ਮਹਾਲਕਸ਼ਮੀ ਕਤਲ ਕਾਂਡ ''ਚ ਵੱਡਾ ਖੁਲਾਸਾ, ਦਰੱਖਤ ਨਾਲ ਲਟਕਦੀ ਮਿਲੀ ਕਾਤਲ ਦੀ ਲਾਸ਼

ਨੈਸ਼ਨਲ ਡੈਸਕ - ਬੈਂਗਲੁਰੂ ਦੇ ਦਿਲ ਦਹਿਲਾ ਦੇਣ ਵਾਲੇ ਮਹਾਲਕਸ਼ਮੀ ਕਤਲ ਕਾਂਡ 'ਚ ਵੱਡਾ ਖੁਲਾਸਾ ਹੋਇਆ ਹੈ। ਚੌਥਾ ਵਿਅਕਤੀ, ਜਿਸ ਨੂੰ ਪੁਲਸ ਕਈ ਸ਼ਹਿਰਾਂ ਵਿਚ ਕਾਤਲ ਸਮਝ ਕੇ ਲੱਭ ਰਹੀ ਸੀ, ਪੁਲਸ ਨੇ ਫੜ ਲਿਆ ਹੈ। ਪਰ ਜ਼ਿੰਦਾ ਨਹੀਂ ਸਗੋਂ ਮਰਿਆ ਹੋਇਆ ਹੈ। ਤੁਸੀਂ ਇਸ ਨੂੰ ਸਹੀ ਪੜ੍ਹਿਆ। ਦਰਅਸਲ, ਪੁਲਸ ਸ਼ੱਕੀ ਕਾਤਲ ਮੁਕਤੀ ਰੰਜਨ ਰਾਏ ਦਾ ਪਿੱਛਾ ਕਰ ਰਹੀ ਸੀ। ਉਸ ਦੀ ਲਾਸ਼ ਓਡੀਸ਼ਾ 'ਚ ਦਰੱਖਤ ਨਾਲ ਲਟਕਦੀ ਮਿਲੀ। ਉਸ ਕੋਲੋਂ ਇਕ ਸੁਸਾਈਡ ਨੋਟ ਵੀ ਬਰਾਮਦ ਹੋਇਆ ਹੈ। ਜਿਸ 'ਚ ਉਸ ਨੇ ਮਹਾਲਕਸ਼ਮੀ ਦੇ ਕਤਲ ਦਾ ਵੀ ਇਕਬਾਲ ਕੀਤਾ ਹੈ।

ਸੁਸਾਈਡ ਨੋਟ ਤੋਂ ਵੱਡਾ ਖੁਲਾਸਾ
ਜਦੋਂ ਕਿ ਮਹਾਲਕਸ਼ਮੀ ਕਤਲ ਕਾਂਡ ਦੇ ਮੁੱਖ ਮੁਲਜ਼ਮ ਮੁਕਤੀ ਰੰਜਨ ਰਾਏ ਦੀ ਪੁਲਸ ਪਹਿਲਾਂ ਹੀ ਪਛਾਣ ਕਰ ਚੁੱਕੀ ਸੀ। ਪੁਲਸ ਸੂਤਰਾਂ ਦਾ ਕਹਿਣਾ ਹੈ ਕਿ ਕਤਲ ਦੇ ਬਾਅਦ ਤੋਂ ਦੋਸ਼ੀ ਫਰਾਰ ਸੀ, ਜਿਸ ਕਾਰਨ ਬੈਂਗਲੁਰੂ ਪੁਲਸ ਨੇ ਕਈ ਸੂਬਿਆਂ 'ਚ ਉਸ ਦੀ ਭਾਲ ਸ਼ੁਰੂ ਕਰ ਦਿੱਤੀ ਸੀ। ਹੁਣ ਉਸ ਨੇ ਓਡੀਸ਼ਾ ਵਿੱਚ ਖੁਦਕੁਸ਼ੀ ਕਰ ਲਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਸ ਦੀ ਲਾਸ਼ ਦੇ ਨੇੜੇ ਇਕ ਸੁਸਾਈਡ ਨੋਟ ਮਿਲਿਆ ਹੈ। ਜਿਸ ਵਿੱਚ ਮੁਕਤੀ ਰੰਜਨ ਰਾਏ ਨੇ ਕਤਲ ਦੀ ਗੱਲ ਕਬੂਲ ਕਰ ਲਈ ਹੈ ਅਤੇ ਕਿਹਾ ਹੈ ਕਿ ਉਸ ਨੇ ਇਹ ਜੁਰਮ ਕਰਕੇ ਗਲਤੀ ਕੀਤੀ ਹੈ।

