ਕੇਂਦਰ ਸਰਕਾਰ ਦਾ ਦਾਅਵਾ : ਗੰਗਾ ਦਾ ਪਾਣੀ ਇਸ਼ਨਾਨ ਕਰਨ ਯੋਗ, ਘੱਟ ਰਿਹਾ ਹੈ ਪ੍ਰਦੂਸ਼ਣ ਦਾ ਪੱਧਰ

ਨਵੀਂ ਦਿੱਲੀ- ਕੇਂਦਰ ਸਰਕਾਰ ਨੇ ਦਾਅਵਾ ਕੀਤਾ ਹੈ ਕਿ ਗੰਗਾ ਦਾ ਪਾਣੀ ਸਾਰੀਆਂ ਨਿਗਰਾਨੀ ਵਾਲੀਆਂ ਥਾਵਾਂ 'ਤੇ ਇਸ਼ਨਾਨ ਕਰਨ ਦੇ ਪੈਮਾਨਿਆਂ ਨੂੰ ਖਰਾ ਉਤਰਿਆ ਹੈ ਤੇ ਉਸ ਦਾ ਪ੍ਰਦੂਸ਼ਣ ਦਾ ਪੱਧਰ ਘੱਟ ਰਿਹਾ ਹੈ। ਜਲ ਸ਼ਕਤੀ ਰਾਜ ਮੰਤਰੀ ਰਾਜ ਭੂਸ਼ਣ ਚੌਧਰੀ ਨੇ ਲੋਕ ਸਭਾ ’ਚ ਇਕ ਸਵਾਲ ਦੇ ਲਿਖਤੀ ਜਵਾਬ ’ਚ ਕਿਹਾ ਕਿ ਜਨਵਰੀ ਤੋਂ ਅਗਸਤ 2025 ਤੱਕ ਦੇ ਔਸਤ ਪਾਣੀ ਦੀ ਗੁਣਵੱਤਾ ਦੇ ਅੰਕੜਿਆਂ ਦੇ ਆਧਾਰ 'ਤੇ ਗੰਗਾ ਦਾ ਪੀ.ਐੱਚ (ਪੋਟੇਂਸ਼ੀਅਲ ਆਫ਼ ਹਾਈਡ੍ਰੋਜਨ) ਅਤੇ ਆਕਸੀਜਨ ਦਾ ਘੁਲਿਆ ਹੋਇਆ ਪੱਧਰ ਸਾਰੀਆਂ ਥਾਵਾਂ 'ਤੇ ਇਸ਼ਨਾਨ ਕਰਨ ਦੇ ਪੈਮਾਨਿਆਂ ਨੂੰ ਪੂਰਾ ਕਰਦਾ ਹੈ।

ਪੀ.ਐੱਚ. ਦਾ ਭਾਵ ਹਾਈਡ੍ਰੋਜਨ ਦੀ ਸੰਭਾਵਨਾ ਵਾਲੇ ਕਿਸੇ ਤਰਲ ਜਾਂ ਘੋਲ ’ਚ ਐਸਿਡਿਟੀ ਜਾਂ ਖਾਰੇਪਣ ਦਾ ਮਾਪ ਹੈ ਜਿਸ ’ਚ ਹਾਈਡ੍ਰੋਜਨ ਆਇਨਾਂ ਦੇ ਗਾੜ੍ਹੇਪਣ ਨੂੰ ਮਾਪਿਆ ਜਾਂਦਾ ਹੈ। ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ 5 ਸੂਬਿਆਂ ’ਚ ਕੁੱਲ 112 ਥਾਵਾਂ 'ਤੇ ਗੰਗਾ ਦੇ ਪਾਣੀ ਦੀ ਗੁਣਵੱਤਾ ਦੀ ਨਿਗਰਾਨੀ ਕਰਦਾ ਹੈ। ਇਨ੍ਹਾਂ ’ਚ ਉੱਤਰਾਖੰਡ ’ਚ 19, ਉੱਤਰ ਪ੍ਰਦੇਸ਼ ’ਚ 41, ਬਿਹਾਰ ’ਚ 33, ਝਾਰਖੰਡ ’ਚ 4 ਤੇ ਪੱਛਮੀ ਬੰਗਾਲ ’ਚ 15 ਹਨ। ਚੌਧਰੀ ਨੇ ਕਿਹਾ ਕਿ ਬਾਇਓਕੈਮੀਕਲ ਆਕਸੀਜਨ ਦੀ ਮੰਗ ਦੇ ਮਾਮਲੇ ’ਚ ਪਾਣੀ ਦੀ ਗੁਣਵੱਤਾ ਉੱਤਰਾਖੰਡ, ਝਾਰਖੰਡ, ਬਿਹਾਰ ਤੇ ਪੱਛਮੀ ਬੰਗਾਲ ’ਚ ਇਸ ਦੇ ਰਾਹ ’ਚ ਇਸ਼ਨਾਨ ਕਰਨ ਦੇ ਮਿਆਰਾਂ ਨੂੰ ਪੂਰਾ ਕਰਦੀ ਹੈ। ਹਾਲਾਂਕਿ, ਉੱਤਰ ਪ੍ਰਦੇਸ਼ ਦੇ ਕੁਝ ਹਿੱਸਿਆਂ ਜਿਵੇਂ ਕਿ ਫਾਰੂਖਾਬਾਦ ਤੋਂ ਕਾਨਪੁਰ ਵਿੱਚ ਪੁਰਾਣਾ ਰਾਜਾਪੁਰ, ਰਾਏਬਰੇਲੀ ’ਚ ਡਾਲਮੌ ਤੇ ਮਿਰਜ਼ਾਪੁਰ ਤੋਂ ਗਾਜ਼ੀਪੁਰ ’ਚ ਤਾਰੀਘਾਟ ਤੱਕ ਇਹ ਮਿਆਰਾਂ ਨੂੰ ਪੂਰਾ ਨਹੀਂ ਕਰਦਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e