼ਾਂ ਨੂੰ ਇਨ੍ਹਾਂ ਰਸਤਿਆਂ ਤੋਂ ਲਿਜਾਣ ਤੋਂ ਬਚ ਰਹੀਆਂ ਹਨ। ਸਿਰਫ਼ ਕਾਰਾਂ ਹੀ ਨਹੀਂ, ਸਗੋਂ ਲਗਭਗ 4,000 ਕੰਟੇਨਰਾਂ ਨੂੰ ਵੀ ਉਨ੍ਹਾਂ ਦੇ ਤੈਅ ਰਸਤਿਆਂ ਤੋਂ ਵਾਪਸ ਮੋੜ ਦਿੱਤਾ ਗਿਆ ਹੈ, ਜਿਨ੍ਹਾਂ ਵਿੱਚੋਂ 1,800 ਕੰਟੇਨਰ ਇਕੱਲੇ ਚੇਨਈ ਤੋਂ ਭੇਜੇ ਗਏ ਸਨ।

ਕੱਪੜੇ ਅਤੇ ਖਾਣ-ਪੀਣ ਦੀਆਂ ਵਸਤਾਂ ਦੇ ਨਿਰਯਾਤ 'ਤੇ ਵੀ ਅਸਰ
 ਇਸ ਜੰਗ ਦੀ ਆਂਚ ਸਿਰਫ਼ ਆਟੋਮੋਬਾਈਲ ਸੈਕਟਰ ਤੱਕ ਹੀ ਸੀਮਤ ਨਹੀਂ ਹੈ, ਸਗੋਂ ਟੈਕਸਟਾਈਲ (ਕੱਪੜਾ) ਅਤੇ ਖਾਧ ਪਦਾਰਥਾਂ ਦੇ ਕਾਰੋਬਾਰ 'ਤੇ ਵੀ ਇਸ ਦਾ ਮਾੜਾ ਅਸਰ ਪੈ ਰਿਹਾ ਹੈ। ਫਰਵਰੀ ਦੇ ਅਖੀਰ ਤੋਂ ਜੰਗ ਤੇਜ਼ ਹੋਣ ਕਾਰਨ ਤਾਮਿਲਨਾਡੂ ਦੀਆਂ ਬੰਦਰਗਾਹਾਂ ਤੋਂ ਜਹਾਜ਼ਾਂ ਦੀ ਆਵਾਜਾਈ ਕਾਫ਼ੀ ਸੁਸਤ ਪੈ ਗਈ ਹੈ। ਕਈ ਜਹਾਜ਼ਾਂ ਨੂੰ ਸਮੁੰਦਰ ਦੇ ਵਿਚਕਾਰੋਂ ਹੀ ਰਸਤਾ ਬਦਲ ਕੇ ਜਵਾਹਰ ਲਾਲ ਨਹਿਰੂ ਪੋਰਟ ਵਰਗੇ ਹੋਰਨਾਂ ਸਥਾਨਾਂ 'ਤੇ ਸਾਮਾਨ ਉਤਾਰਨਾ ਪੈ ਰਿਹਾ ਹੈ।

ਚੇਨਈ ਪੋਰਟ 'ਤੇ ਕੀਤੇ ਜਾ ਰਹੇ ਵਿਸ਼ੇਸ਼ ਪ੍ਰਬੰਧ 
ਮੌਜੂਦਾ ਸੰਕਟ ਨੂੰ ਦੇਖਦੇ ਹੋਏ ਚੇਨਈ ਪੋਰਟ ਅਥਾਰਟੀ ਵੱਲੋਂ ਅਗਾਊਂ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ। ਵਾਪਸ ਆਉਣ ਵਾਲੇ ਸਾਮਾਨ ਅਤੇ ਕੰਟੇਨਰਾਂ ਨੂੰ ਰੱਖਣ ਲਈ ਲਗਭਗ 20,000 ਵਰਗ ਮੀਟਰ ਦੇ ਖੇਤਰ ਵਿੱਚ ਟੈਂਪਰੇਰੀ ਕਾਰਗੋ ਸਟੋਰੇਜ ਯਾਰਡ ਤਿਆਰ ਕੀਤਾ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਪੋਰਟ ਅਧਿਕਾਰੀ ਅਤੇ ਨਿਰਯਾਤਕ ਲਗਾਤਾਰ ਮੀਟਿੰਗਾਂ ਕਰ ਰਹੇ ਹਨ ਤਾਂ ਜੋ ਜੰਗ ਪ੍ਰਭਾਵਿਤ ਰਸਤਿਆਂ ਤੋਂ ਬਚਣ ਲਈ ਕੋਈ ਬਦਲਵਾਂ ਸਮੁੰਦਰੀ ਰਸਤਾ ਲੱਭਿਆ ਜਾ ਸਕੇ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e