ਕੋਈ 50 ਕਰੋੜ ਦੇਵੇ ਤਾਂ ਮੋਦੀ ਨੂੰ ਮਾਰ ਦਿਆਂਗਾ, ਤੇਜ ਬਹਾਦਰ ਦਾ ਵੀਡੀਓ ਵਾਇਰਲ

ਨਵੀਂ ਦਿੱਲੀ— ਲੋਕ ਸਭਾ ਚੋਣ 2019 ਦੇ ਪੰਜਵੇਂ ਪੜਾਅ ਦੀ ਵੋਟਿੰਗ ਸੋਮਵਾਰ ਦੇਰ ਸ਼ਾਮ ਖਤਮ ਹੋ ਗਈ। ਇਸ ਦੌਰਾਨ ਸੋਸ਼ਲ ਮੀਡੀਆ 'ਤੇ ਬੀ.ਐੱਸ.ਐੱਫ. ਤੋਂ ਬਰਖਾਸਤ ਜਵਾਨ ਤੇਜ ਬਹਾਦਰ ਯਾਦਵ ਦਾ ਇਕ ਵੀਡੀਓ ਤੇਜੀ ਨਾਲ ਵਾਇਰਲ ਹੋ ਰਿਹਾ ਹੈ। ਦਰਅਸਲ ਇਸ ਵੀਡੀਓ 'ਚ ਵਾਰਾਣਸੀ ਤੋਂ ਸਮਾਜਵਾਦੀ ਪਾਰਟੀ ਦੇ ਸਾਬਕਾ ਉਮੀਦਵਾਰ ਤੇਜ ਬਹਾਦਰ ਯਾਦਵ ਕਹਿੰਦੇ ਹੋਏ ਨਜ਼ਰ ਆ ਰਹੇ ਹਨ ਕਿ ਜੇਕਰ ਮੈਨੂੰ ਕੋਈ 50 ਕਰੋੜ ਰੁਪਏ ਦੇਵੇ ਤਾਂ ਮੈਂ ਪੀ.ਐੱਮ. ਮੋਦੀ ਨੂੰ ਕਤਲ ਕਰ ਦਿਆਂਗਾ। ਦੱਸ ਦਈਏ ਕਿ ਹਾਲ ਹੀ 'ਚ ਤੇਜ ਬਹਾਦਰ ਯਾਦਵ ਦੀ ਨਾਮਜ਼ਦਗੀ ਰੱਦ ਹੋ ਗਈ ਸੀ। ਹਾਲਾਂਕਿ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੇ ਇਸ ਵੀਡੀਓ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਹੈ।

ਕੋਈ ਭਾਰਤੀ ਪੈਸੇ ਦੇਵੇ ਤਾਂ ਮਾਰ ਦਿਆਂਗਾ : ਤੇਜ ਬਹਾਦਰ
ਸੋਸ਼ਲ ਮੀਡੀਆ 'ਚ ਵਾਇਰਲ ਹੋ ਰਹੇ ਵੀਡੀਓ 'ਚ ਤੇਜ ਬਹਾਦਰ ਯਾਦਵ ਨਾਲ ਬੈਠਿਆ ਇਕ ਸ਼ਖਸ ਉਨ੍ਹਾਂ ਨੂੰ ਕਹਿੰਦਾ ਨਜ਼ਰ ਆ ਰਿਹਾ ਹੈ ਕਿ ਤੁਸੀਂ 24 ਘੰਟੇ 'ਚ ਮੋਦੀ ਨੂੰ ਮਾਰ ਦਿਓਗੇ। ਇਸ 'ਤੇ ਤੇਜ ਬਹਾਦਰ ਕਹਿੰਦੇ ਹਨ ਕਿ 50 ਕਰੋੜ ਦਿਵਾ ਦਿਓ ਤਾਂ ਮਾਰ ਦਿਆਂਗਾ। ਇਸ ਤੋਂ ਬਾਅਦ ਦੂਜੇ ਸ਼ਖਸ ਨੇ ਕਿਹਾ ਕਿ ਭਾਰਤ 'ਚ ਤਾਂ ਕੋਈ ਪੈਸੇ ਦੇਵੇਗਾ ਨਹੀਂ, ਪਾਕਿਸਤਾਨ ਤੋਂ ਹੀ ਮਿਲ ਸਕਦਾ ਹੈ। ਇਸ ਦੇ ਜਵਾਬ 'ਚ ਤੇਜ ਬਹਾਦਰ ਨੇ ਕਿਹਾ ਕਿ ਮੈਂ ਆਪਣੇ ਦੇਸ਼ ਲਈ ਵਫਾਦਾਰ ਹਾਂ। ਦੇਸ਼ ਨਾਲ ਗੱਦਾਰੀ ਨਹੀਂ ਕਰਾਂਗਾ। ਜੇਕਰ ਇਥੇ ਦਾ ਕੋਈ 50 ਕਰੋੜ ਦੇਵੇ ਤਾਂ ਅਕਾਊਂਟ 'ਚ ਪੈਸੇ ਆਉਣ ਦੇ 72 ਘੰਟੇ 'ਚ ਮੋਦੀ ਨੂੰ ਮਾਰ ਦਿਆਂਗਾ।