ਹਿਮਾਚਲ ''ਚ ਉੱਚਾਈ ਵਾਲੇ ਇਲਾਕਿਆਂ ''ਚ ਬਰਫਬਾਰੀ ਕਾਰਨ 3 ਕੌਮੀ ਹਾਈਵੇਅ ਸਮੇਤ 350 ਸੜਕਾਂ ਜਾਮ

ਸ਼ਿਮਲਾ- ਹਿਮਾਚਲ ਪ੍ਰਦੇਸ਼ ਦੇ ਉੱਚਾਈ ਵਾਲੇ ਅਤੇ ਜਨਜਾਤੀ ਇਲਾਕਿਆਂ ਵਿਚ ਤਾਜ਼ਾ ਬਰਫ਼ਬਾਰੀ ਕਾਰਨ 3 ਕੌਮੀ ਹਾਈਵੇਅ ਸਮੇਤ 350 ਤੋਂ ਵਧ ਸੜਕਾਂ ਆਵਾਜਾਈ ਲਈ ਬੰਦ ਹੋ ਗਈਆਂ ਹਨ। ਅਧਿਕਾਰੀਆਂ ਮੁਤਾਬਕ ਪਿਛਲੇ 24 ਘੰਟਿਆਂ 'ਚ ਬਰਫ਼ਬਾਰੀ ਕਾਰਨ ਬੰਦ 450 ਤੋਂ ਵਧ ਸੜਕਾਂ 'ਚੋਂ 140 ਨੂੰ ਖੋਲ੍ਹ ਦਿੱਤਾ ਗਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ 357 ਸੜਕਾਂ ਅਜੇ ਵੀ ਬੰਦ ਹਨ। ਅਧਿਕਾਰੀਆਂ ਨੇ ਕਿਹਾ ਕਿ ਲਾਹੌਲ-ਸਪੀਤੀ ਵਿਚ ਸਭ ਤੋਂ ਵਧ 154 ਸੜਕਾਂ, ਸ਼ਿਮਲਾ 'ਚ 86, ਕਿੰਨੌਰ 'ਚ 73, ਕੁੱਲੂ 'ਚ 26, ਚੰਬਾ 'ਚ 13, ਮੰਡੀ 'ਚ 3 ਅਤੇ ਕਾਂਗੜਾ 'ਚ 2 ਸੜਕਾਂ ਬੰਦ ਹਨ।

ਸੂਬਾ ਐਮਰਜੈਂਸੀ ਸੰਚਾਲਨ ਸੈਂਟਰ ਦੇ ਅੰਕੜਿਆਂ ਅਨੁਸਾਰ ਸੂਬੇ ਭਰ ' 540 ਟਰਾਂਸਫਾਰਮਰ ਅਤੇ 34 ਜਲ ਸਪਲਾਈ ਯੋਜਨਾਵਾਂ ਵਿਚ ਵੀ ਵਿਘਨ ਪਿਆ ਹੈ। ਲੋਕ ਨਿਰਮਾਣ ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਬਰਫ਼ਬਾਰੀ ਵਾਲੇ ਇਲਾਕਿਆਂ 'ਚ ਸੜਕਾਂ ਤੋਂ ਬਰਫ ਹਟਾਉਣ ਲਈ ਕਰਮੀਆਂ ਅਤੇ ਮਸ਼ੀਨਾਂ ਨੂੰ ਤਾਇਨਾਤ ਕੀਤਾ ਗਿਆ ਹੈ ਅਤੇ ਉਹ ਪੂਰੀ ਸਮਰੱਥਾ ਨਾਲ ਕੰਮ ਕਰ ਰਹੇ ਹਨ।

ਸਥਾਨਕ ਮੌਸਮ ਵਿਗਿਆਨ ਕੇਂਦਰ ਨੇ 2 ਫਰਵਰੀ ਨੂੰ ਮੱਧਮ ਅਤੇ ਉੱਚਾਈ ਵਾਲੇ ਪਹਾੜੀ ਖੇਤਰਾਂ ਦੇ ਕੁਝ ਹਿੱਸਿਆਂ 'ਚ ਮੀਂਹ ਜਾਂ ਬਰਫਬਾਰੀ ਦੀ ਭਵਿੱਖਬਾਣੀ ਕੀਤੀ ਹੈ। ਇਸ ਤੋਂ ਇਲਾਵਾ ਸੂਬੇ 'ਚ 4 ਫਰਵਰੀ ਤੱਕ ਮੌਸਮ ਖੁਸ਼ਕ ਰਹਿਣ ਦੀ ਸੰਭਾਵਨਾ ਹੈ। ਸ਼ਿਮਲਾ ਅਤੇ ਕਿਨੌਰ ਦੇ ਸੇਬ ਉਤਪਾਦਕ ਬਰਫਬਾਰੀ ਤੋਂ ਖੁਸ਼ ਹਨ ਕਿਉਂਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਸ ਨਾਲ ਫ਼ਸਲ ਨੂੰ ਫਾਇਦਾ ਹੋਵੇਗਾ।