ਸਾਲ 2026 ਤੱਕ ਹਵਾਈ ਫੌਜ ਨੂੰ 6 ਤੇਜਸ ਲੜਾਕੂ ਜਹਾਜ਼ ਮਿਲਣ ਦੀ ਆਸ, HAL ਨੇ ਦੇਰੀ ਦਾ ਦੱਸਿਆ ਕਾਰਨ

ਵੈੱਬ ਡੈਸਕ - ਭਾਰਤੀ ਹਵਾਈ ਸੈਨਾ ਲਈ ਇਹ ਖਬਰ ਕਿਸੇ ਖੁਸ਼ਖਬਰੀ ਤੋਂ ਘੱਟ ਨਹੀਂ ਹੋਵੇਗੀ। ਦੱਸਿਆ ਗਿਆ ਹੈ ਕਿ ਹਵਾਈ ਸੈਨਾ ਨੂੰ ਮਾਰਚ 2026 ਤੱਕ ਘੱਟੋ-ਘੱਟ ਅੱਧਾ ਦਰਜਨ ਹਲਕੇ ਲੜਾਕੂ ਜਹਾਜ਼ (LCA) ਤੇਜਸ ਮਿਲ ਜਾਣਗੇ, ਇਹ ਜਾਣਕਾਰੀ ਹਿੰਦੁਸਤਾਨ ਏਅਰੋਨੌਟਿਕਸ ਲਿਮਟਿਡ (HAL) ਦੇ ਮੁਖੀ ਨੇ ਦਿੱਤੀ ਹੈ ਜੋ ਕਿ ਇਨ੍ਹਾਂ ਅਤਿ-ਆਧੁਨਿਕ ਲੜਾਕੂ ਜਹਾਜ਼ਾਂ ਦਾ ਨਿਰਮਾਣ ਕਰਨ ਵਾਲੀ ਕੰਪਨੀ ਹੈ। ਉਨ੍ਹਾਂ ਕਿਹਾ ਕਿ ਤੇਜਸ ਦੀ ਸਪਲਾਈ ਵਿਚ ਦੇਰੀ ਲਈ GE ਏਅਰੋਸਪੇਸ ਰਾਹੀਂ ਇੰਜਣਾਂ ਦੀ ਸਪਲਾਈ ਵਿਚ ਦੇਰੀ ਜ਼ਿੰਮੇਵਾਰ ਹੈ। 

ਮਿਲੀ ਜਾਣਕਾਰੀ ਅਨੁਸਾਰ, ਹਵਾਈ ਸੈਨਾ ਦੇ ਮੁਖੀ ਏਅਰ ਚੀਫ ਮਾਰਸ਼ਲ ਏ.ਪੀ. ਸਿੰਘ ਨੇ ਐਲਸੀਏ ਤੇਜਸ ਦੇ ਐਮਕੇ-1ਏ ਵਰਜਨ ਦੀ ਸਪਲਾਈ ਵਿਚ ਦੇਰੀ ਦਾ ਮੁੱਦਾ ਉਠਾਇਆ ਸੀ, ਜਿਸ ਤੋਂ ਬਾਅਦ ਇਹ ਇਕ ਵੱਡਾ ਮੁੱਦਾ ਬਣ ਗਿਆ। ਐਚਏਐਲ ਦੇ ਚੇਅਰਮੈਨ ਅਤੇ ਪ੍ਰਬੰਧ ਨਿਰਦੇਸ਼ਕ (ਸੀਐਮਡੀ) ਡੀਕੇ ਸੁਨੀਲ ਨੇ ਕਿਹਾ ਕਿ ਇਹ ਦੇਰੀ ਸਿਰਫ ਅਮਰੀਕੀ ਕੰਪਨੀ ਜੀਈ ਏਰੋਸਪੇਸ ਦੁਆਰਾ ਸਮੇਂ ਸਿਰ F404 ਇੰਜਣ ਦੀ ਸਪਲਾਈ ਕਰਨ ਵਿਚ ਅਸਮਰੱਥਾ ਕਾਰਨ ਹੋਈ।
 
ਐੱਚਏਐੱਲ ਮੁਖੀ ਨੇ ਕਿਹਾ ਕਿ ਜੀਈ ਏਅਰੋਸਪੇਸ ਵੱਲੋਂ ਮੌਜੂਦਾ ਵਿੱਤੀ ਸਾਲ ਵਿਚ 12 ਇੰਜਣ ਸਪਲਾਈ ਕਰਨ ਦੀ ਉਮੀਦ ਹੈ। ਇਸ ਨਾਲ ਭਾਰਤੀ ਹਵਾਈ ਸੈਨਾ ਨੂੰ ਲੜਾਕੂ ਜਹਾਜ਼ਾਂ ਦੀ ਸਪਲਾਈ ਵਿਚ ਮਦਦ ਮਿਲੇਗੀ। ਉਨ੍ਹਾਂ ਕਿਹਾ ਕਿ ਹਰ ਕੰਪਨੀ ਨੂੰ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਅਜਿਹਾ ਹੁੰਦਾ ਹੈ ਅਤੇ ਬਦਕਿਸਮਤੀ ਨਾਲ ਐਲਸੀਏ ਐਮਕੇ-1ਏ ਦੇ ਮਾਮਲੇ ਵਿਚ ਵੀ ਅਜਿਹਾ ਹੀ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਜਹਾਜ਼ ਬਣਾਇਆ ਹੈ ਅਤੇ ਅੱਜ ਤੱਕ ਸਾਡੇ ਕੋਲ ਛੇ ਜਹਾਜ਼ ਤਿਆਰ ਹਨ। ਉਨ੍ਹਾਂ ਕਿਹਾ ਕਿ ਜੀਈ ਏਅਰੋਸਪੇਸ ਵੱਲੋਂ ਇੰਜਣ ਦੀ ਸਪਲਾਈ ਨਹੀਂ ਕੀਤੀ ਗਈ ਹੈ, 2023 ਵਿਚ ਇੰਜਣ ਦੀ ਸਪਲਾਈ ਕਰਨੀ ਚਾਹੀਦੀ ਸੀ ਪਰ ਅਜਿਹਾ ਨਹੀਂ ਹੋਇਆ। ਹੁਣ ਤੱਕ ਸਿਰਫ਼ ਇਕ ਇੰਜਣ ਪ੍ਰਾਪਤ ਹੋਇਆ ਹੈ।

