ਨੀਂਦ ਦੀ ਝਪਕੀ ਨੇ ਬੇਕਾਬੂ ਕੀਤਾ ਟਰੱਕ, ਸੇਮ ਨਾਲੇ ’ਚ ਡਿੱਗਿਆ

ਹਲਵਾਰਾ (ਲਾਡੀ ਸਿੱਧੂ) : ਰਾਜਸਥਾਨ ਤੋਂ ਕੈਮੀਕਲ ਦੀ ਡਿਲਿਵਰੀ ਦੇ ਕੇ ਮੁੱਲਾਂਪੁਰ ਦਾਖਾ ਪਰਤ ਰਹੇ ਇੱਕ ਟਰੱਕ ਚਾਲਕ ਨੂੰ ਰਸਤੇ ਵਿਚ ਨੀਂਦ ਦੀ ਝਪਕੀ ਆਉਣ ਕਾਰਨ ਵੀਰਵਾਰ ਦੁਪਹਿਰ ਲੁਧਿਆਣਾ-ਬਠਿੰਡਾ ਰਾਜਮਾਰਗ ’ਤੇ ਭਿਆਨਕ ਹਾਦਸੇ ਦਾ ਸਾਹਮਣਾ ਕਰਨਾ ਪਿਆ। ਬੰਦ ਪਏ ਟੋਲ ਪਲਾਜ਼ੇ ਨੇੜੇ ਸੜਕ ਦੇ ਇੱਕ ਖਤਰਨਾਕ ਮੋੜ ’ਤੇ ਬੇਕਾਬੂ ਹੋਇਆ ਟਰੱਕ ਸੜਕ ਕਿਨਾਰੇ ਸਥਿਤ ਸੇਮ ਨਾਲੇ ਵਿਚ ਜਾ ਡਿੱਗਿਆ। ਹਾਦਸੇ ਤੋਂ ਬਾਅਦ ਟਰੱਕ ਪਾਣੀ ਵਿਚ ਧੱਸਣ ਲੱਗ ਪਿਆ ਅਤੇ ਚਾਲਕ ਅੰਦਰ ਹੀ ਬੇਹੋਸ਼ ਹੋ ਗਿਆ। ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਨੇੜੇ ਤਾਇਨਾਤ ਸੜਕ ਸੁਰੱਖਿਆ ਫੋਰਸ ਦੀ ਟੀਮ ਤੁਰੰਤ ਮੌਕੇ ’ਤੇ ਪਹੁੰਚੀ। ਟਰੱਕ ਨਾਲੇ ਵਿਚ ਡੂੰਘਾ ਧੱਸਿਆ ਹੋਣ ਕਾਰਨ ਉਸ ਤੱਕ ਪਹੁੰਚਣਾ ਆਸਾਨ ਨਹੀਂ ਸੀ। ਟੀਮ ਨੇ ਵੱਡੀਆਂ ਰੱਸੀਆਂ ਦਾ ਪ੍ਰਬੰਧ ਕਰਕੇ ਰਾਹਗੀਰਾਂ ਦੀ ਮਦਦ ਨਾਲ ਬਚਾਅ ਕਾਰਜ ਸ਼ੁਰੂ ਕੀਤਾ। ਕਾਫ਼ੀ ਜੱਦੋ-ਜਹਿਦ ਤੋਂ ਬਾਅਦ ਟਰੱਕ ਵਿਚ ਬੇਹੋਸ਼ ਪਏ ਚਾਲਕ ਨੂੰ ਬਾਹਰ ਕੱਢ ਲਿਆ ਗਿਆ।

ਰੋਡ ਸੇਫਟੀ ਫੋਰਸ ਦੇ ਮੁਲਾਜ਼ਮਾਂ ਨੇ ਜ਼ਖ਼ਮੀ ਚਾਲਕ ਰਣਜੀਤ ਸਿੰਘ ਸੋਨੂ ਵਾਸੀ ਪਿੰਡ ਦਾਖਾ ਨੂੰ ਤੁਰੰਤ ਸੁਧਾਰ ਬਾਜ਼ਾਰ ਸਥਿਤ ਚੋਪੜਾ ਨਰਸਿੰਗ ਹੋਮ ਵਿਖੇ ਇਲਾਜ ਲਈ ਦਾਖ਼ਲ ਕਰਵਾਇਆ। ਇਸ ਦੇ ਨਾਲ ਹੀ ਚਾਲਕ ਦੇ ਫੋਨ ਤੋਂ ਉਸ ਦੇ ਪਰਿਵਾਰਕ ਮੈਂਬਰਾਂ ਅਤੇ ਟਰੱਕ ਮਾਲਕਾਂ ਨਾਲ ਸੰਪਰਕ ਕਰਕੇ ਹਾਦਸੇ ਦੀ ਜਾਣਕਾਰੀ ਦਿੱਤੀ ਗਈ। ਸਮੇਂ ਸਿਰ ਰਾਹਤ ਮਿਲਣ ਕਾਰਨ ਚਾਲਕ ਦੀ ਜਾਨ ਬਚ ਗਈ।

ਲੰਬੇ ਰੂਟ ਕਾਰਨ ਪੂਰੀ ਨਹੀਂ ਹੋਈ ਨੀਂਦ

ਹੋਸ਼ ਵਿਚ ਆਉਣ ਉਪਰੰਤ ਰਣਜੀਤ ਸਿੰਘ ਸੋਨੂ ਨੇ ਦੱਸਿਆ ਕਿ ਉਹ ਮੁੱਲਾਂਪੁਰ ਦਾਖਾ ਸਥਿਤ ਚਾਚਾ ਫੀਡ ਫੈਕਟਰੀ ਵਿਚ ਟਰੱਕ ਚਾਲਕ ਵਜੋਂ ਕੰਮ ਕਰਦਾ ਹੈ। ਉਹ ਰਾਜਸਥਾਨ ਵਿਚ ਕੈਮੀਕਲ ਆਦਿ ਦੀ ਡਿਲਿਵਰੀ ਦੇਣ ਤੋਂ ਬਾਅਦ ਖਾਲੀ ਟਰੱਕ ਲੈ ਕੇ ਮੁੱਲਾਂਪੁਰ ਦਾਖਾ ਵਾਪਸ ਆ ਰਿਹਾ ਸੀ। ਉਸ ਨੇ ਦੱਸਿਆ ਕਿ ਲੰਬਾ ਰੂਟ ਹੋਣ ਕਾਰਨ ਉਸ ਨੂੰ ਰਸਤੇ ਵਿਚ ਲੋੜੀਂਦਾ ਆਰਾਮ ਨਹੀਂ ਮਿਲ ਸਕਿਆ ਅਤੇ ਨੀਂਦ ਵੀ ਪੂਰੀ ਨਹੀਂ ਹੋਈ ਸੀ। ਉਹ ਜਲਦ ਤੋਂ ਜਲਦ ਟਰੱਕ ਲੈ ਕੇ ਫੀਡ ਫੈਕਟਰੀ ਪਹੁੰਚਣਾ ਚਾਹੁੰਦਾ ਸੀ। ਇਸੇ ਦੌਰਾਨ ਅਚਾਨਕ ਉਸ ਦੀਆਂ ਅੱਖਾਂ ਲੱਗ ਗਈਆਂ ਅਤੇ ਟਰੱਕ ਬੇਕਾਬੂ ਹੋ ਕੇ ਸੇਮ ਨਾਲੇ ਵਿੱਚ ਜਾ ਡਿੱਗਿਆ।