ਖਰਾਬ ਮੌਸਮ ਅਤੇ ਹਨ੍ਹੇਰੀ ਬਣੀ ਆਫ਼ਤ, ਦਿੱਲੀ ਹਵਾਈ ਅੱਡੇ ਤੋਂ ਕਈ ਫਲਾਈਟਾਂ ਡਾਇਵਰਟ
04/26/2022 10:35:17 AM
ਨਵੀਂ ਦਿੱਲੀ- ਦਿੱਲੀ ਹਵਾਈ ਅੱਡੇ ’ਤੇ ਸੋਮਵਾਰ ਸ਼ਾਮ ਨੂੰ ਹਨ੍ਹੇਰੀ ਕਾਰਨ ਘੱਟੋਂ-ਘੱਟ 6 ਉਡਾਣਾਂ ਦੇ ਮਾਰਗ ’ਚ ਤਬਦੀਲੀ ਯਾਨੀ ਕਿ ਡਾਇਵਰਟ ਕੀਤੇ ਗਏ, ਜਦਕਿ ਕਈ ਜਹਾਜ਼ਾਂ ਨੇ ਦੇਰੀ ਨਾਲ ਉਡਾਣ ਭਰੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਮੁੰਬਈ ਤੋਂ ਆ ਰਹੇ ਵਿਸਤਾਰਾ ਦੇ ਇਕ ਜਹਾਜ਼ ਅਤੇ ਜੈਪੁਰ ਤੇ ਲਖਨਊ ਤੋਂ ਆ ਰਹੀ ਅਲਾਇੰਸ ਏਅਰ ਦੀਆਂ ਦੋ ਉਡਾਣਾਂ ਨੂੰ ਸੋਮਵਾਰ ਸ਼ਾਮ ਲਖਨਊ ਹਵਾਈ ਅੱਡੇ ਵੱਲ ਮੋੜਿਆ ਗਿਆ।
ਸੂਤਰਾਂ ਮੁਤਾਬਕ ਜਬਲਪੁਰ ਅਤੇ ਪਟਨਾ ਤੋਂ ਆ ਰਹੀ ਇੰਡੀਗੋ ਦੀਆਂ ਦੋ ਉਡਾਣਾਂ ਨੂੰ ਜੈਪੁਰ ਹਵਾਈ ਅੱਡੇ ਵੱਲ ਮੋੜਿਆ ਗਿਆ। ਅਧਿਕਾਰੀਆਂ ਮੁਤਾਬਕ ਵਡੋਦਰਾ ਤੋਂ ਆ ਰਹੀ ਏਅਰ ਇੰਡੀਆ ਦੀ ਇਕ ਉਡਾਣ ਨੂੰ ਵੀ ਜੈਪੁਰ ਹਵਾਈ ਅੱਡੇ ਵੱਲ ਮੋੜ ਦਿੱਤਾ ਗਿਆ। ਸੂਤਰਾਂ ਮੁਤਾਬਕ ਹਨ੍ਹੇਰੀ ਕਾਰਨ ਦਿੱਲੀ ਹਵਾਈ ਅੱਡੇ ਤੋਂ ਕਈ ਉਡਾਣਾਂ ਵੀ ਪ੍ਰਭਾਵਿਤ ਹੋਈਆਂ ਹਨ।