ਭਾਜਪਾ ਦੇ ਮੁੱਖ ਮੰਤਰੀਆਂ ’ਚ ਵੀ ਹੋ ਸਕਦਾ ਹੈ ਬਦਲਾਅ

ਜਦੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਆਪਣੇ ਹੋਣ ਵਾਲੇ ਕੈਬਨਿਟ ਫੇਰਬਦਲ ਦੀ ਰੂਪ-ਰੇਖਾ ਨੂੰ ਅੰਤਿਮ ਰੂਪ ਦੇ ਰਹੇ ਹਨ, ਉਦੋਂ ਸੱਤਾ ਦੇ ਗਲਿਆਰਿਆਂ ’ਚ ਅਜਿਹੀ ਵੀ ਚਰਚਾ ਹੈ ਕਿ ਬਦਲਾਅ ਸਿਰਫ਼ ਦਿੱਲੀ ਤੱਕ ਹੀ ਸੀਮਤ ਨਹੀਂ ਹੋਣਗੇ। ਕੁਝ ਭਾਜਪਾ ਸ਼ਾਸਿਤ ਸੂਬਿਆਂ ’ਚ ਲੀਡਰਸ਼ਿਪ ’ਚ ਬਦਲਾਅ ’ਤੇ ਵੀ ਜ਼ੋਰ-ਸ਼ੋਰ ਨਾਲ ਚਰਚਾ ਹੋ ਰਹੀ ਹੈ।

ਕੁਝ ਮੁੱਖ ਮੰਤਰੀਆਂ ’ਤੇ ਭ੍ਰਿਸ਼ਟਾਚਾਰ ਤੋਂ ਲੈ ਕੇ ਪ੍ਰਸ਼ਾਸਨਿਕ ਨਾਕਾਮੀ ਤੱਕ ਦੇ ਦੋਸ਼ ਹਨ। ਉੱਤਰਾਖੰਡ ’ਚ, ਅੰਕਿਤਾ ਭੰਡਾਰੀ ਮਰਡਰ ਕੇਸ ਸਰਕਾਰ ਨੂੰ ਲੰਬੇ ਸਮੇਂ ਤੋਂ ਤੰਗ ਕਰ ਰਿਹਾ ਹੈ। ਅਰੁਣਾਚਲ ਪ੍ਰਦੇਸ਼ ’ਚ, ਮੁੱਖ ਮੰਤਰੀ ਪੇਮਾ ਖਾਂਡੂ ਜਾਂਚ ਦੇ ਘੇਰੇ ’ਚ ਆ ਗਏ ਹਨ, ਜਦੋਂ ਸੁਪਰੀਮ ਕੋਰਟ ਨੇ ਉਨ੍ਹਾਂ ਨਾਲ ਜੁੜੇ ਇਕ ਮਾਮਲੇ ’ਚ ਸੀ. ਬੀ. ਆਈ. ਜਾਂਚ ਦਾ ਹੁਕਮ ਦਿੱਤਾ। ਇਕ ਹੋਰ ਭਾਜਪਾ ਮੁੱਖ ਮੰਤਰੀ, ਜੋ ਇਕ ਅਹਿਮ ਉੱਤਰੀ ਸੂਬੇ ਤੋਂ ਹਨ ਅਤੇ ਜਿਨ੍ਹਾਂ ਨੂੰ ਅਚਾਨਕ ਪ੍ਰਮੋਸ਼ਨ ਮਿਲੀ ਹੈ, ਉਨ੍ਹਾਂ ਦੀ ਵੀ ਪੱਖਪਾਤ ਅਤੇ ਖ਼ਰਾਬ ਗਵਰਨੈਂਸ ਦੇ ਦੋਸ਼ਾਂ ਨੂੰ ਲੈ ਕੇ ਆਲੋਚਨਾ ਹੋ ਰਹੀ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਆਸਾਮ ਦੇ ਮੁੱਖ ਮੰਤਰੀ ਹੇਮੰਤ ਬਿਸਵਾ ਸਰਮਾ ਨੇ ਖ਼ੁਦ ਰਾਸ਼ਟਰੀ ਰਾਜਨੀਤੀ ’ਚ ਭੂਮਿਕਾ ਨਿਭਾਉਣ ਦੀ ਇੱਛਾ ਪ੍ਰਗਟਾਈ ਹੈ। ਭਾਜਪਾ ਦੇ ਇਕ ਹੋਰ ਸੀਨੀਅਰ ਮੁੱਖ ਮੰਤਰੀ ਨੇ ਕਿਹਾ ਹੈ ਕਿ ਪਾਰਟੀ ਵੱਲੋਂ ਉਨ੍ਹਾਂ ਨੂੰ ਦਿੱਤਾ ਗਿਆ ਕੋਈ ਵੀ ਕੰਮ ਸਵੀਕਾਰ ਕਰਨ ਤੋਂ ਪਹਿਲਾਂ ਉਹ ਇਕ ਆਖ਼ਰੀ ਟਰਮ ਪੂਰਾ ਕਰਨਾ ਚਾਹੁੰਦੇ ਹਨ।

