ਮੱਧ ਪ੍ਰਦੇਸ਼ ’ਚ ਇਨਸਾਨੀਅਤ ਸ਼ਰਮਸਾਰ! ਕੂੜੇ ਵਾਲੀ ਗੱਡੀ ’ਚ ਰੱਖੀ ਔਰਤ ਦੀ ਲਾਸ਼

ਦਤੀਆ (ਮੱਧ ਪ੍ਰਦੇਸ਼)- ਇੱਥੋਂ ਦੀ ਇੰਦਰਗੜ੍ਹ ਤਹਿਸੀਲ ’ਚ ਸਿਹਤ ਵਿਭਾਗ ਅਤੇ ਨਗਰ ਪਰਿਸ਼ਦ ਨੇ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰ ਦਿੱਤਾ। ਇੰਦਰਗੜ੍ਹ ’ਚ ਕੁਝ ਦਿਨਾਂ ਤੋਂ ਇਕ ਮਾਨਸਿਕ ਰੋਗੀ ਔਰਤ ਰਹਿ ਰਹੀ ਸੀ, ਜਿਸ ਦੀ ਸਵੇਰੇ ਮੌਤ ਹੋ ਗਈ। ਸਥਾਨਕ ਲੋਕਾਂ ਦਾ ਅੰਦਾਜ਼ਾ ਹੈ ਕਿ ਭੁੱਖ ਅਤੇ ਠੰਢ ਦੇ ਕਾਰਨ ਉਸ ਦੀ ਮੌਤ ਹੋਈ। ਲੋਕਾਂ ਨੇ ਸੜਕ ’ਤੇ ਉਸ ਦੀ ਲਾਸ਼ ਦੇਖੀ ਤਾਂ ਸਿਹਤ ਵਿਭਾਗ ਅਤੇ ਨਗਰ ਪਰਿਸ਼ਦ ਨੂੰ ਇਸ ਦੀ ਸੂਚਨਾ ਦਿੱਤੀ।

ਸਮਾਜ ਸੇਵੀਆਂ ਦੇ ਫ਼ੋਨ ਤੋਂ ਬਾਅਦ ਵੀ ਮੌਕੇ ’ਤੇ ਐਂਬੂਲੈਂਸ ਨਹੀਂ ਪਹੁੰਚ ਸਕੀ। ਕਾਫੀ ਦੇਰ ਬਾਅਦ ਨਗਰ ਪਰਿਸ਼ਦ ਨੇ ਆਪਣੀ ਕੂੜੇ ਵਾਲੀ ਗੱਡੀ ਭੇਜੀ ਅਤੇ ਉਸੇ ’ਚ ਔਰਤ ਦੀ ਲਾਸ਼ ਰਖਵਾ ਦਿੱਤੀ।

ਪੋਸਟਮਾਰਟਮ ਤੋਂ ਬਾਅਦ ਜਦੋਂ ਮੁਲਾਜ਼ਮ ਔਰਤ ਦੀ ਲਾਸ਼ ਨੂੰ ਦਫ਼ਨਾਉਣ ਪਹੁੰਚੇ ਤਾਂ ਇਕ ਵਾਰ ਫਿਰ ਮਨੁੱਖੀ ਸੰਵੇਦਨਾਵਾਂ ਨੂੰ ਝੰਜੋੜਨ ਵਾਲੀਆਂ ਤਸਵੀਰਾਂ ਸਾਹਮਣੇ ਆਈਆਂ। ਲਾਸ਼ ਨੂੰ ਦਫ਼ਨਾਉਣ ਲਈ ਜੇ. ਸੀ. ਬੀ. ਨਾਲ ਟੋਆ ਪੁੱਟਿਆ ਗਿਆ। ਬਾਅਦ ’ਚ ਲਾਸ਼ ਦੇ ਉੱਪਰ ਕੱਪੜਾ ਪਾ ਕੇ ਹੱਥਾਂ ਨਾਲ ਮਿੱਟੀ ਪਾਉਣ ਦੀ ਬਜਾਏ ਜੇ. ਸੀ. ਬੀ. ਨਾਲ ਮਿੱਟੀ ਪਾ ਕੇ ਖਾਨਾਪੂਰਤੀ ਕਰ ਦਿੱਤੀ ਗਈ।