ਸਰੀਰ ਦੇ ਅੰਗਾਂ ਨੂੰ ਬੈਗ ਵਿੱਚ ਪਾ ਕੇ ਨਸ਼ਟ ਕਰਨ ਦੀ ਸਾਜ਼ਿਸ਼
ਦਰਅਸਲ, ਮਹਾਲਕਸ਼ਮੀ ਬੈਂਗਲੁਰੂ ਦੇ ਵਿਆਲੀਕਾਵਲ ਇਲਾਕੇ 'ਚ ਤਿੰਨ ਮੰਜ਼ਿਲਾ ਮਕਾਨ ਦੀ ਪਹਿਲੀ ਮੰਜ਼ਿਲ 'ਤੇ ਰਹਿੰਦੀ ਸੀ। 21 ਸਤੰਬਰ ਨੂੰ ਮਹਾਲਕਸ਼ਮੀ ਦੇ ਕਮਰੇ ਅਤੇ ਫਰਿੱਜ 'ਚ ਉਸ ਦੀ ਲਾਸ਼ ਦੇ ਟੁਕੜੇ ਖਿੱਲਰੇ ਹੋਏ ਮਿਲੇ ਸਨ। ਸ਼ੱਕ ਹੈ ਕਿ ਮਹਾਲਕਸ਼ਮੀ ਦਾ ਕਤਲ ਕਰੀਬ 19 ਦਿਨ ਪਹਿਲਾਂ ਹੋਇਆ ਸੀ। ਪੁਲਸ ਨੂੰ ਮਹਾਲਕਸ਼ਮੀ ਦੇ ਕਮਰੇ 'ਚ ਰੱਖਿਆ ਟਰਾਲੀ ਬੈਗ ਵੀ ਮਿਲਿਆ ਹੈ। ਬੈਂਗਲੁਰੂ ਪੁਲਸ ਦੇ ਸੂਤਰਾਂ ਅਨੁਸਾਰ, ਇਹ ਪੂਰੀ ਤਰ੍ਹਾਂ ਸੰਭਵ ਹੈ ਕਿ ਕਾਤਲ ਨੇ ਸਰੀਰ ਦੇ ਅੰਗਾਂ ਨੂੰ ਉਸੇ ਬੈਗ ਵਿੱਚ ਰੱਖਣ ਅਤੇ ਉਨ੍ਹਾਂ ਨੂੰ ਬਾਹਰ ਕਿਤੇ ਸੁੱਟਣ ਦੀ ਸਾਜ਼ਿਸ਼ ਰਚੀ ਸੀ। ਪਰ ਇਹ ਇਲਾਕਾ ਬਹੁਤ ਭੀੜ-ਭੜੱਕੇ ਵਾਲਾ ਹੋਣ ਕਰਕੇ ਸ਼ਾਇਦ ਉਸ ਨੂੰ ਲਾਸ਼ ਦੇ ਟੁਕੜਿਆਂ ਨੂੰ ਨਿਪਟਾਉਣ ਦਾ ਮੌਕਾ ਨਹੀਂ ਮਿਲਿਆ।