ਮੁੰਬਈ ਦੀ ਲੋਕਲ ਟ੍ਰੇਨ ਤੋਂ ਚੋਰੀ ਹੋਇਆ ₹40 ਲੱਖ ਦਾ ਸੋਨਾ ਬਰਾਮਦ, ਮਾਲਕ ਨੂੰ ਕੀਤਾ ਗਿਆ ਵਾਪਸ

ਮੁੰਬਈ (ਏਜੰਸੀ)- ਰੇਲਵੇ ਪੁਲਸ ਨੇ ਲਗਭਗ 3 ਸਾਲ ਪਹਿਲਾਂ ਮੁੰਬਈ ਦੀ ਇੱਕ ਲੋਕਲ ਟ੍ਰੇਨ ਤੋਂ ਚੋਰੀ ਹੋਇਆ ₹40 ਲੱਖ ਦਾ ਸੋਨਾ ਬਰਾਮਦ ਕਰਕੇ ਅਦਾਲਤ ਦੇ ਹੁਕਮਾਂ ਤੋਂ ਬਾਅਦ ਇਸਨੂੰ ਇਸਦੇ ਅਸਲ ਮਾਲਕ ਨੂੰ ਵਾਪਸ ਕਰ ਦਿੱਤਾ ਹੈ। ਇੱਕ ਅਧਿਕਾਰੀ ਨੇ ਸੋਮਵਾਰ ਨੂੰ ਦੱਸਿਆ ਕਿ ਇਹ ਚੋਰੀ ਨਵੰਬਰ 2023 ਵਿੱਚ ਹੋਈ ਸੀ। ਅਧਿਕਾਰੀ ਨੇ ਕਿਹਾ ਕਿ ਠਾਣੇ ਜ਼ਿਲ੍ਹੇ ਦੇ ਅੰਬਰਨਾਥ ਦਾ ਰਹਿਣ ਵਾਲਾ ਤਲਹਾ ਮੁਹੰਮਦ ਜ਼ਾਕਿਰ ਅੰਸਾਰੀ (33) ਗਹਿਣਿਆਂ ਨਾਲ ਭਰਿਆ ਬੈਗ ਲੈ ਕੇ ਦੱਖਣੀ ਮੁੰਬਈ ਦੇ ਛਤਰਪਤੀ ਸ਼ਿਵਾਜੀ ਮਹਾਰਾਜ ਟਰਮੀਨਸ (CSMT) ਲਈ ਲੋਕਲ ਟ੍ਰੇਨ ਰਾਹੀਂ ਯਾਤਰਾ ਕਰ ਰਿਹਾ ਸੀ। ਅੰਸਾਰੀ ਗਲਤੀ ਨਾਲ ਭਾਯਖਲਾ ਸਟੇਸ਼ਨ 'ਤੇ ਆਪਣਾ ਬੈਗ ਟ੍ਰੇਨ ਵਿੱਚ ਹੀ ਛੱਡ ਕੇ ਉਤਰ ਗਿਆ। ਫੁੱਟ ਓਵਰਬ੍ਰਿਜ ਪਾਰ ਕਰਨ ਤੋਂ ਬਾਅਦ, ਉਸਨੂੰ ਅਹਿਸਾਸ ਹੋਇਆ ਕਿ ਉਸਦਾ ਬੈਗ ਟ੍ਰੇਨ ਵਿੱਚ ਹੀ ਛੁੱਟ ਗਿਆ ਹੈ, ਜਿਸ ਤੋਂ ਬਾਅਦ ਉਹ ਤੁਰੰਤ CSMT ਜਾਣ ਵਾਲੀ ਇੱਕ ਹੋਰ ਟ੍ਰੇਨ ਵਿੱਚ ਚੜ੍ਹ ਗਿਆ ਅਤੇ ਬੈਗ ਦੀ ਭਾਲ ਕੀਤੀ, ਪਰ ਉਹ ਗਾਇਬ ਸੀ।

ਚੋਰੀ ਦਾ ਸ਼ੱਕ ਹੋਣ ਤੋਂ ਬਾਅਦ, ਅੰਸਾਰੀ ਨੇ CSMT ਰੇਲਵੇ ਪੁਲਸ ਸਟੇਸ਼ਨ ਵਿੱਚ ਸ਼ਿਕਾਇਤ ਦਰਜ ਕਰਵਾਈ, ਜਿਸ ਤੋਂ ਬਾਅਦ ਪੁਲਸ ਨੇ ਤੁਰੰਤ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਸ਼ੱਕੀ ਵਿਅਕਤੀ ਦੀ ਪਛਾਣ ਸੀਸੀਟੀਵੀ ਫੁਟੇਜ, ਤਕਨੀਕੀ ਨਿਗਰਾਨੀ ਅਤੇ ਗੁਪਤ ਜਾਣਕਾਰੀ ਦੀ ਸਮੀਖਿਆ ਦੇ ਆਧਾਰ 'ਤੇ ਕੀਤੀ ਗਈ ਹੈ। ਜਾਂਚ ਦੌਰਾਨ, ਪੁਲਸ ਨੇ ਅੰਬਰਨਾਥ ਦੇ ਨਿਵਾਸੀ ਅਖਤਰ ਹੁਸੈਨ ਮੁਸਤਫਾ ਹੁਸੈਨ ਸ਼ੇਖ (62) ਨੂੰ ਗ੍ਰਿਫਤਾਰ ਕੀਤਾ ਅਤੇ ਉਸ ਤੋਂ 272 ਗ੍ਰਾਮ ਚੋਰੀ ਕੀਤਾ ਸੋਨਾ ਬਰਾਮਦ ਕਰ ਲਿਆ। ਅਧਿਕਾਰੀ ਮੁਤਾਬਕ ਬਰਾਮਦ ਕੀਤਾ ਗਿਆ ਸੋਨਾ ਕਾਨੂੰਨੀ ਕਾਰਵਾਈ ਦੌਰਾਨ ਪੁਲਸ ਸਟੋਰਹਾਊਸ ਵਿੱਚ ਰੱਖਿਆ ਗਿਆ ਸੀ ਅਤੇ ਪਿਛਲੇ ਮਹੀਨੇ, ਅਦਾਲਤ ਨੇ ਸ਼ਿਕਾਇਤਕਰਤਾ ਨੂੰ ਬਰਾਮਦ ਕੀਤਾ ਸੋਨਾ ਵਾਪਸ ਕਰਨ ਦਾ ਆਦੇਸ਼ ਦਿੱਤਾ ਸੀ, ਜਿਸ ਤੋਂ ਬਾਅਦ ਸਾਰੀਆਂ ਜ਼ਰੂਰੀ ਕਾਨੂੰਨੀ ਰਸਮਾਂ ਪੂਰੀਆਂ ਕਰਨ ਤੋਂ ਬਾਅਦ, ਗਹਿਣੇ ਅੰਸਾਰੀ ਨੂੰ ਸੌਂਪ ਦਿੱਤੇ ਗਏ।