ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ

ਮੋਹਾਲੀ (ਜੱਸੀ) : ਮੋਹਾਲੀ ਜ਼ਿਲ੍ਹੇ ’ਚ ਕਰੀਬ 27 ਸਕੂਲਾਂ ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲੀ ਹੈ। ਇਨ੍ਹਾਂ ’ਚ ਮੋਹਾਲੀ ਦੇ 16, ਖਰੜ ਦੇ 7, ਜ਼ੀਰਕਪੁਰ ਦੇ 3, ਡੇਰਾਬੱਸੀ ਦਾ 1 ਸਕੂਲ ਸ਼ਾਮਲ ਹੈ। ਮੋਹਾਲੀ ਦੇ ਸਕੂਲਾਂ ਨੂੰ ਭੇਜੀ ਈ-ਮੇਲ ’ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ਨਾਲ-ਨਾਲ ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਦੀ ਤਰ੍ਹਾਂ ਮੁੱਖ ਮੰਤਰੀ ਭਗਵੰਤ ਮਾਨ ਨੂੰ ਵੀ ਨਿਸ਼ਾਨਾ ਬਣਾਉਣ ਦੀ ਧਮਕੀ ਦਿੱਤੀ ਗਈ ਹੈ। ਈ-ਮੇਲ ’ਚ ਲਿਖਿਆ ਹੈ, “ਪੰਜਾਬ ਹੁਣ ਖਾਲਿਸਤਾਨ। ਬੰਬ ਬਲਾਸਟ  1:11 ਪੀ. ਐੱਮ. ਮੋਹਾਲੀ ਦੇ ਸਕੂਲਾਂ ਅਤੇ ਕਾਲਜਾਂ ਵਿਚ ਹੋਵੇਗਾ। ਭਗਵੰਤ ਮਾਨ-ਬੇਅੰਤ ਵਾਂਗ ਹਿਊਮਨ ਬੰਬ ਨਾਲ ਉੱਡੇਗਾ।

ਹਿੰਦੂ ਅੱਤਵਾਦੀ ਮੋਦੀ ਦੇ ਹੁਕਮਾਂ ’ਤੇ ਪੰਜਾਬ ਦੇ ਨੌਜਵਾਨਾਂ ਦਾ ਕਤਲੇਆਮ ਕਰ ਰਿਹਾ ਹੈ। 13 ਫਰਵਰੀ 2:11 ਪੀ. ਐੱਮ. ਨੂੰ ਬੰਬ ਚੱਲੇਗਾ ਦਿੱਲੀ ਹਿੰਦੋਸਤਾਨੀ ਸੰਸਦ ਵਿਚ, ਨਿਸ਼ਾਨਾ ਮੋਦੀ-ਸ਼ਾਹ। ਖਾਲਿਸਤਾਨ ਨੈਸ਼ਨਲ ਆਰਮੀ, ਇੰਜੀਨੀਅਰ ਗੁਰਾਂਖ ਸਿੰਘ, ਰੁਕਾਂ ਸਾਹਵਾਲਾ।’ ਮੋਹਾਲੀ ਦੇ ਐੱਸ. ਐੱਸ. ਪੀ. ਹਰਮਨਦੀਪ ਸਿੰਘ ਹਾਂਸ ਨੇ ਦੱਸਿਆ ਕਿ ਧਮਕੀ ਭਰੀ ਈ-ਮੇਲ ਕਿੱਥੋਂ ਆਈ ਹੈ, ਇਸ ਦੀ ਜਾਂਚ ਸਾਈਬਰ ਪੁਲਸ ਸਟੇਸ਼ਨ, ਫੇਜ਼-7, ਮੋਹਾਲੀ ਨੂੰ ਸੌਂਪ ਦਿੱਤੀ ਗਈ ਹੈ।

ਇਹ ਧਮਕੀ ਭਰੇ ਈ-ਮੇਲਾਂ ਸਕੂਲਾਂ ਨੂੰ ਸਵੇਰੇ 7.30 ਤੋਂ 8 ਵਜੇ ਦੇ ਵਿਚਕਾਰ ਮਿਲੀਆਂ ਹਨ। ਸੂਚਨਾ ਮਿਲਦੇ ਸਾਰ ਹੀ ਪੁਲਸ ਟੀਮਾਂ, ਐਂਟੀ-ਸਾਬੋਤਾਜ ਟੀਮਾਂ ਅਤੇ ਬੰਬ ਨਿਰੋਧਕ ਦਸਤਾ (ਬੰਬ ਡਿਸਪੋਜ਼ਲ ਸਕੁਐਡ) ਤੁਰੰਤ ਮੌਕੇ ’ਤੇ ਪਹੁੰਚ ਗਏ। ਵਿਦਿਆਰਥੀਆਂ ਅਤੇ ਸਟਾਫ਼ ਨੂੰ ਬਾਹਰ ਕੱਢ ਕੇ ਸਕੂਲ ਕੰਪਲੈਕਸਾਂ ਵਿਚ ਸਰਚ ਆਪਰੇਸ਼ਨ ਚਲਾਇਆ ਗਿਆ। ਕਿਸੇ ਵੀ ਸਕੂਲ ਵਿਚ ਧਮਾਕਾਖੇਜ਼ ਸਮੱਗਰੀ ਜਾਂ ਸ਼ੱਕੀ ਵਸਤੂ ਨਹੀਂ ਮਿਲੀ ਹੈ।