ਬਦਰੀਨਾਥ ਧਾਮ ਦੇ ਕਿਵਾੜ ਬੰਦ ਹੋਣ ਦੀ ਤਰੀਕ ਤੈਅ, ਇਸ ਦਿਨ ਤੱਕ ਕਰ ਸਕੋਗੇ ਦਰਸ਼ਨ

ਗੋਪੇਸ਼ਵਰ (ਏਜੰਸੀ)- ਉੱਤਰਾਖੰਡ ਦੇ ਚਮੋਲੀ ਜ਼ਿਲ੍ਹੇ 'ਚ ਸਥਿਤ ਵਿਸ਼ਵ ਪ੍ਰਸਿੱਧ ਬਦਰੀਨਾਥ ਧਾਮ ਦੇ ਕਿਵਾੜ ਇਸ ਸਾਲ ਸਰਦੀਆਂ 'ਚ 16 ਨਵੰਬਰ ਨੂੰ ਸ਼ਰਧਾਲੂਆਂ ਦੇ ਦਰਸ਼ਨਾਂ ਲਈ ਬੰਦ ਕਰ ਦਿੱਤੇ ਜਾਣਗੇ। ਅਧਿਕਾਰੀਆਂ ਨੇ ਦੱਸਿਆ ਕਿ ਬਦਰੀਨਾਥ ਧਾਮ ਦੇ ਕਿਵਾੜ ਬੰਦ ਹੋਣ ਦਾ ਮਹੂਰਤ ਦੁਸਹਿਰੇ ਮੌਕੇ ਮੰਗਲਵਾਰ ਨੂੰ ਮੰਦਰ 'ਚ ਮੁੱਖ ਪੁਜਾਰੀ ਰਾਵਲ ਅਮਰਨਾਥ ਨੰਬੂਰੀ, ਧਰਮਾਧਿਕਾਰੀ ਅਤੇ ਵੇਦਪਾਠੀਆਂ ਦੀ ਮੌਜੂਦਗੀ 'ਚ ਪੰਚਾਂਗ ਦੀ ਗਣਨਾ ਕਰ ਕੇ ਕੱਢਿਆ ਗਿਆ।

ਸ਼੍ਰੀ ਬਦਰੀਨਾਥ ਕੇਦਾਰਨਾਥ ਮੰਦਰ ਕਮੇਟੀ (ਬੀਕੇਟੀਸੀ) ਦੇ ਉਪ ਪ੍ਰਧਾਨ ਰਿਸ਼ੀ ਪ੍ਰਸਾਦ ਸਤੀ ਨੇ ਦੱਸਿਆ ਕਿ ਦੁਸਹਿਰ ਮੌਕੇ ਰਵਾਇਤੀ ਪੂਜਾ ਤੋਂ ਬਾਅਦ ਸਰਦੀਆਂ ਲਈ ਕਿਵਾੜ ਬੰਦ ਕਰਨ ਦੇ ਕੱਢੇ ਗਏ ਮਹੂਰਤ ਅਨੁਸਾਰ, ਮੰਦਰ ਦੇ ਕਿਵਾੜ 16 ਨਵੰਬਰ ਨੂੰ ਰਾਤ 9:37 ਵਜੇ ਬੰਦ ਕਰ ਦਿੱਤੇ ਜਾਣਗੇ। ਉਨ੍ਹਾਂ ਕਿਹਾ ਕਿ ਭਗਵਾਨ ਬਦਰੀਨਾਥ ਦੀ ਉਤਸਵ ਪਾਲਕੀ 17 ਨਵੰਬਰ ਨੂੰ ਆਪਣੇ ਸਰਦੀਆਂ ਦੇ ਨਿਵਾਸ ਲਈ ਰਵਾਨਾ ਹੋਵੇਗੀ। ਗੜ੍ਹਵਾਲ ਹਿਮਾਲਿਆ ਦੇ ਚਾਰਧਾਮ 'ਚ ਸ਼ਾਮਲ ਤਿੰਨ ਹੋਰ ਚਾਰ ਧਾਮ- ਗੰਗੋਤਰੀ, ਯਮੁਨੋਤਰੀ ਅਤੇ ਕੇਦਾਰਨਾਥ ਦੇ ਸਰਦੀਆਂ ਲਈ ਕਿਵਾੜ ਬੰਦ ਹੋਣ ਦੀ ਤਰੀਕ ਦੀਵਾਲੀ ਤੋਂ ਤੈਅ ਹੁੰਦੀ ਹੈ। 

