ਡਾਕਟਰ ਦੇ ਘਰ ''ਚ ਵੜਿਆ ਚੋਰ, AC ਦੀ ਠੰਡੀ ਹਵਾ ''ਚ ਆ ਗਈ ਨੀਂਦ, ਸਵੇਰੇ ਜਾਗਿਆ ਤਾਂ...

ਉੱਤਰ ਪ੍ਰਦੇਸ਼ - ਉੱਤਰ ਪ੍ਰਦੇਸ਼ ਦੇ ਲਖਨਊ ਵਿੱਚ ਐਤਵਾਰ (2 ਜੂਨ) ਨੂੰ ਇੱਕ ਚੋਰ ਨੂੰ ਇੱਕ ਘਰ ਦੇ ਫਰਸ਼ 'ਤੇ ਸ਼ਾਂਤੀ ਨਾਲ ਸੁੱਤੇ ਹੋਏ ਦੇਖਿਆ, ਜਿੱਥੇ ਉਹ ਲੁੱਟ ਕਰਨ ਲਈ ਦਾਖਲ ਹੋਇਆ ਸੀ। ਪੁਲਸ ਅਨੁਸਾਰ, ਵਿਅਕਤੀ ਕਾਫ਼ੀ ਸ਼ਰਾਬੀ ਸੀ ਅਤੇ ਘਰ ਦੇ ਏਅਰ ਕੰਡੀਸ਼ਨਰ ਦੀ ਠੰਡੀ ਹਵਾ 'ਚ ਉਸਨੂੰ ਗੂੜ੍ਹੀ ਨੀਂਦ ਆ ਗਈ।

ਇਹ ਘਟਨਾ ਐਤਵਾਰ ਤੜਕੇ ਉਸ ਸਮੇਂ ਵਾਪਰੀ ਜਦੋਂ ਵਿਅਕਤੀ ਲਖਨਊ ਦੇ ਇੰਦਰਾਨਗਰ ਇਲਾਕੇ 'ਚ ਸਥਿਤ ਘਰ 'ਚ ਦਾਖਲ ਹੋਇਆ। ਇਹ ਘਰ ਡਾਕਟਰ ਸੁਨੀਲ ਪਾਂਡੇ ਦਾ ਹੈ, ਜੋ ਵਾਰਾਣਸੀ ਵਿੱਚ ਤਾਇਨਾਤ ਹਨ ਅਤੇ ਘਟਨਾ ਦੇ ਸਮੇਂ ਬਾਹਰ ਸਨ। ਘਰ ਖਾਲੀ ਦੇਖ ਕੇ ਵਿਅਕਤੀ ਨੇ ਘਰ ਦਾ ਦਰਵਾਜ਼ਾ ਖੋਲ੍ਹਿਆ ਅਤੇ ਅੰਦਰ ਦਾਖਲ ਹੋ ਗਿਆ। ਘਰ ਦੇ ਡਰਾਇੰਗ ਏਰੀਏ ਵਿੱਚ ਜਾਣ ਤੋਂ ਬਾਅਦ ਆਦਮੀ ਨੇ ਏਅਰ ਕੰਡੀਸ਼ਨਰ ਨੂੰ ਦੇਖਿਆ ਅਤੇ ਇਸਨੂੰ ਚਾਲੂ ਕਰ ਦਿੱਤਾ। ਫਿਰ, ਉਹ ਸਿਰਹਾਣੇ 'ਤੇ ਸਿਰ ਰੱਖ ਕੇ ਆਰਾਮ ਨਾਲ ਫਰਸ਼ 'ਤੇ ਲੇਟ ਗਿਆ ਅਤੇ ਜਲਦੀ ਹੀ ਸੌਂ ਗਿਆ। ਘਰ ਦਾ ਮੇਨ ਗੇਟ ਖੁੱਲ੍ਹਾ ਦੇਖ ਕੇ ਡਾਕਟਰ ਪਾਂਡੇ ਦੇ ਗੁਆਂਢੀਆਂ ਨੇ ਡਾਕਟਰ ਨੂੰ ਫ਼ੋਨ ਕਰ ਦਿੱਤਾ। ਹਾਲਾਂਕਿ, ਉਹ ਉਸ ਸਮੇਂ ਲਖਨਊ ਵਿੱਚ ਨਹੀਂ ਸਨ, ਇਸ ਲਈ ਉਨ੍ਹਾਂ ਨੇ ਪੁਲਸ ਨੂੰ ਸੂਚਿਤ ਕਰ ਦਿੱਤਾ।

ਜਦੋਂ ਪੁਲਸ ਮੌਕੇ 'ਤੇ ਪਹੁੰਚੀ ਤਾਂ ਦੇਖਿਆ ਕਿ ਵਿਅਕਤੀ ਏਅਰ ਕੰਡੀਸ਼ਨਰ ਵਾਲੇ ਕਮਰੇ ਵਿਚ ਆਰਾਮ ਨਾਲ ਸੌਂ ਰਿਹਾ ਸੀ। ਚੋਰ ਦੀ ਇਕ ਤਸਵੀਰ ਵਿਚ ਉਸ ਨੇ ਸੱਜੇ ਹੱਥ ਵਿਚ ਮੋਬਾਈਲ ਫੜਿਆ ਹੋਇਆ ਹੈ ਅਤੇ ਗੂੜ੍ਹੀ ਨੀਂਦ ਵਿਚ ਹੈ। ਡੀਸੀਪੀ ਉੱਤਰੀ ਜ਼ੋਨ ਆਰ ਵਿਜੇ ਸ਼ੰਕਰ ਨੇ ਦੱਸਿਆ ਕਿ ਵਿਅਕਤੀ ਚੋਰੀ ਦੀ ਨੀਅਤ ਨਾਲ ਘਰ ਵਿੱਚ ਦਾਖਲ ਹੋਇਆ ਸੀ, ਪਰ ਸੌਂ ਗਿਆ। ਅਧਿਕਾਰੀ ਨੇ ਕਿਹਾ, "ਉਹ ਬਹੁਤ ਸ਼ਰਾਬੀ ਸੀ ਜਿਸ ਕਾਰਨ ਉਹ ਸੌਂ ਗਿਆ ਅਤੇ ਜਾਗ ਨਹੀਂ ਸਕਿਆ। ਗੁਆਂਢੀਆਂ ਨੇ ਇਸ ਬਾਰੇ ਜਾਣਕਾਰੀ ਦਿੱਤੀ, ਜਿਸ ਤੋਂ ਬਾਅਦ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ।" ਪੁਲਸ ਨੇ ਕਿਹਾ ਕਿ ਇਸ ਮਾਮਲੇ 'ਚ ਅਗਲੇਰੀ ਕਾਰਵਾਈ ਕੀਤੀ ਜਾਵੇਗੀ।