ਮੋਦੀ ਦੇ ਅੰਡਰ ਭਾਜਪਾ ਦਾ ਰਿਕਾਰਡ ਵਿਖਾਉਂਦਾ ਹੈ ਕਿ ਕੋਈ ਵੀ ਮੁੱਖ ਮੰਤਰੀ ਅਤਿ-ਲੋੜੀਂਦਾ ਨਹੀਂ ਹੈ। 2014 ਤੋਂ, ਪਾਰਟੀ ਦੀ ਕੇਂਦਰੀ ਲੀਡਰਸ਼ਿਪ ਨੇ ਘੱਟੋ-ਘੱਟ 11 ਭਾਜਪਾ ਮੁੱਖ ਮੰਤਰੀਆਂ ਨੂੰ ਬਦਲਿਆ ਹੈ। ਕਰਨਾਟਕ ’ਚ ਬੀ. ਐੱਸ. ਯੇਦੀਯੁਰੱਪਾ, ਗੁਜਰਾਤ ’ਚ ਵਿਜੇ ਰੂਪਾਣੀ ਅਤੇ ਤ੍ਰਿਪੁਰਾ ’ਚ ਬਿਪਲਬ ਕੁਮਾਰ ਦੇਬ, ਸਾਰਿਆਂ ਨੇ ਆਪਣੀ ਟਰਮ ਪੂਰੀ ਹੋਣ ਤੋਂ ਪਹਿਲਾਂ ਹੀ ਅਹੁਦਾ ਛੱਡ ਦਿੱਤਾ। ਉੱਤਰਾਖੰਡ ’ਚ ਸ਼ਾਇਦ ਸਭ ਤੋਂ ਵੱਡਾ ਬਦਲਾਅ ਵੇਖਣ ਨੂੰ ਮਿਲਿਆ। ਮਾਰਚ 2021 ’ਚ ਤ੍ਰਿਵੇਂਦਰ ਸਿੰਘ ਰਾਵਤ ਦੀ ਥਾਂ ਤੀਰਥ ਸਿੰਘ ਰਾਵਤ ਨੇ ਲੈ ਲਈ, ਜਿਨ੍ਹਾਂ ਨੇ ਖ਼ੁਦ 4 ਮਹੀਨਿਆਂ ਦੇ ਅੰਦਰ ਅਸਤੀਫ਼ਾ ਦੇ ਦਿੱਤਾ, ਜਿਸ ਨਾਲ ਪੁਸ਼ਕਰ ਸਿੰਘ ਧਾਮੀ ਲਈ ਰਸਤਾ ਬਣਿਆ। ਧਾਮੀ ਵੀ ਹੁਣ ਪਾਲੀਟੀਕਲ ਜਾਂਚ ਦੇ ਘੇਰੇ ’ਚ ਹਨ।

2023 ਦੀਆਂ ਮੱਧ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ’ਚ ਭਾਜਪਾ ਦੀ ਜ਼ਬਰਦਸਤ ਜਿੱਤ ਤੋਂ ਬਾਅਦ, ਸ਼ਿਵਰਾਜ ਸਿੰਘ ਚੌਹਾਨ ਦੀ ਥਾਂ ਮੋਹਨ ਯਾਦਵ ਨੇ ਲੈ ਲਈ, ਜੋ ਹੁਣ ਆਪਣੇ ਹੀ ਵਿਵਾਦਾਂ ਨਾਲ ਜੂਝ ਰਹੇ ਹਨ। ਮਨੋਹਰ ਲਾਲ ਖੱਟੜ ਨੇ ਮਾਰਚ 2024 ’ਚ ਹਰਿਆਣਾ ਦੇ ਮੁੱਖ ਮੰਤਰੀ ਅਹੁਦੇ ਤੋਂ ਅਸਤੀਫ਼ਾ ਦੇ ਕੇ ਨਾਇਬ ਸਿੰਘ ਸੈਣੀ ਲਈ ਜਗ੍ਹਾ ਬਣਾਈ ਅਤੇ ਫਿਰ ਯੂਨੀਅਨ ਕੈਬਨਿਟ ’ਚ ਚਲੇ ਗਏ। ਇਸ ਤੋਂ ਪਹਿਲਾਂ, ਸਰਬਾਨੰਦ ਸੋਨੋਵਾਲ ਨੇ ਆਸਾਮ ਤੋਂ ਕੇਂਦਰ ’ਚ ਜਾਣ ਲਈ ਇਸੇ ਤਰ੍ਹਾਂ ਦਾ ਬਦਲਾਅ ਕੀਤਾ ਸੀ, ਜਦੋਂ ਕਿ ਆਨੰਦੀਬੇਨ ਪਟੇਲ ਅਤੇ ਰਘੂਬਰ ਦਾਸ ਨੂੰ ਗਵਰਨਰ ਬਣਾਇਆ ਗਿਆ ਸੀ। ਜਿਵੇਂ-ਜਿਵੇਂ ਮੋਦੀ 3.0 ਸੱਤਾ ’ਚ ਸਥਾਪਤ ਹੋ ਰਹੀ ਹੈ, ਭਾਜਪਾ ਦਾ ਸੰਦੇਸ਼ ਉਹੀ ਹੈ : ਕੰਮ, ਸੋਚ ਅਤੇ ਰਾਜਨੀਤਕ ਉਪਯੋਗਤਾ—ਕਾਰਜਕਾਲ ਨਹੀਂ—ਅਹੁਦੇ ’ਤੇ ਲੰਬੇ ਸਮੇਂ ਤੱਕ ਬਣੇ ਰਹਿਣ ਦਾ ਫੈਸਲਾ ਕਰਦੇ ਹਨ।