ਪ੍ਰਤੀਬੱਧਤਾ ਲੇਖਕ ਦੀ ਰਚਨਾਕਾਰੀ ਦੀ ਕੁੰਜੀ ਹੁੰਦੀ ਹੈ : ਸੁਰਜੀਤ ਪਾਤਰ

ਲੁਧਿਆਣਾ (ਸਲੂਜਾ)-ਪੰਜਾਬੀ ਸਾਹਿਤ ਅਕਾਦਮੀ, ਲੁਧਿਆਣਾ ਵਲੋਂ ਪੰਜਾਬੀ ਦੇ ਪ੍ਰਸਿੱਧ ਨਾਟ-ਕਰਮੀ ਮੱਲ ਸਿੰਘ ਰਾਮਪੁਰੀ ਵਲੋਂ ਸਥਾਪਿਤ ਕੀਤਾ ਗਿਆ ਪਹਿਲਾ ‘ਸ. ਮੱਲ ਸਿੰਘ ਰਾਮਪੁਰੀ ਪੁਰਸਕਾਰ’ ਪੰਜਾਬੀ ਦੇ ਪ੍ਰਸਿੱਧ ਗਲਪਕਾਰ ਮਨਮੋਹਨ ਬਾਵਾ ਨੂੰ ਪ੍ਰਦਾਨ ਕੀਤਾ ਗਿਆ। ਪੁਰਸਕਾਰ ਸਮਾਗਮ ਦੀ ਪ੍ਰਧਾਨਗੀ ਡਾ. ਸੁਰਜੀਤ ਪਾਤਰ ਨੇ ਕੀਤੀ। ਉਨ੍ਹਾਂ ਤੋਂ ਬਿਨਾਂ ਪੰਜਾਬੀ ਸਾਹਿਤ ਅਕੈਡਮੀ ਲੁਧਿਆਣਾ ਦੇ ਪ੍ਰਧਾਨ ਪ੍ਰੋ. ਰਵਿੰਦਰ ਭੱਠਲ, ਮਨਮੋਹਨ ਬਾਵਾ, ਸਤਵੀਰ ਸਿੰਘ ਰਾਮਪੁਰੀ, ਡਾ. ਕੁਲਦੀਪ ਸਿੰਘ ਦੀਪ ਅਤੇ ਡਾ. ਸਤਿੰਦਰ ਸਿੰਘ ਰੈਬੀ ਪ੍ਰਧਾਨਗੀ ਮੰਡਲ ਵਿਚ ਸ਼ਾਮਲ ਸਨ। ਪ੍ਰੋ. ਰਵਿੰਦਰ ਭੱਠਲ ਤੇ ਡਾ. ਕੁਲਦੀਪ ਸਿੰਘ ਦੀਪ ਨੇ ਮੱਲ ਸਿੰਘ ਰਾਮਪੁਰੀ ਦੀ ਸਾਹਿਤਕ ਘਾਲਣਾ ਬਾਰੇ ਵਿਸਥਾਰ ਵਿਚ ਜਾਣ-ਪਛਾਣ ਕਰਵਾਈ। ਉਨ੍ਹਾਂ ਨੇ ਮੱਲ ਸਿੰਘ ਰਾਮਪੁਰੀ ਨੂੰ ਇਪਟਾ ਦੀ ਨਾਟਕ ਲਹਿਰ ਦੀ ਉਪਜ ਕਹਿੰਦਿਆਂ ਉਨ੍ਹਾਂ ਦੇ ਨਾਟਕਾਂ ਅਤੇ ਓਪੇਰਿਆਂ ਬਾਰੇ ਗੱਲ ਕੀਤੀ। ਸ. ਮੱਲ ਸਿੰਘ ਰਾਮਪੁਰੀ ਵਲੋਂ ਕੀਤੇ ਵਿਰਾਸਤੀ ਤੇ ਇਤਿਹਾਸਮੁਖੀ ਖੋਜ ਕਾਰਜ ਨੂੰ ਉਨ੍ਹਾਂ ਨੇ ਵਿਸ਼ੇਸ਼ ਤੌਰ ’ਤੇ ਉਭਾਰਿਆ। ਨੌਜਵਾਨ ਆਲੋਚਕ ਡਾ. ਸਤਿੰਦਰ ਸਿੰਘ ਰੈਬੀ ਨੇ ਮਨਮੋਹਨ ਬਾਵਾ ਦੇ ਕਲਾ-ਸੰਸਾਰ ਬਾਰੇ ਵਿਸ਼ੇਸ਼ ਭਾਸ਼ਣ ਦਿੱਤਾ। ਉਨ੍ਹਾਂ ਨੇ ਬਾਵਾ ਜੀ ਦੀ ਸਿਰਜਣਕਾਰੀ ਵਿਚ ਉਨ੍ਹਾਂ ਦੀ ਇਤਿਹਾਸ-ਦ੍ਰਿਸ਼ਟੀ ਸਬੰਧੀ ਵਿਸਥਾਰ ਨਾਲ ਚਾਨਣਾ ਪਾਇਆ। ਪੰਜਾਬੀ ਸਾਹਿਤ ਅਕੈਡਮੀ ਲੁਧਿਆਣਾ ਦੇੇ ਸੀਨੀਅਰ ਮੀਤ ਪ੍ਰਧਾਨ ਸੁਰਿੰਦਰ ਕੈਲੇ ਨੇ ਮਨਮੋਹਨ ਬਾਵਾ ਬਾਰੇ ਸ਼ੋਭਾ ਪੱਤਰ ਪਡ਼੍ਹਿਆ। ਇਸ ਸਮਾਗਮ ਦੀ ਪ੍ਰਧਾਨਗੀ ਕਰ ਰਹੇ ਪੰਜਾਬੀ ਸਾਹਿਤ ਅਕਾਡਮੀ ਦੇ ਸਾਬਕਾ ਪ੍ਰਧਾਨ ਡਾ. ਸੁਰਜੀਤ ਪਾਤਰ ਨੇ ਲੋਕ-ਪੱਖੀ ਸਿਰਜਕ ਦੇ ਨਾਂ ’ਤੇ ਸਥਾਪਿਤ ਪੁਰਸਕਾਰ ਨੂੰ ਇਕ ਲੋਕ ਪੱਖੀ ਸਿਰਜਕ ਨੂੰ ਦਿੱਤੇ ਜਾਣ ਨੂੰ ਚੰਗਾ ਸ਼ਗਨ ਕਿਹਾ। ਉਨ੍ਹਾਂ ਨੇ ਕੁਝ ਸ਼ਬਦ ਲੇਖਕਾਂ ਬਾਰੇ ਬੋਲਦਿਆਂ ਕਿਹਾ ਕਿ ਪ੍ਰਤੀਬੱਧਤਾ ਲੇਖਕ ਦੀ ਰਚਨਾਕਾਰੀ ਦੀ ਕੁੰਜੀ ਹੈ। ਇਸ ਮੌਕੇ ਪ੍ਰਿੰ. ਪ੍ਰੇਮ ਸਿੰਘ ਬਜਾਜ, ਡਾ. ਗੁਰਇਕਬਾਲ ਸਿੰਘ, ਡਾ. ਜਗਵਿੰਦਰ ਜੋਧਾ, ਮਨਜਿੰਦਰ ਧਨੋਆ, ਤ੍ਰੈਲੋਚਨ ਲੋਚੀ, ਖੁਸ਼ਵੰਤ ਬਰਗਾਡ਼ੀ, ਡਾ. ਕ੍ਰਾਂਤੀਪਾਲ, ਸੁਖਦਰਸ਼ਨ ਗਰਗ, ਇੰਦਰਜੀਤਪਾਲ ਕੌਰ, ਸੁਰਿੰਦਰ ਦੀਪ, ਰਵੀ ਰਵਿੰਦਰ, ਦੀਪ ਜਗਦੀਪ, ਹਰਬੰਸ ਮਾਲਵਾ, ਭਗਵਾਨ ਢਿੱਲੋਂ, ਸੁਮਿਤ ਗੁਲਾਟੀ, ਅਜੀਤ ਪਿਆਸਾ, ਬਲਕੌਰ ਸਿੰਘ ਤੇ ਹੋਰ ਸਾਹਿਤ ਪ੍ਰੇਮੀ ਹਾਜ਼ਰ ਸਨ। ਵਿਸ਼ੇਸ਼ ਮਹਿਮਾਨ ਵਜੋਂ ਸਮਾਗਮ ਵਿਚ ਪਹੁੰਚੇ ਮੱਲ ਸਿੰਘ ਰਾਮਪੁਰੀ ਦੇ ਭਤੀਜੇ ਸਤਵੀਰ ਸਿੰਘ ਨੇ ਸਾਰਿਆਂ ਦਾ ਧੰਨਵਾਦ ਕੀਤਾ।