ਕਾਲਜ ਦੇ ਹੋਸਟਲ ਨੇੜੇ ਖੋਪੜੀ ਨਾਲ ਖੇਡਦੇ ਦਿਖੇ ਕੁੱਤੇ, ਪੁਲਸ ਨੇ ਸ਼ੁਰੂ ਕੀਤੀ ਜਾਂਚ

ਨੈਸ਼ਨਲ ਡੈਸਕ - ਮੱਧ ਪ੍ਰਦੇਸ਼ ਦੇ ਜਬਲਪੁਰ ਸ਼ਹਿਰ 'ਚ ਉਸ ਸਮੇਂ ਹਲਚਲ ਮਚ ਗਈ ਜਦੋਂ ਸਰਕਾਰੀ ਮੈਡੀਕਲ ਕਾਲਜ ਦੇ ਹੋਸਟਲ ਨੇੜੇ ਦੋ ਕੁੱਤਿਆਂ ਨੂੰ ਖੋਪੜੀ ਨਾਲ ਖੇਡਦੇ ਦੇਖਿਆ ਗਿਆ। ਇਸ ਸੀਨ ਦਾ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਗਿਆ। ਹੁਣ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਜਬਲਪੁਰ ਪੁਲਸ ਨੇ ਵੀਰਵਾਰ ਨੂੰ ਇਹ ਜਾਣਕਾਰੀ ਦਿੱਤੀ।

ਹੁਣ ਮੈਡੀਕਲ ਕਾਲਜ ਦੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਅਜੇ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਇਹ ਖੋਪੜੀ ਕਿਸੇ ਮਨੁੱਖ ਦੀ ਹੈ ਜਾਂ ਨਹੀਂ। ਨੇਤਾਜੀ ਸੁਭਾਸ਼ ਚੰਦਰ ਬੋਸ ਮੈਡੀਕਲ ਕਾਲਜ ਅਤੇ ਹਸਪਤਾਲ ਦੇ ਡੀਨ ਡਾਕਟਰ ਨਵਨੀਤ ਸਕਸੈਨਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਬੁੱਧਵਾਰ ਨੂੰ ਹੋਸਟਲ ਦੀ ਇਮਾਰਤ ਦੇ ਪਿੱਛੇ ਕੁੱਤਿਆਂ ਦੇ ਖੋਪੜੀਆਂ ਨਾਲ ਖੇਡਣ ਬਾਰੇ ਪਤਾ ਲੱਗਾ।

ਡੀਨ ਡਾਕਟਰ ਨਵਨੀਤ ਸਕਸੈਨਾ ਨੇ ਪੀਟੀਆਈ ਨੂੰ ਦੱਸਿਆ, 'ਅਸੀਂ ਇਸ ਸਮੇਂ ਖੋਪੜੀ ਬਾਰੇ ਨਿਸ਼ਚਿਤ ਕੁਝ ਨਹੀਂ ਕਹਿ ਸਕਦੇ। ਇਹ ਮਨੁੱਖੀ ਖੋਪੜੀ ਹੋ ਸਕਦੀ ਹੈ ਜਾਂ ਨਹੀਂ, ਇਹ ਕਿਸੇ ਨੇੜਲੀ ਝੀਲ ਤੋਂ ਚੁੱਕੀ ਹੋਈ ਚੀਜ਼ ਹੋ ਸਕਦੀ ਹੈ। ਜਾਂ ਇਹ ਉਹਨਾਂ ਖੋਪੜੀਆਂ ਵਿੱਚੋਂ ਇੱਕ ਹੋ ਸਕਦੀ ਹੈ ਜੋ ਸਰੀਰ ਵਿਗਿਆਨ ਦੇ ਵਿਦਿਆਰਥੀ ਪੜ੍ਹਾਈ ਲਈ ਘਰ ਲੈ ਜਾਂਦੇ ਹਨ।'

ਡਾਕਟਰ ਨਵਨੀਤ ਸਕਸੈਨਾ ਨੇ ਕਿਹਾ ਕਿ ਖੋਪੜੀ ਦੇ ਸਰੋਤ ਦਾ ਪਤਾ ਜਾਂਚ ਤੋਂ ਬਾਅਦ ਹੀ ਲੱਗੇਗਾ। ਉਨ੍ਹਾਂ ਕਿਹਾ ਕਿ ਇਸ ਸਬੰਧੀ ਤੁਰੰਤ ਪੁਲਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ। ਪੁਲਸ ਆਪਣੇ ਪੱਧਰ 'ਤੇ ਮਾਮਲੇ ਦੀ ਜਾਂਚ ਕਰ ਰਹੀ ਹੈ। ਗੜ੍ਹਾ ਥਾਣੇ ਦੇ ਇੰਸਪੈਕਟਰ ਪੀਕੇ ਸ਼ਰਮਾ ਨੇ ਪੀਟੀਆਈ ਨੂੰ ਦੱਸਿਆ ਕਿ ਇੱਕ ਪੁਲਸ ਮੁਲਾਜ਼ਮ ਬੁੱਧਵਾਰ ਨੂੰ ਹਸਪਤਾਲ ਗਿਆ ਸੀ, ਪਰ ਵੀਡੀਓ ਵਿੱਚ ਦਿਖਾਈ ਗਈ ਖੋਪੜੀ ਨਹੀਂ ਮਿਲੀ। ਉਨ੍ਹਾਂ ਕਿਹਾ ਕਿ ਮਾਮਲੇ ਦੀ ਜਾਂਚ ਜਾਰੀ ਹੈ।