ਗੰਗੋਤਰੀ ਦੇ ਕਿਵਾੜ 10 ਨਵੰਬਰ ਨੂੰ ਦੀਵਾਲੀ ਤੋਂ ਅਗਲੇ ਦਿਨ ਯਾਨੀ ਅੰਨਕੂਟ ਦੇ ਮੌਕੇ 'ਤੇ ਬੰਦ ਹੋਣਗੇ, ਉੱਥੇ ਹੀ ਯਮੁਨੋਤਰੀ ਅਤੇ ਕੇਦਾਰਨਾਥ ਦੇ ਕਿਵਾੜ 11 ਨਵੰਬਰ ਨੂੰ ਭਈਆ ਦੂਜ ਦੇ ਮੌਕੇ 'ਤੇ ਬੰਦ ਹੋਣਗੇ। ਇਸ ਦੌਰਾਨ, ਯਮੁਨੋਤਰੀ ਮੰਦਰ ਦੇ ਬੰਦ ਹੋਣ ਦਾ ਸ਼ੁਭ ਸਮਾਂ ਮੰਗਲਵਾਰ ਨੂੰ ਵੀ ਨਿਰਧਾਰਤ ਕੀਤਾ ਗਿਆ ਸੀ। ਯਮੁਨੋਤਰੀ ਮੰਦਰ ਕਮੇਟੀ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਪੰਚਾਂਗ ਗਣਨਾਵਾਂ ਤੋਂ ਬਾਅਦ, ਯਮੁਨੋਤਰੀ ਮੰਦਰ ਦੇ ਦਰਵਾਜ਼ੇ ਬੰਦ ਹੋਣ ਦਾ ਸਮਾਂ 11 ਨਵੰਬਰ ਨੂੰ ਸਵੇਰੇ 10:28 ਵਜੇ, ਅਨੁਰਾਧਾ ਨਕਸ਼ਤਰ ਅਤੇ ਹਲਕੇ ਧਨੁ ਲਗਨ 'ਚ ਨਿਰਧਾਰਤ ਕੀਤਾ ਗਿਆ ਸੀ। ਇਸ ਸਾਲ ਚਾਰ ਧਾਮ ਯਾਤਰਾ 19 ਅਪ੍ਰੈਲ ਨੂੰ ਸ਼ੁਰੂ ਹੋਈ ਸੀ ਅਤੇ ਸੋਮਵਾਰ ਸ਼ਾਮ ਤੱਕ, 56.19 ਲੱਖ ਤੋਂ ਵੱਧ ਸ਼ਰਧਾਲੂ ਭਗਵਾਨ ਦੇ ਦਰਸ਼ਨ ਕਰ ਚੁੱਕੇ ਹਨ। ਬਦਰੀਨਾਥ 'ਚ ਸਭ ਤੋਂ ਵੱਧ 20.69 ਲੱਖ, ਕੇਦਾਰਨਾਥ 'ਚ 17.65 ਲੱਖ, ਗੰਗੋਤਰੀ 'ਚ 9.45 ਲੱਖ ਅਤੇ ਯਮੁਨੋਤਰੀ 'ਚ 8.38 ਲੱਖ ਸ਼ਰਧਾਲੂਆਂ ਦੀ ਆਮਦ ਦਰਜ ਕੀਤੀ ਗਈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e