ਜੀਈ ਵੱਲੋਂ ਦੇਰੀ ਸ਼ੁਰੂ ਵਿਚ ਕੋਵਿਡ ਮਹਾਂਮਾਰੀ ਦੌਰਾਨ ਉਤਪਾਦਨ ਵਿਚ ਦੇਰੀ ਅਤੇ ਫਿਰ ਕੰਪਨੀ ਤੋਂ ਕਈ ਸੀਨੀਅਰ ਇੰਜੀਨੀਅਰਾਂ ਦੇ ਜਾਣ ਕਾਰਨ ਹੋਈ, ਜਿਸ ਕਾਰਨ ਸਪਲਾਈ ਵਿਚ ਅੜਿੱਕਾ ਪਿਆ। ਸੁਨੀਲ ਅਨੁਸਾਰ ਜੀਈ ਏਅਰੋਸਪੇਸ ਨਾਲ ਤਕਨੀਕੀ ਸਮੱਸਿਆਵਾਂ ਹੱਲ ਹੋ ਗਈਆਂ ਹਨ ਅਤੇ ਐਚਏਐਲ ਨੂੰ ਮਾਰਚ 2026 ਤੱਕ 12 ਜੈੱਟ ਇੰਜਣ ਮਿਲਣ ਦੀ ਉਮੀਦ ਹੈ। ਉਨ੍ਹਾਂ ਕਿਹਾ, ਅੱਜ ਤੱਕ ਛੇ ਜਹਾਜ਼ ਤਿਆਰ ਹਨ। ਸਾਡੇ ਵੱਲੋਂ ਕੋਈ ਕਮੀ ਨਹੀਂ ਹੈ। ਅਸੀਂ ਇਨ੍ਹਾਂ ਜਹਾਜ਼ਾਂ ਦਾ ਨਿਰੰਤਰ ਨਿਰਮਾਣ ਅਤੇ ਤਿਆਰੀ ਕਰ ਰਹੇ ਹਾਂ। ਅਸੀਂ ਉਨ੍ਹਾਂ ਨੂੰ ਡਿਲੀਵਰ ਕਰਨ ਦੀ ਸਥਿਤੀ ਵਿੱਚ ਹੋਵਾਂਗੇ।

ਐਚਏਐਲ ਆਉਣ ਵਾਲੇ ਸਾਲ ਵਿਚ 16 ਜੈੱਟ ਬਣਾਉਣ ਦੀ ਯੋਜਨਾ ਬਣਾ ਰਿਹਾ ਹੈ, ਬਸ਼ਰਤੇ ਜੀਈ ਏਅਰੋਸਪੇਸ ਤੋਂ ਇੰਜਣਾਂ ਦੀ ਸਪਲਾਈ ਸੰਭਵ ਹੋਵੇ। ਰੱਖਿਆ ਮੰਤਰਾਲੇ ਨੇ ਫਰਵਰੀ 2021 ਵਿਚ ਹਵਾਈ ਸੈਨਾ ਲਈ 83 ਤੇਜਸ ਐਮਕੇ-1ਏ ਜੈੱਟਾਂ ਦੀ ਖਰੀਦ ਲਈ ਐਚਏਐਲ ਨਾਲ 48,000 ਕਰੋੜ ਰੁਪਏ ਦਾ ਸੌਦਾ ਕੀਤਾ ਸੀ। ਮੰਤਰਾਲਾ 67,000 ਕਰੋੜ ਰੁਪਏ ਦੀ ਲਾਗਤ ਨਾਲ 97 ਹੋਰ ਐਲਸੀਏ ਐਮਕੇ-1ਏ ਖਰੀਦਣ ਦੀ ਪ੍ਰਕਿਰਿਆ ਵਿਚ ਹੈ। ਸਿੰਗਲ-ਇੰਜਣ ਵਾਲਾ Mk-1A ਭਾਰਤੀ ਹਵਾਈ ਸੈਨਾ ਦੇ MiG-21 ਲੜਾਕੂ ਜਹਾਜ਼ਾਂ ਦੀ ਥਾਂ ਲਵੇਗਾ। ਭਾਰਤੀ ਹਵਾਈ ਸੈਨਾ ਇਨ੍ਹਾਂ ਲੜਾਕੂ ਜਹਾਜ਼ਾਂ ਨੂੰ ਆਪਣੇ ਬੇੜੇ ਵਿਚ ਸ਼ਾਮਲ ਕਰਨ 'ਤੇ ਵਿਚਾਰ ਕਰ ਰਹੀ ਹੈ ਕਿਉਂਕਿ ਇਸਦੇ ਲੜਾਕੂ ਸਕੁਐਡਰਨ ਦੀ ਗਿਣਤੀ ਅਧਿਕਾਰਤ ਤੌਰ 'ਤੇ ਪ੍ਰਵਾਨਿਤ 42 ਤੋਂ ਘੱਟ ਕੇ 31 ਹੋ ਗਈ ਹੈ।