ਬਾਥਰੂਮ 'ਚ ਨਹਾ ਰਹੇ ਸਕੇ ਭਰਾਵਾਂ ਨਾਲ ਵਾਪਰੀ ਅਣਹੋਣੀ, ਮਾਸੂਮਾਂ ਨੇ ਤੜਫ਼-ਤੜਫ਼ ਕੇ ਤੋੜਿਆ ਦਮ

ਹਿਸਾਰ- ਹਰਿਆਣਾ ਦੇ ਹਿਸਾਰ ਜ਼ਿਲ੍ਹੇ 'ਚ ਇਕ ਦੁਖ਼ਦ ਹਾਦਸਾ ਵਾਪਰਿਆ, ਇੱਥੇ ਗੀਜ਼ਰ ਦੀ ਗੈਸ ਕਾਰਨ 2 ਸਕੇ ਭਰਾਵਾਂ ਦੀ ਮੌਤ ਹੋ ਗਈ। ਦੋਵੇਂ ਭਰਾ 13 ਸਾਲਾ ਸੋਹਮ ਅਤੇ 8 ਸਾਲ ਦਾ ਮਾਧਵ ਰਿਸ਼ਤੇਦਾਰ ਦੇ ਵਿਆਹ 'ਚ ਜਾਣ ਲਈ ਵਾਲ ਕਟਵਾ ਕੇ ਆਏ ਸਨ। ਜਲਦਬਾਜ਼ੀ ਦੇ ਚੱਕਰ 'ਚ ਦੋਵੇਂ ਇਕੱਠੇ ਹੀ ਬਾਥਰੂਮ 'ਚ ਨਹਾ ਰਹੇ ਸਨ। ਨਹਾਉਂਦੇ ਹੋਏ ਗੈਸ ਦੇ ਅਸਰ ਨਾਲ ਦੋਵੇਂ ਬੇਹੋਸ਼ ਹੋ ਗਏ। ਪਰਿਵਾਰ ਵਾਲੇ ਉਨ੍ਹਾਂ ਨੂੰ ਤੁਰੰਤ ਹਸਪਤਾਲ ਲੈ ਕੇ ਪਹੁੰਚੇ, ਜਿੱਥੇ ਡਾਕਟਰਾਂ ਨੇ ਬੱਚਿਆਂ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ। ਸ਼ਾਮ ਨੂੰ ਦੋਹਾਂ ਬੱਚਿਆਂ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ ਗਿਆ। 

ਮਿਲੀ ਜਾਣਕਾਰੀ ਅਨੁਸਾਰ ਤਿਲਕ ਸ਼ਾਮ ਵਾਲੀ ਗਲੀ 'ਚ ਰਹਿਣ ਵਾਲੇ ਫੋਟੋ ਸਟੂਡੀਓ ਮਾਲਿਕ ਸੌਰਭ ਦੇ ਮਾਮੇ ਦੇ ਮੁੰਡੇ ਦਾ ਵਿਆਹ ਗੁਰੂਗ੍ਰਾਮ 'ਚ ਸੀ। ਸੌਰਭ ਦੀ ਮਾਂ ਪਹਿਲਾਂ ਹੀ ਗੁਰੂਗ੍ਰਾਮ ਚਲੀ ਗਈ ਸੀ। ਐਤਵਾਰ ਨੂੰ ਸੌਰਭ ਨੂੰ ਆਪਣੇ ਪਰਿਵਾਰ ਨਾਲ ਉੱਥੇ ਜਾਣਾ ਸੀ। ਸੌਰਭ ਦੇ ਦੋਵੇਂ ਪੁੱਤ ਗੁਆਂਢ ਦੀ ਇਕ ਨਾਈ ਦੀ ਦੁਕਾਨ ਤੋਂ ਵਾਲ ਕਟਵਾਉਣ ਚਲੇ ਗਏ। ਵਾਲ ਕਟਵਾਉਣ ਦੇ ਬਾਅਦ ਉਹ ਘਰ ਪਰਤੇ ਅਤੇ ਦੋਵੇਂ ਇਕੱਠੇ ਹੀ ਨਹਾਉਣ ਲਈ ਬਾਥਰੂਮ 'ਚ ਚਲੇ ਗਏ। ਦੋਹਾਂ ਨੇ ਬਾਥਰੂਮ 'ਚ ਵੜਦੇ ਹੀ ਗੀਜ਼ਰ ਚਾਲੂ ਕਰ ਦਿੱਤਾ। ਇਸ ਦੌਰਾਨ ਬਾਥਰੂਮ ਦੀ ਖਿੜਕੀ ਵੀ ਬੰਦ ਸੀ। ਗੀਜ਼ਰ ਦੀ ਗੈਸ ਲੀਕ ਹੋਣ ਨਾਲ ਦੋਵੇਂ ਅੰਦਰ ਹੀ ਬੇਹੋਸ਼ ਹੋ ਗਏ। ਜਦੋਂ ਦੋਵੇਂ ਭਰਾ ਕਾਫ਼ੀ ਦੇਰ ਤੱਕ ਬਾਥਰੂਮ 'ਚੋਂ ਨਹੀਂ ਨਿਕਲੇ ਤਾਂ ਪਰਿਵਾਰ ਵਾਲਿਆਂ ਨੇ ਦੋਹਾਂ ਨੂੰ ਆਵਾਜ਼ ਲਗਾਈ ਪਰ ਬੱਚਿਆਂ ਨੇ ਕੋਈ ਜਵਾਬ ਨਹੀਂ ਦਿੱਤਾ। ਬੱਚਿਆਂ ਵਲੋਂ ਕੋਈ ਜਵਾਬ ਨਾ ਮਿਲਣ 'ਤੇ ਉਨ੍ਹਾਂ ਦੀ ਮਾਂ ਬਾਥਰੂਮ 'ਚ ਪਹੁੰਚੀ ਅਤੇ ਦੇਖਿਆ ਕਿ ਦੋਵੇਂ ਬੱਚੇ ਬਾਥਰੂਮ ਦੇ ਫਰਸ਼ 'ਤੇ ਬੇਹੋਸ਼ੀ ਦੀ ਹਾਲਤ 'ਚ ਪਏ ਹੋਏ ਸਨ। ਇਸ ਦੌਰਾਨ ਬੱਚਿਆਂ ਦੀ ਮਾਂ ਨੇ ਪਤੀ ਸੌਰਭ ਨੂੰ ਫੋਨ ਕਰ ਕੇ ਸੂਚਨਾ ਦਿੱਤੀ। ਇਸ ਤੋਂ ਬਾਅਦ ਦੋਹਾਂ ਬੱਚਿਆਂ ਨੂੰ ਸ਼ਹਿਰ ਦੇ ਇਕ ਨਿੱਜੀ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ। ਬੱਚਿਆਂ ਦੀ ਮੌਤ ਤੋਂ ਬਾਅਦ ਪਰਿਵਾਰ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ।

ਨੋਟ : ਇਸ ਖ਼ਬਰ ਸੰਬੰਧੀ ਕੀ ਹੈ ਤੁਹਾਡੀ ਰਾਏ, ਕੁਮੈਂਟ ਬਾਕਸ 'ਚ ਦਿਓ ਜਵਾਬ