ਲੱਦਾਖ ''ਚ ਚੀਨੀ ਕਾਉਂਟੀਜ਼ ਦੇ ਐਲਾਨ ਦਾ ਭਾਰਤ ਦਾ ਸਖ਼ਤ ਵਿਰੋਧ, ਚੁੱਕੇ ਗਏ ਕੂਟਨੀਤਕ ਕਦਮ

ਵੈੱਬ ਡੈਸਕ : ਭਾਰਤ ਨੇ ਚੀਨ ਦੁਆਰਾ ਸਥਾਪਿਤ ਕੀਤੀਆਂ ਦੋ ਨਵੀਆਂ ਕਾਉਂਟੀਆਂ 'ਤੇ ਸਖ਼ਤ ਇਤਰਾਜ਼ ਜਤਾਇਆ ਹੈ, ਜਿਨ੍ਹਾਂ ਦੇ ਕੁਝ ਹਿੱਸੇ ਭਾਰਤ ਦੇ ਲੱਦਾਖ ਖੇਤਰ ਵਿੱਚ ਆਉਂਦੇ ਹਨ। ਵਿਦੇਸ਼ ਮੰਤਰਾਲੇ (MEA) ਨੇ ਕਿਹਾ ਕਿ ਚੀਨ ਦੇ ਇਸ ਕਦਮ ਨੂੰ ਲੈ ਕੇ ਕੂਟਨੀਤਕ ਚੈਨਲਾਂ ਰਾਹੀਂ ਰਸਮੀ ਵਿਰੋਧ ਦਰਜ ਕਰਵਾਇਆ ਗਿਆ ਹੈ।

ਕੀ ਹੈ ਮਾਮਲਾ?
ਉੱਤਰ-ਪੱਛਮੀ ਚੀਨ ਦੇ ਸ਼ਿਨਜਿਆਂਗ ਉਇਗੁਰ ਆਟੋਨੋਮਸ ਰੀਜਨ ਨੇ ਦੋ ਨਵੀਆਂ ਕਾਉਂਟੀਆਂ - ਹੇਆਨ ਅਤੇ ਹੇਕਾਂਗ ਦੇ ਗਠਨ ਦਾ ਐਲਾਨ ਕੀਤਾ ਹੈ - ਬਾਰੇ ਚੀਨ ਦੀ ਸਰਕਾਰੀ ਸਮਾਚਾਰ ਏਜੰਸੀ ਸਿਨਹੂਆ ਨੇ 27 ਦਸੰਬਰ ਨੂੰ ਰਿਪੋਰਟ ਕੀਤੀ। ਇਹ ਕਾਉਂਟੀਆਂ ਹੋਟਨ ਪ੍ਰੀਫੈਕਚਰ ਦੇ ਅਧੀਨ ਆਉਣਗੀਆਂ। ਚੀਨ ਦੀ ਕਮਿਊਨਿਸਟ ਪਾਰਟੀ ਦੀ ਕੇਂਦਰੀ ਕਮੇਟੀ ਅਤੇ ਸਟੇਟ ਕੌਂਸਲ ਨੇ ਇਨ੍ਹਾਂ ਕਾਉਂਟੀਆਂ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਹੇਆਨ ਕਾਉਂਟੀ ਦਾ ਹੈੱਡਕੁਆਰਟਰ ਹੋਂਗਲੀਊ ਟਾਊਨਸ਼ਿਪ ਵਿੱਚ ਹੋਵੇਗਾ ਅਤੇ ਹੇਕਾਂਗ ਕਾਉਂਟੀ ਦਾ ਮੁੱਖ ਦਫ਼ਤਰ ਸ਼ਿਦੁਲਾ ਟਾਊਨਸ਼ਿਪ ਵਿੱਚ ਹੋਵੇਗਾ।

