ਉੱਤਰਾਖੰਡ: ਮਦਮਹੇਸ਼ਵਰ ''ਤੇ ਪੁਲ ਰੁੜ੍ਹਿਆ, 106 ਲੋਕਾਂ ਨੂੰ ਬਚਾਇਆ

ਦੇਹਰਾਦੂਨ : ਉਤਰਾਖੰਡ ਦੇ ਰੁਦਪ੍ਰਯਾਗ ਜ਼ਿਲ੍ਹੇ ਵਿਚ ਭਾਰੀ ਮੀਂਹ ਕਾਰਨ ਮਦਮਹੇਸ਼ਵਰ ਫੁੱਟਪਾਥ 'ਤੇ ਗੋਂਡਰ ਵਿਖੇ ਸਥਿਤ ਇਕ ਪੁਲ ਰੁੜ੍ਹ ਗਿਆ, ਜਿਸ ਨਾਲ ਉਥੇ 106 ਸੈਲਾਨੀ ਫਸ ਗਏ। ਸਟੇਟ ਡਿਜ਼ਾਸਟਰ ਰਿਸਪਾਂਸ ਫੋਰਸ (ਐੱਸ.ਡੀ.ਆਰ.ਐੱਫ.) ਦੇ ਅਧਿਕਾਰੀਆਂ ਨੇ ਇੱਥੇ ਦੱਸਿਆ ਕਿ ਸ਼ੁੱਕਰਵਾਰ ਸਵੇਰੇ ਮਾਰਕੰਡੇਆ ਨਦੀ 'ਤੇ ਫੁੱਟਬ੍ਰਿਜ ਦੇ ਵਹਿ ਜਾਣ ਦੀ ਸੂਚਨਾ ਦਿੱਤੀ ਸੀ, ਜਿਸ ਤੋਂ ਬਾਅਦ ਗੌਂਡਰ ਨੇੜੇ ਫਸੇ ਲੋਕਾਂ ਨੂੰ ਬਚਾਉਣ ਲਈ ਹੈਲੀਕਾਪਟਰ ਦੀ ਮਦਦ ਵੀ ਲਈ ਗਈ ਸੀ। 

ਉਨ੍ਹਾਂ ਦੱਸਿਆ ਕਿ ਇੰਸਪੈਕਟਰ ਅਨਿਰੁਧ ਭੰਡਾਰੀ ਦੀ ਅਗਵਾਈ ਹੇਠ ਐੱਸਡੀਆਰਐੱਫ ਦੀ ਟੀਮ ਹੈਲੀਕਾਪਟਰ ਰਾਹੀਂ ਮਦਮਹੇਸ਼ਵਰ ਤੋਂ ਪੰਜ ਕਿਲੋਮੀਟਰ ਹੇਠਾਂ ਨਾਨੂ ਨਾਮਕ ਸਥਾਨ ’ਤੇ ਪਹੁੰਚੀ ਅਤੇ ਉਥੋਂ ਕੁੱਲ 106 ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ’ਤੇ ਪਹੁੰਚਾਇਆ। ਇਨ੍ਹਾਂ ਲੋਕਾਂ ਵਿੱਚ ਪੰਜ ਔਰਤਾਂ ਸ਼ਾਮਲ ਹਨ। ਇਸ ਦੌਰਾਨ ਐੱਸਡੀਆਰਐੱਫ ਦੀ ਇੱਕ ਹੋਰ ਟੀਮ ਵੀ ਵਿਕਲਪਕ ਸਹਾਇਤਾ ਲਈ ਅਗਸਤਿਆਮੁਨੀ ਪੈਦਲ ਰਸਤੇ ਰਾਹੀਂ ਮੌਕੇ ’ਤੇ ਪਹੁੰਚੀ। ਪੰਚਕੇਦਾਰ ਲੜੀ ਵਿੱਚੋਂ ਇੱਕ ਮਦਮਹੇਸ਼ਵਰ ਮੰਦਰ ਉੱਚ ਗੜ੍ਹਵਾਲ ਹਿਮਾਲਿਆ ਖੇਤਰ ਵਿੱਚ ਲਗਭਗ 11 ਹਜ਼ਾਰ ਫੁੱਟ ਦੀ ਉਚਾਈ 'ਤੇ ਸਥਿਤ ਹੈ।