ਇੰਦੌਰ ’ਚ 25 ਸਾਲਾ ਮੈਰਾਥਾਨ ਦੌੜਾਕ ਦੀ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ

ਇੰਦੌਰ - ਐਤਵਾਰ ਨੂੰ ਇੰਦੌਰ ’ਚ ਮੈਰਾਥਨ ’ਚ ਦੌੜਦੇ ਸਮੇਂ ਇਕ 25 ਸਾਲਾ ਵਿਅਕਤੀ ਦੀ ਸ਼ੱਕੀ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ। ਇਕ ਪੁਲਸ ਅਧਿਕਾਰੀ ਨੇ ਇਹ ਜਾਣਕਾਰੀ ਦਿੱਤੀ। ਸਹਾਇਕ ਪੁਲਸ ਕਮਿਸ਼ਨਰ ਏ.ਸੀ.ਪੀ. ਤੁਸ਼ਾਰ ਸਿੰਘ ਨੇ ਗੱਲਬਾਤ ਦੌਰਾਨ ਦੱਸਿਆ ਕਿ ਇੰਦੌਰ ਮੈਰਾਥਨ ’ਚ ਦੌੜ ਰਿਹਾ ਆਰੀਅਨ ਟੋਡੀ (25), ਈਵੈਂਟ ਦੀ ਸਮਾਪਤੀ ਲਾਈਨ ਤੋਂ ਲਗਭਗ 150 ਮੀਟਰ ਪਹਿਲਾਂ ਬੇਹੋਸ਼ ਹੋ ਗਿਆ ਅਤੇ ਉੱਥੇ ਮੌਜੂਦ ਇਕ ਡਾਕਟਰ ਨੇ ਉਸ ਨੂੰ ਸੀਪੀਆਰ (ਕਾਰਡੀਓ-ਪਲਮੋਨਰੀ ਰੀਸਸੀਟੇਸ਼ਨ) ਦਿੱਤਾ ਪਰ ਉਸ ਦੀ ਹਾਲਤ ’ਚ ਕੋਈ ਸੁਧਾਰ ਨਹੀਂ ਹੋਇਆ। ਸੀਪੀਆਰ ਇਕ ਐਮਰਜੈਂਸੀ ਜੀਵਨ ਬਚਾਉਣ ਵਾਲੀ ਪ੍ਰਕਿਰਿਆ ਹੈ ਜੋ ਉਦੋਂ ਕੀਤੀ ਜਾਂਦੀ ਹੈ ਜਦੋਂ ਕਿਸੇ ਵਿਅਕਤੀ ਦਾ ਸਾਹ ਜਾਂ ਦਿਲ ਦੀ ਧੜਕਣ ਬੰਦ ਹੋ ਜਾਂਦੀ ਹੈ।

ਉਨ੍ਹਾਂ ਕਿਹਾ ਕਿ ਟੋਡੀ ਨੂੰ ਨੇੜਲੇ ਸਰਕਾਰੀ ਮਹਾਰਾਜਾ ਯਸ਼ਵੰਤਰਾਓ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਏ.ਸੀ.ਪੀ. ਨੇ ਕਿਹਾ, "ਸਾਨੂੰ ਪਤਾ ਲੱਗਾ ਹੈ ਕਿ ਟੋਡੀ ਮੈਰਾਥਨ ਤੋਂ ਪਹਿਲਾਂ ਬਿਲਕੁਲ ਤੰਦਰੁਸਤ ਦਿਖਾਈ ਦੇ ਰਿਹਾ ਸੀ। ਪਹਿਲੀ ਨਜ਼ਰੇ, ਅਜਿਹਾ ਲੱਗਦਾ ਹੈ ਕਿ ਉਸਦੀ ਮੌਤ ਮੈਰਾਥਨ ਵਿੱਚ ਦੌੜਦੇ ਸਮੇਂ ਦਿਲ ਦਾ ਦੌਰਾ ਪੈਣ ਕਾਰਨ ਹੋਈ ਸੀ। ਮੌਤ ਦੇ ਕਾਰਨ ਦੀ ਪੁਸ਼ਟੀ ਕਰਨ ਲਈ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਗਿਆ ਹੈ।" ਦੇਸ਼ ਭਰ ਦੇ ਸੈਂਕੜੇ ਦੌੜਾਕਾਂ ਨੇ ਇੰਦੌਰ ਮੈਰਾਥਨ ਦੇ 12ਵੇਂ ਐਡੀਸ਼ਨ ’ਚ ਹਿੱਸਾ ਲਿਆ, ਜਿਸ ਦਾ ਆਯੋਜਨ "ਆਪਣੇ ਦਿਲ ਨਾਲ ਦੌੜੋ, ਆਪਣੇ ਦਿਲ ਲਈ" ਦੇ ਨਾਅਰੇ ਨਾਲ ਕੀਤਾ ਗਿਆ ਸੀ।