ਭਾਰਤ ਦਾ ਜਵਾਬ
MEA ਦੇ ਬੁਲਾਰੇ ਰਣਧੀਰ ਜੈਸਵਾਲ ਨੇ ਕਿਹਾ, "ਅਸੀਂ ਚੀਨ ਦੇ ਇਸ ਕਦਮ ਦਾ ਨੋਟਿਸ ਲਿਆ ਹੈ। ਇਨ੍ਹਾਂ ਅਖੌਤੀ ਕਾਉਂਟੀਆਂ ਦੇ ਕੁਝ ਹਿੱਸੇ ਭਾਰਤ ਦੇ ਲੱਦਾਖ ਕੇਂਦਰ ਸ਼ਾਸਤ ਪ੍ਰਦੇਸ਼ ਵਿੱਚ ਆਉਂਦੇ ਹਨ। ਭਾਰਤ ਨੇ ਇਸ ਖੇਤਰ 'ਤੇ ਚੀਨ ਦੇ ਕਬਜ਼ੇ ਨੂੰ ਕਦੇ ਵੀ ਸਵੀਕਾਰ ਨਹੀਂ ਕੀਤਾ ਹੈ।" ਉਨ੍ਹਾਂ ਨੇ ਅੱਗੇ ਕਿਹਾ, "ਇਨ੍ਹਾਂ ਨਵੀਆਂ ਕਾਉਂਟੀਆਂ ਦੇ ਗਠਨ ਨਾਲ ਭਾਰਤ ਦੀ ਪ੍ਰਭੂਸੱਤਾ 'ਤੇ ਸਾਡੀ ਲੰਬੇ ਸਮੇਂ ਦੀ ਅਤੇ ਸਪੱਸ਼ਟ ਸਥਿਤੀ 'ਤੇ ਕੋਈ ਅਸਰ ਨਹੀਂ ਪਵੇਗਾ। ਇਹ ਚੀਨ ਦੇ ਗੈਰ-ਕਾਨੂੰਨੀ ਅਤੇ ਜ਼ਬਰਦਸਤੀ ਕਬਜ਼ੇ ਨੂੰ ਜਾਇਜ਼ ਨਹੀਂ ਠਹਿਰਾਉਂਦਾ।"

ਬ੍ਰਹਮਪੁੱਤਰ 'ਤੇ ਬੰਨ੍ਹ ਨੂੰ ਲੈ ਕੇ ਚਿੰਤਾ
ਭਾਰਤ ਨੇ ਬ੍ਰਹਮਪੁੱਤਰ ਨਦੀ 'ਤੇ ਚੀਨ ਦੁਆਰਾ ਬਣਾਏ ਜਾ ਰਹੇ ਪਣ-ਬਿਜਲੀ ਪ੍ਰਾਜੈਕਟ ਨੂੰ ਲੈ ਕੇ ਵੀ ਆਪਣੀ ਚਿੰਤਾ ਜ਼ਾਹਰ ਕੀਤੀ ਹੈ। MEA ਨੇ ਕਿਹਾ ਕਿ ਇਸ ਮੁੱਦੇ 'ਤੇ ਚੀਨ ਨਾਲ ਵੀ ਆਪਣੀਆਂ ਚਿੰਤਾਵਾਂ ਸਾਂਝੀਆਂ ਕੀਤੀਆਂ ਗਈਆਂ ਹਨ। ਭਾਰਤ ਨੇ ਆਪਣੀ ਖੇਤਰੀ ਅਖੰਡਤਾ ਅਤੇ ਪ੍ਰਭੂਸੱਤਾ ਦੀ ਰੱਖਿਆ ਲਈ ਆਪਣੀ ਵਚਨਬੱਧਤਾ ਨੂੰ ਦੁਹਰਾਉਂਦੇ ਹੋਏ ਚੀਨ ਦੇ ਇਨ੍ਹਾਂ ਕਦਮਾਂ ਦਾ ਸਖ਼ਤ ਵਿਰੋਧ ਕੀਤਾ ਹੈ।

ਤਾਜ਼ਾ ਤੇ ਵੱਡੀਆਂ ਖ਼ਬਰਾਂ ਸਭ ਤੋਂ ਪਹਿਲਾਂ ਪੜ੍ਹਨ ਲਈ ਜੁਆਇਨ ਕਰੋ ‘ਜਗ ਬਾਣੀ’ ਦਾ ਵਟਸਐਪ ਚੈਨਲ
👇Join us on Whatsapp channel👇
https://whatsapp.com/channel/0029Va94hsaHAdNVur4L170e