IndiGo ਦਾ ਵੱਡਾ ਫੈਸਲਾ, 2 ਅਪ੍ਰੈਲ ਤੋਂ ਹਵਾਈ ਸਫ਼ਰ ਹੋਵੇਗਾ ਮਹਿੰਗਾ

ਨਵੀਂ ਦਿੱਲੀ: ਹਵਾਈ ਯਾਤਰੀਆਂ ਲਈ ਇੱਕ ਚਿੰਤਾਜਨਕ ਖ਼ਬਰ ਹੈ ਕਿ ਦੇਸ਼ ਦੀ ਪ੍ਰਮੁੱਖ ਏਅਰਲਾਈਨ ਇੰਡੀਗੋ (IndiGo) ਨੇ 2 ਅਪ੍ਰੈਲ ਤੋਂ ਘਰੇਲੂ ਅਤੇ ਅੰਤਰਰਾਸ਼ਟਰੀ ਉਡਾਣਾਂ ਲਈ ਫਿਊਲ ਚਾਰਜ (Fuel Charge) ਵਧਾਉਣ ਦਾ ਫੈਸਲਾ ਕੀਤਾ ਹੈ। ਕੰਪਨੀ ਦਾ ਇਹ ਫੈਸਲਾ ਵਿਮਾਨ ਬਾਲਣ (ATF) ਦੀਆਂ ਕੀਮਤਾਂ ਵਿੱਚ ਹੋਏ ਭਾਰੀ ਉਛਾਲ ਤੋਂ ਬਾਅਦ ਆਇਆ ਹੈ।

ATF ਦੀਆਂ ਕੀਮਤਾਂ ਵਿੱਚ 130% ਦਾ ਵਾਧਾ
ਇੰਟਰਨੈਸ਼ਨਲ ਏਅਰ ਟ੍ਰਾਂਸਪੋਰਟ ਐਸੋਸੀਏਸ਼ਨ ਦੇ ਅੰਕੜਿਆਂ ਅਨੁਸਾਰ, ਪਿਛਲੇ ਇੱਕ ਮਹੀਨੇ ਵਿੱਚ ਵਿਮਾਨ ਬਾਲਣ ਦੀਆਂ ਕੀਮਤਾਂ ਵਿੱਚ 130 ਫੀਸਦੀ ਤੋਂ ਵੱਧ ਦਾ ਵਾਧਾ ਦਰਜ ਕੀਤਾ ਗਿਆ ਹੈ। ਹਾਲਾਂਕਿ, ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰਾਲੇ ਅਤੇ ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਯਾਤਰੀਆਂ 'ਤੇ ਬੋਝ ਨੂੰ ਸੀਮਤ ਰੱਖਣ ਲਈ ਘਰੇਲੂ ਉਡਾਣਾਂ ਲਈ ਸਿਰਫ 25 ਫੀਸਦੀ ਤੱਕ ਦੇ ਅੰਸ਼ਿਕ ਵਾਧੇ ਨੂੰ ਹੀ ਮਨਜ਼ੂਰੀ ਦਿੱਤੀ ਹੈ।

ਘਰੇਲੂ ਉਡਾਣਾਂ ਲਈ ਨਵੀਆਂ ਦਰਾਂ (ਦੂਰੀ ਦੇ ਆਧਾਰ 'ਤੇ):
ਇੰਡੀਗੋ ਨੇ ਘਰੇਲੂ ਸੈਕਟਰ ਵਿੱਚ ਦੂਰੀ ਦੇ ਹਿਸਾਬ ਨਾਲ ਹੇਠ ਲਿਖੇ ਫਿਊਲ ਚਾਰਜ ਤੈਅ ਕੀਤੇ ਹਨ:

•    0-500 ਕਿਲੋਮੀਟਰ: 275 ਰੁਪਏ।
•    501-1000 ਕਿਲੋਮੀਟਰ: 400 ਰੁਪਏ।
•    1001-1500 ਕਿਲੋਮੀਟਰ: 600 ਰੁਪਏ।
•    1501-2000 ਕਿਲੋਮੀਟਰ: 800 ਰੁਪਏ।
•    2000 ਕਿਲੋਮੀਟਰ ਤੋਂ ਵੱਧ: 950 ਰੁਪਏ।

ਅੰਤਰਰਾਸ਼ਟਰੀ ਉਡਾਣਾਂ 'ਤੇ ਵੀ ਵਧਿਆ ਬੋਝ
ਅੰਤਰਰਾਸ਼ਟਰੀ ਯਾਤਰਾ ਕਰਨ ਵਾਲੇ ਯਾਤਰੀਆਂ ਨੂੰ ਵੀ ਹੁਣ ਵੱਧ ਜੇਬ ਢਿੱਲੀ ਕਰਨੀ ਪਵੇਗੀ:

•    ਭਾਰਤੀ ਉਪ-ਮਹਾਂਦੀਪ (500 ਕਿਲੋਮੀਟਰ ਤੱਕ): 900 ਰੁਪਏ।
•    500 ਕਿਲੋਮੀਟਰ ਤੋਂ ਵੱਧ: 2,500 ਰੁਪਏ।
•    ਖਾੜੀ/ਮੱਧ ਪੂਰਬ: 3,000 ਤੋਂ 5,000 ਰੁਪਏ।
•    ਦੱਖਣ-ਪੂਰਬੀ ਏਸ਼ੀਆ/ਚੀਨ: 3,500 ਤੋਂ 5,000 ਰੁਪਏ।
•    ਯੂਕੇ ਅਤੇ ਯੂਰਪ: ਸਭ ਤੋਂ ਵੱਧ 10,000 ਰੁਪਏ।

ਏਅਰਲਾਈਨ ਨੇ ਸਪੱਸ਼ਟ ਕੀਤਾ ਹੈ ਕਿ ਤੇਲ ਦੀਆਂ ਕੀਮਤਾਂ ਵਿੱਚ ਬੇਤਹਾਸ਼ਾ ਵਾਧੇ ਦੇ ਬਾਵਜੂਦ, ਪੂਰੀ ਲਾਗਤ ਯਾਤਰੀਆਂ 'ਤੇ ਨਹੀਂ ਪਾਈ ਗਈ ਹੈ ਅਤੇ ਟਿਕਟਾਂ ਦੀਆਂ ਕੀਮਤਾਂ ਨੂੰ ਸੰਤੁਲਿਤ ਰੱਖਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ।