ਬੇਖੌਫ਼ ਲੁਟੇਰੇ : ਚੌਕੀਦਾਰ ਨੂੰ ਬੰਧਕ ਬਣਾ 67 ਕੁਇੰਟਲ ਸਰੀਆ ਤੇ 200 ਸੀਮੈਂਟ ਦੀਆਂ ਬੋਰੀਆਂ ਲੁੱਟ ਕੇ ਹੋਏ ਰਫ਼ੂ-ਚੱਕਰ

ਲੁਧਿਆਣਾ, (ਰਾਜ)- ਮਹਾਨਗਰ ਵਿੱਚ ਬੇਖੌਫ਼ ਲੁਟੇਰਿਆਂ ਨੇ ਇੱਕ ਵਾਰ ਫਿਰ ਪੁਲਸ ਸੁਰੱਖਿਆ ਦੇ ਦਾਅਵਿਆਂ ਦੀ ਫੂਕ ਕੱਢਦਿਆਂ ਇੱਕ ਵੱਡੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਹੈ। ਇਸ ਵਾਰ ਜਵੱਦੀ ਨਹਿਰ ਦੇ ਪੁਲ ਨੇੜੇ ਪ੍ਰਕਾਸ਼ ਨਗਰ ਦੇ ਇੱਕ ਨਿਰਮਾਣ ਅਧੀਨ ਪਲਾਟ ਨੂੰ ਨਿਸ਼ਾਨਾ ਬਣਿਆ ਹੈ, ਜਿੱਥੋਂ 7-8 ਅਣਪਛਾਤੇ ਨਕਾਬਪੋਸ਼ ਲੁਟੇਰਿਆਂ ਨੇ ਹਥਿਆਰਾਂ ਦੀ ਨੋਕ 'ਤੇ ਚੌਕੀਦਾਰ ਨੂੰ ਬੰਧਕ ਬਣਾਇਆ ਅਤੇ ਕੈਂਟਰ ਵਿੱਚ ਸਰੀਆ ਅਤੇ ਸੀਮੈਂਟ ਲੱਦ ਕੇ ਫਰਾਰ ਹੋ ਗਏ।

ਸ਼ਿਕਾਇਤਕਰਤਾ ਨਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਸ ਨੇ ਪ੍ਰਕਾਸ਼ ਨਗਰ ਇਲਾਕੇ ਵਿੱਚ ਕਰੀਬ 450 ਵਰਗ ਗਜ਼ ਦੇ ਪਲਾਟ 'ਤੇ ਉਸਾਰੀ ਦਾ ਕੰਮ ਸ਼ੁਰੂ ਕਰਵਾਇਆ ਹੋਇਆ ਹੈ। ਉਸਾਰੀ ਲਈ ਉਸ ਨੇ ਉੱਥੇ 200 ਬੋਰੀਆਂ ਸੀਮੈਂਟ ਅਤੇ ਕਰੀਬ 67 ਕੁਇੰਟਲ ਸਰੀਆ ਲਿਆ ਕੇ ਰੱਖਿਆ ਸੀ। ਇਸ ਕੀਮਤੀ ਸਾਮਾਨ ਦੀ ਦੇਖਭਾਲ ਲਈ ਉਸ ਨੇ ਬਹਾਦਰ ਸਿੰਘ ਨਾਮ ਦੇ ਚੌਕੀਦਾਰ ਨੂੰ ਤਾਇਨਾਤ ਕੀਤਾ ਸੀ ਪਰ ਲੁਟੇਰਿਆਂ ਨੇ ਚੌਕੀਦਾਰ ਦੀ ਮੌਜੂਦਗੀ ਵਿੱਚ ਹੀ ਲੁੱਟ ਦੀ ਇਸ ਵੱਡੀ ਵਾਰਦਾਤ ਨੂੰ ਅੰਜਾਮ ਦੇ ਦਿੱਤਾ।

ਜਾਣਕਾਰੀ ਮੁਤਾਬਕ ਇਹ ਵਾਰਦਾਤ 17 ਫਰਵਰੀ ਦੀ ਦਰਮਿਆਨੀ ਰਾਤ ਕਰੀਬ 3:14 ਵਜੇ ਦੀ ਹੈ। ਚੌਕੀਦਾਰ ਬਹਾਦਰ ਸਿੰਘ ਨੇ ਫ਼ੋਨ 'ਤੇ ਦੱਸਿਆ ਕਿ ਰਾਤ ਨੂੰ ਅਚਾਨਕ 7 ਤੋਂ 8 ਅਣਪਛਾਤੇ ਵਿਅਕਤੀ ਪਲਾਟ ਦੇ ਅੰਦਰ ਦਾਖ਼ਲ ਹੋਏ। ਇਸ ਤੋਂ ਪਹਿਲਾਂ ਕਿ ਬਹਾਦਰ ਸਿੰਘ ਕੁਝ ਸਮਝ ਪਾਉਂਦਾ, ਹਮਲਾਵਰਾਂ ਨੇ ਉਸ ਨੂੰ ਹਥਿਆਰਾਂ ਦੇ ਜ਼ੋਰ 'ਤੇ ਫੜ ਕੇ ਬੰਧਕ ਬਣਾ ਲਿਆ। ਇਸ ਤੋਂ ਬਾਅਦ ਮੁਲਜ਼ਮਾਂ ਨੇ ਆਪਣਾ ਕੈਂਟਰ ਅੰਦਰ ਲਗਾਇਆ ਅਤੇ ਦੇਖਦੇ ਹੀ ਦੇਖਦੇ ਸਾਰਾ 67 ਕੁਇੰਟਲ ਸਰੀਆ ਉਸ ਵਿੱਚ ਲੋਡ ਕਰ ਲਿਆ ਅਤੇ ਰਫ਼ੂ-ਚੱਕਰ ਹੋ ਗਏ।

ਇੰਨੀ ਭਾਰੀ ਮਾਤਰਾ ਵਿੱਚ ਲੋਹੇ ਦਾ ਸਰੀਆ ਕੈਂਟਰ ਵਿੱਚ ਭਰ ਕੇ ਲੈ ਜਾਣਾ ਪੁਲਸ ਦੀ ਗਸ਼ਤ 'ਤੇ ਗੰਭੀਰ ਸਵਾਲ ਖੜ੍ਹੇ ਕਰਦਾ ਹੈ। ਵਾਰਦਾਤ ਤੋਂ ਬਾਅਦ ਇਲਾਕੇ ਦੇ ਲੋਕਾਂ ਵਿੱਚ ਭਾਰੀ ਦਹਿਸ਼ਤ ਪਾਈ ਜਾ ਰਹੀ ਹੈ। ਸੂਚਨਾ ਮਿਲਦੇ ਹੀ ਥਾਣਾ ਦੁੱਗਰੀ ਦੀ ਪੁਲਿਸ ਮੌਕੇ 'ਤੇ ਪਹੁੰਚੀ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਆਸ-ਪਾਸ ਦੇ ਰਸਤਿਆਂ 'ਤੇ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਫੁਟੇਜ ਖੰਗਾਲ ਰਹੀ ਹੈ ਤਾਂ ਜੋ ਉਸ ਕੈਂਟਰ ਦਾ ਸੁਰਾਗ ਲਗਾਇਆ ਜਾ ਸਕੇ ਜਿਸ ਵਿੱਚ ਬਦਮਾਸ਼ ਲੁੱਟ ਦਾ ਮਾਲ ਲੈ ਕੇ ਭੱਜੇ ਹਨ। ਫਿਲਹਾਲ ਪੁਲਸ ਨੇ ਅਣਪਛਾਤੇ ਮੁਲਜ਼ਮਾਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਉਨ੍ਹਾਂ ਦੀ ਭਾਲ ਤੇਜ਼ ਕਰ ਦਿੱਤੀ ਹੈ।